مقدرش اأقول مبروك ... إنتى إتخطفت حياتك و شبابك و حب الجامعة إللى كان محتمل تمرى بيه و التجارب إللى كان ممكن تمرى بيها كلها و لو تفوقتى كان ممكن تقدمى على منحه في جامع في الخارج و تفوزي بيها و تسافرى وحدك عصفور حر طليق يلف و يشوف ... قولى لكل دا وداعاعندك تمنتاشر سنة و تتجوزى جواز صالونات ؟ .. غريبه دي .. أمال العواجيز يعملوا إيه
دة تعليق وصلنى من احد زوار بلوجى
وقولت ارد علية
اولا كدة بالصلاه على النبى قبل ما نستفتح ونكتب محدش يفهمنى غلط
افهم كلامى زى مانا قصدى تفهمنى بالظبط
اولا بتقولى انتى اتخطف شبابك وحياتك وحب الجامعة
ممكن اولا توضحى يعنى ايه حب الجامعة احب طالب فى سنى او اكبر باربع سنين عشان نحب بعض بس
اسفة انا مش من النوع دة انا مش بحب لمجرد الحب والتسلية
انا طول عمرى كنت اتمنى حب من النوع اللى انا فيه دة حب يتوج بالزواج
حب يعرف النور
حب امام اهلى وامام العالم كله
محبش انى اكون مستخبية او فى الدرا
او خايفة حد يشوفنى يروح يقول لاهلى او ايدى تتفعص من كترما تتمسك فى كل كافى شوب شوية
وافشل واحب تانى وافشل واحب تانى
مش انا ومش اسلوبى
ثانيا انا مش مجبرة على حب خطيبى وانا وهو بنحب بعض بجد مش عشان جواز تقليدى يبقى اهلى غصبونى
ان قعدت معاه وكلمته ولما عجبتنى شخصيته وافقت محدش ضربنى على ايدى وبابايا سألنى الف مرة وقالى لو مش موافقه مش مشكلة انتى مش مجبرة
وجميل اوى انك تحسى ان ماماتك اللى هى اقرب واحدة ليكى كبنت بتساعدك وتدعمك عشان علاقتك تستمر
وتلاقى الناس كلها فرحانه بحبكم وعاوزاه يزيد ومش هيبصولك النظرة اياها لو شافوكى لابسه نضارة شمس ومتخفيه عشان محدش يعرفك وانتى مع الجو بتاعك
وبعدين مش الفكرة اللى مضيقاكى اوى انه جواز صالونات
يعنى لازم يكون عرفنى برة وكنت الجيرل فريند بتاعته فتره قبل الجواز او الخطوبة
مش الصدفة هى اللى بتجمع الاتنين سوا
الصدفة دى بردة جت بس صادفت انه شافك فى البيت مع اهلك
نفس النتيجة واحدة لو كنت عجبته برده كان هيخطبنى
سواء شافنى فى الشارع او الشغل او الجامعة او غيره
مش عاوزه استخدم تعبير فظ لكن هى عاملة زى
تعددت الاسباب والموت واحد
هنا بقة تعددت الاسباب والجوازة واحدة
لانه مكتوبلى عند ربنا انى هقابلة وهتجوزه وهو نصيبى مهما كانت الطريقة اللى عرفنا بيها بعض
وكمان مش عشان احنا جواز صالونات متنشيين وكل واحد فينا بيرسم التت على التانى وانه احسن انسان فى الكون للتانى بالعكس دة عشان احنا كدة اتفقنا من الاول اننا نكون مكشوفين لبعض لان الحاجات دى الكدب فيها يضر
ودة اللى حصل واحنا دلوقت نعرف عيوب ومميزات بعض وكل واحد فينا متقبل التانى زى ماهو عليه
وحاجات كتير مش هتعرفيها الا اذا كنت بينا وقاعدة وسطينا
وبتقولى اتفوق واقدم منحة والكلام دة
انا الحمد لله بحب دراستى وكويسة فيها الحمد لله
وهو كمان مش ممانع انى اكمل تعليم وانى اخد دبلومة واعمل ماجسيتير او دكتوراه حتى
بالعكس هو ورايا وبيدعمنى ودايما يقولى زاكرى المذاكرة هى اللى هتنفعك انا كنت بذاكر ثلاثة عشر ساعة فى اليوم فى الامتحانات وكلام من ده كتير
وابقى عصفور حر طليق والكلام دة
قصدك عصفور لوحده صحيح حر لكن لوحدة
مش جنبه حد يسنده ولا حضن دافى يترمى فيه وقت ما يحتاج او وقت ما يضعف
كانت عاجبانى حريتى ولسة عاجبانى لانها لسة مستمرة وزادت حدود حريتى اكتر من يوم ما عرفته كمان
لكن مكنش عاجبنى وحدتى
وكفاية انى فضلت غالية وعزيزه فى ايد واحد بجد بيقدرنى واختارنى اكون شريكة حياتة
مش واحد عاوز يحب حب طلبه وخلاص
وكمان انا شباب الجامعه عمرهم ما ملو عينى التيشرتات الضيقة والبنطلون الساقط
مش دى الرجالة مينفعش يتقال عليهم رجالة اصلا
انا مش قصدى المظهر لوحده انا قصدى اللى ورا المظهر دة اكيد انتو فاهمنى
انا مش بحكم على حد من مظهره
وانا ميملاش عينى غير راجل بجد زى اللى معايا الناس تحترمه وانا كمان
وحب الجامعة اتعرض عليا بدل الواحدة عشرين
وانا كنت برفض لانى مش عاوزة كدة
انا عاوزة حب يتوجه الزواج الناجح انشاء الله
واذا كنت هقول وداعا زى ما بتقولى
هقول وداعا لوحدتى ولكتم اسرارى جوه قلبى وشيل همى لوحدى لوحصلى مشكلة او اى حاجة
اصبح عندى اللى احكيله واشتكيله عن اللى جوايا
متعة احساس بالحب وان حد جنبك متتكلميش عنها ولا تقولى رايك فيها الا اذا جربتيها عشان يكون راى عن تجربة وخبره
وبعدين مش العواجيز بس اللى بيتجوزو جاوز صالونات وجواز الصالونات مش للعواجيز بل انه اثبت ناجحه فى حالات كتيرة وبصى حواليكى كويس
لانك لما بتختارى شريك حياتك بتختاريه بعقلك ولازم تشوفيه بعين الحقيقة وتعرفى عيوبه ومميزاته وهو مناسب ليكى ولا لا
بدل ما مرايه الحب تعمينى
واخد بنى ادم فيه عيوب غير قابله للتصليح
تفكير خالى من العاطفة اللى ممكن تاثر على اختياراتك الصح
واحب اقولك انك مجربتيش الحب ولا تعرفيه وكمان بعد ما تعملى كل حاجة فى حياتك انتى كنتى عاوزاها هتلاقى نفسك فى سن غير مناسب للجواز ويا اما القطر هيفوتك ويا اما هتتجوزى واحد كان متجوز قبل كدة ومعاه اولاد او ارمل او مطلق
المهم انه هيكون جرب الحب قبل كدة
وعمرك ما هتكونى انتى حب حياتة
لانه حب قبل كدة
والحب الحقيقى مرة واحدة فى العمر ولا يتكرر
ولا انتو رايكم ايه يا جماعه
انتظر تعليقاتكم
ملحوظة:انا تقريبا عارفة مين اللى كتب التعليق دة لان اسلوبه فى الكتابه انا عارفاه وواضح جدا لكن انا مش زعلانة من التعليق دة
وعلى العموم ان بعض الظن اثم
9 comments:
إنتى متعرفينيش ولا أعرفك فلو هتيجي على ناس تانيه فدا هيكون غلط وطيش مفيش داعى منه وأظن إن كتابتها الصحيحه هي (بعض الظن إثم) بالضاض وليس (بعد) , أتمنى يكون مستقبلك سعيد ولو محبتيش اكمل راى فإحذفى التعليق لكن لو عاوزه تسمعيه فهكتبه أمامك و لكى الاختيار
الحاجة الغلط يكون لإقتناعك مش عشان حواليكي الناس في بيئتهم و ثقافتهم شايفين كدا و الكلام إللي عرضتيه إنه غلط لو مارستيه فدا أنا أسميه حق و امور تخصك و ممارسه لحياتك و محدش ليه دعوه لا تمتنعى عنها لمجرد إن دا مش عاجب و مش على المزاج الدينى و الثقافى لناس تانيين , فكونك تحبى أو كونك تقابلي فدا من حقك وحريتك الشخصيه إللى لازم تكونى مقدساها و تنال التقديس و الإحترام من كل إللى حولك وإللي لازم كمان تقاتلى عشانها والحريه دى في الأصل متحققتش إلا لما ناس تانيين قاتلوا لأجيال عشان يقدموها ثمرة لنا على طبق من ذهب - شوفى بنفسك الحريه التى منحتها المجتمعات المتقدمه وصلت لفين وهل يا ترى هيكون عندهم المشكلام إللى تناولتيها في كلامك ((ومش هيبصولك النظرة اياها لو شافوكى لابسه نضارة شمس ومتخفيه عشان محدش يعرفك وانتى مع الجو بتاعك))؟
المجتمع في مصر كان بيتمتع بحريات أوسع في الستينات و السبعينيات من القرن العشرين وتنازل طوعا (وجهلا) عن كل ذلك وهو لا يدرك الجريمة اللى ارتكبها في حق نفسه و كان الناس من الجيل إللي ينتمى إليه ابويكي يتمتعوا بهامش حريه أحسن و الناس من الجيل إللي ينتمى إليه جدودك كان لهم هامش حريه أعظم درجه و الإحترام للمرآه كان كبير كمان لمكانتها ودورها النهضوى في المجتمع , لكن للأسف الوضع اصبح في النازل لان مع موجة التدين الوهابى السعودى الاخوانى السلفى المدعم بفلوس دول الجاز فرط في مكاسب كبيره تمتع بيها المجتمع و باع حدود من الحرية الشخصيه و من الخصوصيه و من الاستقلال و الحياة الخاصه كانت مكاسب في الماضى وها هى بنت تمنتاشر في القرن الواحد والعشرين تستسلم لقيودها وتقوم بدور المحامى لسجانيها بمعنى إنك لو كنتى تجلسى مع واحد و شافك حشرى من الحشريين وراح قال لاهلك فاهلك يدافعوا عنك و يقولوا له وإنت مالك و إياك تتعرض لها او تحشر نفسك فى اللى ملكش فيه ويقطعوا معاه فورا
الحاجة التانية إن كنت أقصد إن لسه قرارك النهائي متكونش لانك لسه صغيره و ما ترينه حسن اليوم فربما يكون لكى رأيى أخر فيه بينما الجواز قرار مصيرى .. فممكن يكون ليكى رأي تانى بعد كدا في امور كنتى مقتنعه بيها جدا
شوفى أنا والله العظيم معرفكيش والله العظيم تكونى غلطانه لو فكرتى في حد تانى ومتنشريش تعليقى دا خالص و اهو اقريه وامسحيه والسلام ومعدتش هكتب تانى ليكى و انشاء الله يكون قرارك بالارتباط دا هو واحد من القرارات القليله اللي الانسان بياخدها من الصغر و متطلعش غلط في الكبر و يكون سعيد بيها
مرة أخرى عشان الموضوع ميتحولش لشكل له تاثير عليكى نفسيا في المستقبل فخلاص يا ستى معدتش هكتب تانى ليكي وامسحى تعليقى و انا كتبته بس عشان ارد و اوضح فكرتى وهو ليكى خاص ومش للنشر و خالص تحياتى امنياتى
اولا ميرسى على التصحيح اللغوى بس دة كان خطأ كيبوردى
ثانيا اللى انتى بتقوليه دة انامش مقتنعة بيه يمكن يكون نظريا فى بعض الحالات صح لكن انتى متعرفيش طبيعة العلاقة بينى وبينه اية؟ وانا متاكدة انى مش غلطانة فى اختيارى وبعدين هو لازم ابقى عاملة زى الخروف اللى هيلحقوه بالسكينه لازم اكون عانس ويلحقونى بالجوازه والفكر اللى فى دماغى دة فكرى انا محدش ضربنى على ايدى وقالى متحبيش فى الجامعة سواء كان شخص او شخصية اعتبارية متمثلة فى المجتمع وبعدين انا عارفة انك متعرفنيش لكن اسلوبك فى الكتابة الصحفى واضح متقدريش تدارية
والمفروض تدعى الى الاحترام مش اللف فى الشوارع والكافى شوب وانتى عارفةالحرية الى حوليكى ود البنات لفين دة لو كانو بنات لسة ولو كنت مش شايفة يبقى انتى مش عايشة فى مصر
اه صحيح انا نسيت اقولك انى اتمنى انك تزورنى على طول
انشالله حتى تفتحى البلوج كل 5 دقايق
والاختلاف فى الراى لا يفسد للود.....
اكيد فاهمة
وبيقولو ان المحبة ممكن تيجى بعد عداوة
لكن هنا مش عداوة
هنا خلاف بس
وميرسى على متابعتك لبلوجى
وارجو دائما
:)
والابتسامة دى بتعبر عن اية
اصلها جاتلى وانا اونلين هنا اهو
حاولت اكتبلك حاجة فى الشات بوكس
منفعش
سلام
احم
دخلت بين بننوتين شكلهم بيتخانقوا وشكلي انا اللي حتتقطع هدومي في الآخر :)
طيب انا عاوز أقول حاجة من واقع تجربتي الشخصية البحتة حواحد متزوج وأرجو أن كلامي لا يؤخذ من منطلق الدافع عن أو الهجوم على
انا بقول رأيي وبس :)
أنا أشرف حمدي طبيب أسنان ، حبيت هند زميلتي من سنة تانية جامعة ، ماكنتش بفكر في الزواج في الوقت ده طبعا لكن أنا كان عندي اصرار اننا نفضل مع بعض بأي شكل
حبينا بعض كام سنة ؟ أربع سنين كاملة
خلال الفترة دي عرفنا بعض كويس جدا ، علي الأقل هي شافتني لما بتنرفز بكون عامل ازاي ، لما بكون رخم ايه مقدار الرخامة وطبيعتها ونوعها ، لما بصحي من النوم شعري منكوش ومش حالق دقني وأجرى ألحق السكشن بيكون شكلي ايه ، كل حاجة
مرينا بلحظات وأوقات صعبة جدا
مسكت ايدها ؟ آه مسكت ، وروحنا كافيهات ، وماكنش ترويش ولا هبل لأني كنت مصر على حبي لهند وعلاقتي بيها
واتقدمت وخطبتها
وكانت فيه مشاكل لا أول لها ولا آخر
وفضلت مصر ، وحاولت ، ولم أستسلم
كانت ايه النتيجة ؟؟؟
اتجوزت هند حبيبتي
وجبنا بيبي اسمه عمرو
وبقينا أسرة سعيدة ومستورة والحمد لله
عمر ما الحب في الجامعة كان غلط
الصحوبية هي الغلط ، الترويش هو الغلط
انا هو ، حبيت في الجماعة واتقدمت وخطبت واتجوزت وخلفت وسعيد جدا والحمد لله
لو عاوزة رأيي بدون زعل مني بجد
سنك صغير على اتخاذ قرار زي ده في الوقت ده
شباب الجامعة زي الفل ورجالة ورجالة قوي كمان :) ما نا قدامك أهو
ههههههههه
عموما ربنا يوفقك
بس إوعي إوعي تقولي كلام وحش عن حب الجامعة
كان لازم أرد عشان أنا مريت بالتجربة دي وبعتز بيها جدا
ولعلمك أنا كان لا يمكن اتجوز لولا حب الجامعة لأن الجواز مش هدفي اطلاقا
انا اتجوزت عشان أعيش مع الانسانة اللي بحبها طول عمري
تحياتي
وشكرا علي دعوتك ليا لزيارة مدونتك
د. أشرف حمدي
د.اشرف حمدى شكرا جدا جدا لزيارتك ليا
متعرفش قد اية الموضوع دة فارق معايا
ورايك يهمنى
لكن ياريت كل شباب الجامعة بتوع اليومين دول زيك صادقين لكن 95% بيتسلو
ياريت كان تمن جهاز كشف الكدب متاح كنت جبت واحد
ووالله لو كنت لاقيت البنى ادم الصادق دة وحسيت ان الموضوع بجد
مكنتش هتنازل عنه وهفضل جنبه زى مانا جنب خطيبى دلوقت
وبعدين هى الخطوبة مش اتعملت للتعارف
احنا اتفقنا اننا اذا اختلفنا ومعرفناش نكمل يبقى نصيبنا كدة
وبعدين انت نفسك لو عرفتو هتحبو اوى
انسان ذكى صادق متفتح بيفهم
ليه بعض عيوبه اللى من كتر حبى ليه بقيت متقبلاها
وبعدين بالنسبةلصغر سنى
من غير غرور انا اللى بيقولو عليا عقلى اكبر من سنى
اول مرة خطيبى اتكلم معايا فيها مكنش مصدق انى 18 سنة ويمكن دى صفة بقت منتشرة فى عدد من البنات ودة نتيجى لانى من عيلة مثقفة وانا اول سابقة فى العيلة تتجوز فى سن 18 لانهم مكنوش يقدرو ياخدو قرار الجواز
لكنهم فى حالتى انا شافو انى اقدر اخده
كلامك نظريا صح لكن لكل قاعدة شواذ
علي فكرة البلوج دة جامد جدا
وانا احيكي علي دة وانا مش عارفة اية الناس الي بيهاجموكي دول علشان انتي مخطوبة في سن صغير اصلا الجواز عمرة مكان لة سن مدام كان فية اتفاق خلاص وانا كمان متفقة معاكي في ان الحب الحقيقي مبيجيش غير مرة واحدة فعلا
لانة لو جة مرة تانية بيكون محكوم علية بالفشل ودايما احنا بنحاول ان نقارن بين الاول والتاني علشان كدة بيكون محكوم علية بالفشل وانا بشكرك علي البلوج دة لانة بيتكلم بصدق وكمان انتي ما شاء الله عليكي بتكلمي في موضوعات مطروحة كتير ومثيرة وربنا يوفاك وتتجوزوااااااااااااااااااا وتعيشو في تبااااااات ونبات ونفرح بالصبيان والبنات ان شاء الله باي بئة علشان انا رغاية كتير باي
ميرسى ليكى يا كركر وعادى ممكن تعتبريهم ناس بيقولو رايهم مش مهاجمة اوى يعنى
اتمنى البلوج بتاعى يكون فعلا زى ما بتقولى ولو انى حاسة انى لسة بلوجرية صغيرة على الكلام الكبير دة كله وانتى مش رغاية واتكلمى براحتك اكتر من كدة كمان
Post a Comment