ترررن ترررن ترررن تررررن
انا: الو
خطيبى :ايوة يا مها انا بصحيكى من النوم اهو زى ما قولتيلى
انا:ميرسى يا وائل
خطيبى: بقولك ايه لما افوت عليكى تكونى جاهزة متخلنيش استنى
انا:حاضرة يا باشا هتيجى تلاقينى جاهزة على المفتاح
خطيبى:ههههههههه مهما حصل هتفضلى زى مانتى
انا: اوك يلا سبنى بقة عشان اروح اجهز
خطيبى :باى
انا :باى
اقترح عليا خطيبى انه نخرج نتغدى برة ونروح نقعد فى اى حته بعد كدة ونقضى يوم سوا
الصراحة كان يوم جميل
اكلت لحد ما بطنى وجعتنى
وشربنا عصير لما روحنا كافيه وروقنا يعنى
قعدنا نتكلم عننا وعن حياتنا الخاصة فى المستقبل
انا:تفتكر هنفضل نحب بعض كدة حتى بعد الجواز
خطيبى:لو فضلنا نعامل بعض كدة اكيد هنفضل نحب بعض طول ما فى تفاهم,وانتى تفتكرى اية اللى ممكن يزهقنا من حياتنا فى رايك
انا:الاطفال هما اللى بيخنقوا وينرفزو ويضايقو لان احساس المسئولية صعب وكمان الاطفال هياخدو وقت منى كان ممكن اهتم فيه بيك
خطيبى:الحمد لله كرهتينى فيهم قبل ما يجيو
انا:مش قصدى والله بس دى الحقيقة هيلخمونى ومش هعرف البس واتدلع زى الاول مفيش وقت
خطيبى:دة انتى ناويها بقة ومش هتهتمى بنفسك من الاول
انا:لا والله يا حبيبى مش كدة
المهم كان حوار كبير وطوييييييييييييييييييييييل مش هعرضة كله عشان البوست ميبقاش طويل وممل
روحنا على البيت واحنا فى التاكسى كنا نتبادل كلام بالعيون نظرات اتنين عاشقين بعض واتكلمنا
خطيبى:تصدقى مكنتش فاكر انى هحبك كدة كنت فاكرك هتطلعى بنت عادية ودماغك صغيرة
انا:يلا اللى حصل بقة مانا كمان حبيتك على العموم يكفيك انك تقول اللهم انى لا اسالك رد القضاء ولكنى اسالك اللطف فيه
خطيبى:ههههههههههههههههه يا بت ارحمى بقة بس والله بحبك لانك ذكية ورغم ان اللى يشوفك ويكلمك اول مرة يحس انك بت هبلة ملكيش فى حاجة ويحس ان عقلك صغير لكن اللى يعرفك يعلاف انك مش بتاعت هزار وتهريج وبس يعرف انك بت ذكية وجدعة بجد
انا:الله يكرم اصلك عقبال ما تشوف ولادك قول امين
المهم روحنا وماما سألتنا السؤال المعتاد
ماما:كلتو ايييييييييييييييييييييييييه؟
انا وخطيبى:لحمة موزة مشوية ومحاشى ورز بالخلطة وسلطات
المهم دخلنا اندفسنا فى اوضة الصالون وقعدنا نكمل كلامنا
خطيبى:الفلانتين جاى وقرب وكدة وانا بصراحة مكنتش اعرف اية الفلانتين دة معرف بيجيبو اية,اجبلك اية؟
انا:هههههههههههه انت بتسألنى انا اية الهدية المحروقة سلفا دى
خطيبى:كدة طب اخر مرة هسالك على حاجة
انا:انت بتسالنى انا لية متروح تسال حد من اصحابك
خطيبى :لا بجد قوليلى على محل كويس اجيب منه
المهم قولتله الفلانتين ده بتاع اية وساعدته
يلا كله زكا عن صحتى
خطيبى هيجننى يعرف الفلانتين لكن ميعرفش بتاع اية
عنده حق ماهو عمره ما حب قبل كدة
بس هو مش خام على فكرة دة مدقدق موووووووووت
يلا كفاية عليكو نميمة كدة النهاردة نبقى ننم بعدين
انتظر تعليقاتكم
10 comments:
هههههههههه
والله يا مها انتى زي السكر فعلا انا حبيتك خلاص اتصرفي
ربنا يا رب يكملكوا على خير يارب انتى وحبيبك ويجمعكم على خير
ويومها اازغرط من هنا لمدونات اسوان وجزر البحر المتوسط والكاريبي
ايه يا بنتي هتعقدي الراجل من أولها
العيال هيلخموني ومش هأعرف اهتم بنفسي
ما بلاش تسدديها كده يا حاجة
بجد ربنا يوفقوا ويرزقوا بالبذرية الصالحة
سلام يا عسل
لماضة يا عسل اسمك ملعلع بين المدونات
ولما اتجوز اكيد هعرفكم
متقطعيش زياراتك عنى
يا هبه انا مش بعقده ولا حاجة بس لما اقوله كدة واهتم بنفسى هتبقى حاجة حلوة انما لو عملتلو البحر طحينة
مش هيحس بقيمة اللى بعملو
هههههههههههههههه
بصراحة مكنتش اعرف ان عم فلانتين ايجي الاسبوع ده الا بالصدفة من واحد صحبي ولما عرفت طبعا قلت لازم اشتريلي كام دبدوب احتياطي واخزنهم عندي عشان ليجي عم فلانتين ويعرف اني مشترتش الدباديب يزعل مني ولاحاجة
وكل فلانتين وانتم طيبين ولو حد عاوز دباديب يقلي واحنا بنوصل الطلبات للمنازل
الفارس الملثم
شكلك طلعت من نوعية خطيبى
ممكن تبعت لخطيبى دبدوب والنبى اصله مشغول اوى مش هيعرف يشترى واحد
مها , ممكن أعرف فى رأيك إللي دخله تخطى حد كام يقدر يفكر في الزواج و إللي دخله أقل من الحد دا يستحسن ميفكرش ؟
أنا بتكلم بالنسبه لمعيشة الناس إللي في القاهرة
بالنسبة لمعيشة الناس اللى فى القاهرة وهى طبعا اغلى معيشة على مستوى الستة وعشرين محافظة
مش اقل من الف جنية شهريا
انا مش قاسية لما اقول الرقم دة وبعدين انا قولت عشان يعيش مستور
ويدفع مثلا 400 جنية ايجار الشقة القانون الجديد
ويدفع فاتورة الكهربا والغاز والمية اللى فى ارتفاع مستمر وكمان فلوس البواب ويقدر ياكل لحوم 4 ايام فى الاسبوع ويشترى السجاير ويعمل حساب للزمن ولو حصل ظروف وكدة
شوفت اهى الميزانية خربت من اولها
حتى الف جنية مش نافعة اعتقد الحياة بقت صعبة اوى والبلد دى قست كتير على اهلها
لكن سيبك انت من الدخل على قد لحافك مد رجليلك وعلى العموم كدة كدة ممكن تتجوز مهما كان دخلك المهم هتعيش ازاى
معدم
مزنقة معاك
مستورة والحمدلله
الاشيا معدن
قصدت اقولك ملهاش مقياس محدد اوى
كل عيد حب وانتى وخطيبك فى حب متواصل ان شاء الله وتبقوا احسن زوجين ومن ناحية الاولاد متقلقيش الاولاد بتزود الحب مبتقللوش وده عن تجربة يالا اتجوزى يا قمر وهاتى مشاكسين صغيرين كلهم شقاوة زيك
جسر الى الحياه
انا هاخد بنصيحتك فى موضوع الاولاد ولو مطلعش صح
هجيلك اخنقك باللبانه اللى فى بقى دى
Post a Comment