لولولولى....عقبال عندك يا ام احمد

لولولولى .....عقبال ما تشوفى بناتك يا ام نوسة

وسط جو جميل بين ام احمد وام نوسة

بهزر طبعا

تمت خطوبتى انا ووائل خطيبى

حسيت انو مينفعش صورتى تبقى صورة خطوبة فى البروفايل وانا بلبس الدبلة من غير ما اعرفكم بالموضوع دة

عشان كدة قررت احكى ليكم ملابسات الحادث

أأأأ......اقصد الظروف اللى جمعتنا

خطوبتنا كانت جميلة وقصة تضحك كل اللى يسمعها

مبدئيا هى خطوبة صالونات

كانت عمة وائل بتدور ليه على عروسة

وقالت لمامتى تدور معاها بما انتو عارفين ان ماما خاطبة او عايشة دور الخاطبة بس عندها حق جمعت 300 راس فى الحلال

عشان مطولش عليكم

ماما سمعت كلام عمتو وبقت عمالة بتدور لية على عروسة

وبالفعل جابتله عروسة دكتورة صيدلية

مرضاش يروح يشوفها لاسباب خاصة

المهم عمة وائل بتكلم طنط محبات احدى الصديقات المشتركات بينها وبين ماما

عمة وائل: وام مها بتدور على عروسة معايا لابن اخويا

طنط محبات:(باستغراب) بتدورلك على عروسة طب ما هى عندها عروسة

عمة وائل:بس هى بتقول ان بنتها صغيرة

طنط محبات:صغيرة اية بس دى فى الجامعة

عمة وائل:(باستغراب) بجد والله؟

طنط محبات: اه والله واسمها مها ومواصفاتها كذة وصفاتها ونعاتها وانتى عارفة انها من بيت طيب

تنتهى المكالمة وتغلق عمة وائل السماعة وتتصل بماما

وتديها دش تمام عشان ازاى يبقى عندها بنت فى سنى ومتقولش

عمة وائل: ازاى يبقى عندك بنت على وش جواز ومتقوليش ولا وكمان بتدورى على عروسة

ماما: عروسة اية بس دى مها عندها 18 سنة ميجيش فى بالى انكم تكونو بتفكرو فى السن دة

عمة وائل:احنا جايين نزوركم بكرة

ماما: بس.. اصل...أ

عمة وائل:اصل وفصل اية بكرة الساعة 8 انشاء الله

ماما:تشرفونا انشاء الله

ماما تغلق السماعة وتيجى تقولى انتى يا بلوة ياللى قدام التليفزيون

(اصل ماما تحب تهزقنى..أأ.. قصدى تدلعنى)

انا: ايوة يا ماما

ماما:تعالى يا تحفة جالك عريس... انجغة جالك عريس يا بت

انا :(زى العبيطة فاتحة بقى والريالة بتنزل)عريس؟!!!! ازاى

ماما: هو اية اللى ازاى زى الناس زى اى بنت

ملحوظة: اتضح فيما بعد ان وائل مكنش اول عريس بس ماما مكنتش بتقول عشان متشغلش بالى

ماما: وجايين بكرة الساعة 8 هو وعمتو وطنطك محبات

انا: طب ازاى انا مش جاهزة

خلاص اوك حتى يشوفنى على طبيعتى من غير تزييف بدل ما احط مكياج ميعجبوش محطش معجبوش ما هو العرسان بتتلكك اليومين دول

ملحوظة_جه وائل ومكنتش رحت لكوافير ومحطتش مكياج كمان قولت بلاش ابقى عروسة من اياهم عروسة تكنى كلر فول اوبشنز وكل الالوان متاحة ومشترتش طقم جديد

المهم جه وائل انكسفت ادخل الاول

ورفضت رفض تام تام تام انى ادخل وفى ايدى صنية عليها عصير وادلقها على العريس وجو الابيض والاسود دة

دخلت بعد نص ساعة سبتهم قاعدين وقعدت اتفرج على ام بى سى فور

ونسيت ادخل خالص لحد ما طنط محبات جت خدتنى من ايدى

وقعدنا كلنا سوا وهو قعد يتكلم وانا قعدت اتكلم بس احنا الاتنين مكلمناش بعض كل واحد فينا كان بسمع التانى صوته لحسن حد فينا يطلع اخنف ولا وحاجة

ومقلكوش على الضحك اللى بدأ من ساعة ما دخلت وانا كل كلمة اقولها يستظرفوها ويضحكو انا طبعا مكنتش بضحك لانى خلاص حافظة الكلام اللى بقولوه

المهم

الكلام دة كان يوم الاحد وعجبنا بعض اوى ووافقنا احنا الاتنين

غاب الاثنين والثلاثاءيوم خرج ويوم كان فى ماتش للاهلى ففضل انو يتفرج عليه وميجيش ولا يتصل حتى

المهم جه يوم الاربعاء ومعاه العيلة كلها

باباه ومامتة وعمتو وبنتها وجوزها وبناتها الاتنين واخوه الاصغر منه واخوه الكبير ومراته اللى هى كانت لسة عروسة من 10 ايام وقتها

المهم طبعا انتو عارفين ان انا ولا يهمنى انا اعلامية كبيرة وواخدة على الجماهير الكتير ودايما عندى حضور

دخلت اسد عالكرسى وكلمتهم كلهم واحد واحد وارد ردود تمام وعجبتهم وعجبونى

وقررنا نشترى الشبكة ونعمل الخطوبة

يعنى بالملخص

الاحد وائل شافنى

الاربعاء قرينا الفاتحة

الخميس جبنا الشبكة

الجمعة(اية اجازة رسمى)هى شغلانة ولا اية

السبت اول يوم من شهر تسعة خطوبتى

الاثنين:حمايا العزيز سافر الكويت

ولكم ان تتخيلو انا روحت اخترت الكوافير والفستان والشبكة واشتريت الاكسسواروالبرفان والكلام دة كله فى كام ساعة

اه طبعا كام ساعة امال كام يوم

مانتو شايفين الزنقة

كل دة فى يوم واحد لما رجليا اتكسرت

وتمت وحصلت الخطوبة واتخطبت فى ست ايام لواحد معرفهوش

ويوم الفرح كنا لسة بنسال بعض انت اسمك اية وانتى اسمك بالكامل اية وكدة يعنى

وعشان مبقاش كدابة كنت خايفة منحبش بعض

لكن حصل وحبينا بعض وحصل اللى يخلينا نتاكد انو حب بجد مش كدة وكدة

وطبعا مش هقلكو اية اللى حصل عشان ميبقاش فضايح

وبحبه بجد

وهو بيقول ان كل اللى محتاجة عندى

ما جمع الا لما وفق جوز مجانين واتخبطوا..أقصد اتخطبو يا اخواتى

وعقبال عندك يام حمدى وام نوسة وام كريم وام السيد وكل امهات المنطقة

هههههههههههههههه

اوعى حد يجى يقولى انهم جوزونى بدرى عشان احنا فلاحين

انا مدنية وانتو عارفين

انتظر تعليقاتكم

يا مصر بعشق ترابك...لكن ترابك دخل فى عينى

اولا كدة بالصلاة عالنبى مش عاوزة حد يقولى انى بدعو للمثالية

ومش عاوزة حد يقولى انى بكره البلد دى

يعنى من الاخر عاوزة لبن العصفور

المهم

لية دايما نتكلم على مصر على انها اسوأ مكان فى العالم وانها سودا وكل حاجة فيها وحشة اوى

صحيح ممكن حكومتنا تكون بتستحق لقب اسوأ حكومة عن جدارة لكن دة ملوش علاقة بالارض والسما والناس والمكان اللى فيه حبايبنا وقرايبنا

ممكن نكره حكومتنا لكن مش لازم ابدا نكره بلدنا

البلد دى مش بلد الحكومة

دى بلدنا احنا احنا اصحابها الحقيقين واحنا اهلها

تعالو نغير شوية من نفسنا وبلاش حالة الاحباط واليأس دى

يعنى مثلا دايما نقول ان بلدنا مش نضيفة طب ما احنا اساسا اللى بنرمى الزبالة

ويوم ما يحطو باسكت الزبالة يتسرق

_البريمة اتسرقت وبير الجاز اتردم_

الخالد فى قلوبنا:رشدى اباظة فى هاميس

بجد البلد دى تحير لكن مش وحشة ماهو اللى سرق الباسكت مش لاقى ياكل هيبيعو ويجيب بتمنه اكل

بقت قاسية علينا

لكن محتويانا يعنى انت مثلا لما تهاجر بطرق غير مشروعة ويرجعوك تانى هترجع على فين ؟؟؟
على المانيا

سلامات يا المانيا ساعتها مش هتلاقى حتة تتاويك غير بلدك عشان كدة مينفعش نكره الارض اللى عايشين عليها والا بعد كدة هنتعلم نكرهه نفسنا وكمان هنفرح فينا الاعادى اللى عينهم على البلد والمية 3 الوان ولو جالنا احتلال احنا اللى هنساعد جيش العدو

هو صحيح احنا فى حالة غزو واستعمار ثقافى بسبب المواد الاعلامية الاجنبية ومحاولة فرض الامركة الثقافية على شعوب تتنافى عادتها ومعتقداتها مع المواد دى

لكن بلاش نسود الدنيا فى عنينا كدة

وفيلم حين ميسرة دة ولا حين مسخرة ولا اسمو اية

دة اية السواد الناقع دة هى خلاص بقت كدة البلد سودا كلها شواذ ومثليين واطفال شوارع وحرامية وشحاتين وابصر اية ومدرك اية

البلد دى فيها دكاترة وعلماء و4 واخدين نوبل

البلد دى مش وحشة

هيجى واحد يطلعلى ويقولى واحنا نجوع عشان خاطر الارض اللى متوايانا يا مزمازيل

هقوله اولا استهجى كلمة مزمازيل صح ثانيا بطل كل شوية تطلعى تخضنى بصوتك دة

هقوله طبعا لا

وعندك حق البلد دى قاسية اوى على شعبها مع اننا عندنا مقومات دولة عظمى بس مفيش حسن استغلال للثروات الطبيعية وكمان مفيش حسن تقسيم للخير اللى بيطلع عن البلد دى

وعندوكو حق تتفرسوا لما تلاقو واحد فلاح فى الغيط طالع عينة من الصبح لحد بليل فى الغيط عشان الف ولا الفين جنية

وتلاقو واحد تانى بالتليفون بيعمل ملايين وبيشترى بدلة بنفس الالفين جنية دول

ولازم تحس بضيق لما تلاقى شاب ذكى معاه شهادة محترمة وقاعد فى البيت مش لاقى شغل وابن الوزير الفلانى اللى مكنش نافع وماشى بالعافية فى التعليم مدير شئون الدولة لمش عارفة اية

وحرام كمان لما يجو ينيلوها ويخصخصو التعليم عشان يدارو على وكستهم وغلطهم الاول فى فتح التعليم على البحرى وانخفاض مجموع الالتحاق بالثانوى العام تبقى انت قاعد فى الديسك جايب270 وصحابك جنبك جايب 190

اكيد لازم نتفرس من حاجات كتير

ومش غلطان ولا حد يلومك لما تهج من البلد بطريقة شرعية او غير شرعية

ومتزعلوش لما يجى اليوم اللى متلقوش فيه مهندس مدنى واحد فى مصر بعد قلة عدد المهندسين الملحوظة اللى لو استمرت على كدة مصر مش هيبقى فيها مهندسين متزعلوش لما يهجو

اصل الاوزعة احمد عز بيستعبط ويرفع سعر الحديد وينزلو بمزاجه

ولما مصر ميبقاش فيها بنا وتعمير

ابقو خلو مصر تتقدم بينا بقة

والله ليحطو الاعلان دة فى دولاب الذكريات

فى خلال سنين معدودة اهل مصر هسيبوها وتتعرض للبيع فى مزاد علنى

والا اونة الا دوا الا تريا

مصر بتتباع يا رجالة

مصر بالطريقة دى لايمكن تتقدم بينا

وساعتها هلخص الكلام دة كله فى كلمتين

انى يا مصر بعشق ترابك

لكن ترابك دخل فى عينى

وعماها ومعنتش شايفة جمالك فين

فى الغش 7 فوايد_مش بتاعى

فوائد الغش في الامتحان
أولا : يعمل الغش على تقوية روح الصداقه و التعاون بين الطلبة ودعم روابط المودة
ثانيا : ترسيخ مبدأ حسن الجوار
ثالثا : تقدم للمراقب خدمة جليلة الذى سينشغل بما تفعله بدلا من الإكتئاب والملل الذى قد يصيبه من جراء جلوسه بلا عمل طوال مدة الإمتحان
رابعا : سيتيح لك الغش إظهار روح التضحية إذ سيتمكن زملاؤك من الغش دون أية مخاطرة لأن المراقب سيكون مشغولا بما تفعله
خامسا : ستتمكن من التعرف على المسئولين عن لجنة الإمتحان مثل مراقب الدور وربما رئيس اللجنة وبذلك ستصبح من الشخصيات المشهورة
اللامعة
سادسا : سينتهى الأمر غالبا بسحب ورقة الإجابة وبالتالى تعود إلى المنزل قبل باقى زملائك بدلا من الجلوس فى مكانك بلا أية فائدة
سابعا : إذا كنت سعيد الحظ قد تحرم من دخول باقى الإمتحانات وبالتالى ستتمكن من الإستمتاع بالإجازة الصيفية مبكرا

حكمة اليوم: الناس بتجيب للواحد الهم_مش بتاعى

ضحكت فقالوا ألا تحتشم .... بكيت فقالوا ألا تبتسم .... بسمت فقالوا يرائى بها ....عبست فقالوا بدا ما كتم .....صمت فقالوا كليل اللسان ......نطقت فقالوا كثير الكلام.....حلمت فقالوا صنيع الجبان .... ولو كان مقتدرا لانتقم.....بسلت فقالوا لطيش به.... وما كان مجترئا لو حكم....يقولون شذ اذا قلت لا..... وإمعه حين وافقتهم ...فأيقنت انى مهما اردت رضا الناس ....لابد من ان اذم فلا رضا الا رضا الله ورضا الناس عنى اذاَ لا يهم

رحلة العذاب الى مكان اسمو شبين الكوم_الجزء3_شوفت الموت بعينى

اشهد ان لا اله الا الله وان محمد رسول الله
اشهد ان لا اله الا الله وان محمد رسول الله
اشهد ان لا اله الا الله وان محمد رسول الله
انا كررت الشهادتين الف مرة لما حسيت انى كنت هموت
هحكى ليكم الموضوع من الاول
انا كنت رايحة شبين الكوم الصبح وكالعادة مرواحى لشبين الكوم دايما فيه مشاكل ودايما روزى معاياوحصلتلى مشكلة زى اللى قبلها واللى قبل قبلها
الحمد لله على كل حال
بس مش لاقيه كلام اوصف بيه مدى بشاعة الاحساس بالخوف اللى كنت حساه
ركبت الصبح الميكروباصات الصغيرة بتاعة شبين اللى حكيت ليكم عنها
للا سف ركبت ميكروباص حالته مش اوى
بس والله السواق كان كبير فوق ال30 سنة انا مكررتش غلطى تانى
ومشى بينا برضة من على طريق جنزور
مش عارفة لية دايما الطريق دة مليش حظ معاه
المهم الميكروباص فضل ماشى كويس لحد ما حصلت الحادثة
المفروض انه فى الطريق فى كوبرى بيعدى من فوق مصرف لازم نعدى من علية عشان نوصل لشبين
وكانت المشكلة الميكروباص مفيهوش فرامل والدليكسيون مش بيحود لا يمين ولا شمال وباب الميكروباص مش بيقفل كويس
الراجل محودش من على الكوبرى لان الدليكسيون عطل
جه يفرمل مفيش فرامل
راحت العربية ماشية طوالى لحد ما نزلت فى غيط وماشية بسرعة رهيبة لانها خدت اندفاع لما نزلت الغيط اللى هو اقل من مستوى ارتفاع الطريق
وكنا على وشك الموت غرقا فى المصرف وكانت العربية فعلا مالت ناحية المصرف
ستر ربنا جت طوبة صغيرة عوجت العربية الناحية التانية
راحت العربية ميلت على الجنب التانى وهو اترزعت على الارض وبردة مش عاوزة تقف
والرجالة فى العربية بيصرخوا
وانا كنت بقول للسواق وقف العربية دى ضحى بعمرك لوحدك
وكأنه مثلا نفسه يموتنا
بس اهو كلام لحظة انفعال
والعربية ماشية بسرعة فى واحد وقع من الباب او رما نفسه الله اعلم
منظر ينشف الدم اصلا اكتر ما احنا خايفين
وانا خلاص بتشاهد على روحى وزعلانة انى هموت مش متوضية ولا مصلية
وصحيح اللى بيبقى على وشك الموت بتيجى على باله الف حاجة
جه فى بالى انى امسك الشنطة اوى عشان الناس تفتحها لما اموت وتبلغ اهلى ويتعرفو على جثتى
جه فى بالى الموبايل بتاعى اللى اول نمرة فيه متسجله باسم(فى حالة الطوارئ لى) ومتسجلة بنمرة البيت عشان لو جرالى حاجة لا سمح الله

جه فى بالى ان مش عاوزة اموت غرقانة فى مصرف

صحيح محدش بيختار يموت ازاى

بس اهو هى جت فى بالى

كان اهو لو فكرت انى هموت على البر على الارض فى الغيط
جه فى بالى الكلية
جه فى بالى حسابى من ربنا لما اموت
وجه فى بالى خطيبى
واحنا فى العربية عنيا دمعت
وبصيت للدبلة وحطيتها فى بقة بصباعى كأنى باكلها
كل دى حاجات حصلت فى اقل من دقيقتين
سبحان الله
مكتوبلى اعيش
فى وسط الغيط الفلاح صاحب الغيط عامل عشة خوص عشان البهايم تتحامى من الشمس فيها
وساندها بطوب كبير ودبش وظلط
ايوة بالظبط
اللى وقف العربية عشة البهايم والطوب والظلط والدبش
حمدت ربنا وشكرته انى لسة عايشة
واتشاهدت تانى كتير اوى
نزلت اعصابى سايبة
بس تمالكت وقعدت افكر هعمل اية وانا على الطريق المهجور دة
وانا على بعد18 كيلو من شبين المرة دى مش 3 كيلو زى اللى مشتهم قبل كدة لما الميكروباص اياه عطل
وعلى بعد3كيلو من طنطا
ومش عارفة حتى المرة دى الطريق منين
وطبعا روزى منهارة انهيار تام وتقريبا انا كنت ساحبها فى ايدى زى عيل صغير
لا بتتكلم ولا سمعانى
اه بالظبط حاله صدمة عصبية
وفجأة يظهر بين الغيطان تاكسى من طنطا داخل طنطا
سواق التاكس الله يكرمه وقف عشان يشوف اية البنات اللى ماشية لوحدها دى فى طريق زى دة وخصوصا ان كل الرجالة اللى كانو فى العربية دى خدو عربية نص نقل ومشيو وسابونا
ركبنا معاه وروحنا طنطا وركبنا عربية لشبين تانى عشان نروح لان مرواحنا لشبين كان لا يمكن باى شكل من الاشكال يتأجل لحظة
روزى اول ما ركبنا التاكس فضلت متنحة
ونطقت بعدها بربع ساعة
وقعدت تعيط وهى بتمسك فيا وخايفة
ولما ركبنا عربية ميكروباص عشان نروح شبين فضلت مش بتنطق بردة
لكن لما وصلنا شبين وقابلنا الناس اللى كانت مستنيانا
اغمى عليها خضتنى اوى عليها
اصلى بجد بحبها
واعرفها من زمان ومش عندى استعداد اخسرها
بس يارب هى متتنططش عليا بعد الكلمتين دول
واحنا راجعين من شبين كنت بضحك وبسمع اغانى وبالصدفى ركبت فى نفس الميكروباص اللى وصلنى شبين الصبح
وعم رجب السواق سألته السواق بتاع الحادثة عمل اية ورحتولو بعد ما بلغتكم فى الموقف ولا لا
قال ان الموقف مش عارف مين السواق دة اصلا عشان يروحو يساعدوه
ودى تانى مرة اركب مع سواق اى كلام
احمينى يا رب من سواقين شبين
والحمد لله على كل حال
انتظر تعليقاتكم

ادهم صبرى_مش بتاعى

أدهم صبرى ضابط مخابرات مصرى جامد، داخل ع الستين من عمره، يرمز له بالرمز ب-516 ، حرف الباء يعنى أنه من بولاق، أما الرقم 516 فده رقم الأتوبيس اللى بيركبه عشان يوصل محطة البحوث ومنها يوصل لرمسيس يغير المترو عشان ينزل محطة القبة بتاعة المخابرات.هذا لأن أدهم رجل من نوع خاص حيث أنه يجيد قيادة كل أنواع المواصلات من الطائرات والغواصات والسوبرجيت حتى التوك توك،ويجيد استخدام جميع أنواع الأسلحة من المسدس وبمب العيد حتى القنابل النووية والهيدروجينية، ويجيد 66 لغة بالصلا ع النبى وفيه لغتين اتعلمهم وهوه نايم،ويجيد جميع أنواع التنكر، وجميع أنواع القتال والألعاب من التايكوندو وحتى عريس وعروسةلقد أجمع الكل ومنهم أنا أنه من المستحيل وربنا أن يجيد رجل واحد فى عمر جدى كل هذه المهارات ولذلك استحق هذا اللقب .. رجل المستحيل*************المغامرة رقم 65468اختطاف محسن ازاى الكلام ده؟؟جلس مدير المخابرات الجديد على مكتبه وهو يتذكر ماحدث حتى الآن فى هذا الأمر الصعب الذى تمر به مصر وما حدث من أدهم (لمزيد من التفاصيل راجع العدد السابق65467 الجزء التاسع من المغامرة بعنوان"قال عايزين يخطفوا محسن")وبعد قليل طرق أدهم الباب فأذن له بالدخول واستنشق بعض الأكسجين من الهواء فالإنسان لابد أن يستنشق الأكسجين حقيقة علميةوقال لأدهم الأمر اتأزم جدا يا ب-516،نص محافظات مصر مش لاقية تشرب مية والناس خرجت بالجراكن وعاملين ثورة اسمها ثورة الخراطيم، كل واحد جاى بالخرطوم وهيقطعنا.. والقيادة العليا بتشك فى إن ده ملعوب من المخابرات المعادية الإسـ...(لا لا مش الإسرائيلية) وكمان التقارير بتقول ان سونيا جراهام هنايغضب أدهم ويقول يبقى جه الوقت اللى هاقدر آخد ابنى الرضيع منها، يرد المدير رضيع إيه يا أدهم؟؟ ابنك زمانه قدى دلوقتى .. دانت سايبه فى العدد 100 ،وبعدين هما عملوا حاجة عشان انت اللى تقوم بالعملية تحديدا..يرد أدهم عااااارف عاااارف .. أكيد خطفوا قدرى .. يافندم الراجل ده اتخطف أكتر ما زور جوازات .. يرد المدير دى تذكرة الطيارة اللى هتسافر للمنصورة بعد 3 ثوانى عشان مفيش مية هناك فى نص المراكز..الحق غير هدومك وزور قرايبك ع السريع والحق الطيارة.. أخذ أدهم التذاكر وهو ينظر إليه جامدجامدجامدجامد************!!ينفع كده؟هبط أدهم من الطائرة فى المنصورة متنكرا فى شكل طفل فى رابعة إبتدائى وأشار إلى توك توك وهو يلاحظ السيارات التى تراقبه وفهم فورا بذكائه ازاى العصابة عرفته رغم التنكر فقد أخطأ وقال لسواق التاكسى أحلى صباح فعرفوا علطول انه أدهم عشان قال حرفين الألف والصاد المشهور بيهم..المهم رمى أدهم سواق التوك توك وتسلم مقعد القيادة وتذكر كيف أن أبوه فى الخمسينيات علمه كيف يقود التوك توك عشان يبقى أحسن ظابط مخابرات، انحرف أدهم فى حتة ضلمة وانحرفت العصابة وظهر أدهم للعصابة فخرج من السيارة 100 شخص مسلحين ولكن أدهم أخرج مسدسه أبو 6 طلقات وضرب رشاشاتهم كلهم من غير ما يجرح واحد فيهم وبعدين للأسف المسدس معدش فيه رصاص ولكن أدهم رجل المواقف الصعبة دور الضرب فى الرجالة .. ففقد 65 واحد الوعى ولكن التانين فهموا الخدعة فعملوا دايرة حول أدهم ولكن أدهم طار فى الجو ونزل عليهم كلهم .. وفى لحظة وصلت إمدادات العدو كمان200 واحد .. ولكن أدهم ضربهم كلهم برضه ووصلت الإمدادات التانية حوالى 500 واحد كمان ولكن الكثرة تغلب الشجاعة .. يعنى حوالى 800 واحد على واحد كتير برضهوفقد أدهم الوعى أمام عدوه اللدودالفظيع الشنيع المريع************والله ما يحصل افاق أدهم فوجد نفسه فى مخزن وبجانبه المحروس قدرى كالعادة مربوط..وأمامهما سونيا جراهام ست زى القمر فقال لها أدهم إيه الحلاوة دى يا سونيا؟؟ انت كل ما تكبرى تحلوى؟؟ ترد سونيا مش أحسن منك ياللى مش بتكبر أصلا!! يتمتم أدهم ياللنسااااءويسألها: ليه انتوا قطعتوا المية عن نص البلد والناس مش لاقية تشرب وبتشرب مية المجارى والناس مش عارفه تغسل وبيغسلوا هدومهم فى الترعة؟؟تقول سونيا عشان الشعب يفتكر ظلما ان الحكومة بتاعتكم هيه اللى عاملة كده؟أدهم بفضول :يعنى بجد والله الحكومة مالهاش ذنب؟ترد سونيا : لا طبعا .. حكومتكم أحسن حكومة دلوقتى ..الشباب كلهم بيشتغلوا.. الجنيه بقى أغلى م الدولار .. الأسعار نزلت ..الانترنت بقى ببلاش فى البيوت.. ما فيش حاجة بتتباع فى البلد.. بنك القاهرة ما اتباعش ولا عمر افندى..الفضيلة انتشرت فى البلد ولغوا كل القنوات اللى بتتحدى الملل.. المية واصلة للبلد كلها والمواسير بقالها 200 سنة عشان المحافظة ع التراث.. انتوا اللى شعب غلباوى غلباوى غلباوى************ما تلمى نفسك بقى قطع أدهم قيوده فجأة وماتسألش ازاى (آه نسينا نقول فى المقدمة انه يجيد التخلص من كل القيود فى الدنيا)وصفع سونيا جامد يعنى ولكن الحارس جه من وراه وضربه ولكن منى(اللى أصلا عندها كام وخمسين سنة) جت فجأة مش عارفين منين وضربت الحارس من وراه وأنقذت الموقف .. نظر أدهم فى عين منى وقال ما تجيبي أطة فا تبصله من فوق لتحت , فيقول لها تتجوزينى؟؟ ترد منى فى حياء: ماينفعش يا أدهم عشان أنا جسمى كله واوا .. يغضب أدهم ويخرج من المكان بعد أن حرر قدرى وهوه يغنى ليك الواوا ..بوس الواوا..خللى الواوا يصحوهو فى الطريق ينحرف الجميع إلى أقرب بيت ويطلب منه أدهم بعض الماء للشرب.. ولكن صاحب البيت الحاج بيومى يخرج بمقشة هوه وعياله ويحتجزون أدهم ورفاقه وهو يصرخ: زى ما العصابة خطفت محسن ابنى، أنا كمان هاخطفكم، وبعدين انتوا جايين تطلبوا مية ؟؟ هوه فيه مية فى البلد ياولاد الكلب..الكلب..الكلب..الكلب انتهى الجزء التاسع العدد القادم(لسة خاطفين محسن)كيف يخرج أدهم ورفاقه من بيت الحاج بيومى؟كيف يستطيع أدهم بعد كل هذه الصعاب أن يحصل على كوز مية عشان يشرب ؟ هل يستطيع أدهم أن يحرر محسن ابن الحاج بيومى وللا هيسيبه يتحرق؟ هل يستطيع أدهم أن يوضح الموقف للرأى العام وهو أن حكومتنا زى الفل ودايما الغلط على الأعداء؟سيب اللى ف إيدك .. وقاتل بإيدك ورجلك وكبدك مع رجل المستحيل

والله بحبها

بناءا على زن الجماهير على ودانى والمقصود بالجماهير هنا كل اصحابى اللى فتحوا البلوج وبعتولى على ايميلى عشان يعرفو اية اللى حصل مع استاذة امل
الموضوع زى ما قلت قبل كدة تافه جدا
كل الحكاية انى سالتها:حضرتك بستخدمى النت
قالتلى:اه
فعرضت عليها تاخد عنوان البلوج بتاعى عشان خاطر تشوفه ويشرفنى انى اعرف رايها اية
المهم مفيش ثانية بطلع قلم من جيبى عشان اكتب البلوج لقيتها راحت منفضالى وماشية
يرضيكم كدة؟
وكان معايا اصحابى قالولى هى بتعمل معاكى كدة لية واتحرجت اوى هيجى واحد يقولى وانتى زعلتى لية وكتبتى البوست بتاع مقلب كبير خلا قفايا يقمر عيش؟ ماهو الواحد دة كل شوية ينط عليا زى البراشوت ويسألنى وساعتها هقوله
انتو عارفين انا زعلت لية وجيت بعصبية وكتبت البوست بتاع مقلب كبير خلا قفايا يقمر عيش
عشان بحبها
ايوة عشان بحبها
ولو مكنتش بحبها كنت هزعل لية
الواحد بيزعل من الناس اللى بيحبهم واللى عنده عشم فيهم انما لو انا مش بحبها مزعلش منها والموضوع ميجيش على بالى اصلا
دة انا من كتر كلامى عنها ماما وعاوزة تشوفلها عريس اصل ماما عاملة فيها خاطبة اليومين دول بعدما وفقت 3000 راس فى الحلال
ولا انتو اية رايكم يا اعزائى البلوجرز ويا زوار بلوجى الغالى
انتظر تعليقاتكم

رحلة العذاب الى مكان اسمو شبين الكوم_الجزء الثانى

اذا كنت بتروح شبين الكوم كتير اوعى يوزك شيطانك انك تركب مع سواق صغير فى السن كانت دى حكمة اليوم وهى مقدمة للى هحكيه ليكم عن عن احدى حلقات عذابى فى مسلسل "عذابى فى شبين الكوم"بطولتى واخراجى وانتاجىهههههههفى يوم عادى جدا زى اليوم الاولانى اياه بردو والشمس طالعة والعصافير بتزقزق مش هطول عليكم نويت اروح شبين الكوم لظروف طارئة جدا وهامة جدا جدا جدا وحط تحت مهمة دى خطين .قومت ركبت عربيات شبين اللى انتو عارفينها طبعا بعد ما صاحبتى العزيزه روزى اخرتنى على المشوار وفضلت مستنياها ساعة الا ربع فى مطار شبين .....اقصد موقف شبين وركبنا العربية وسبحان الله متعرفش كانت عنينا فين مشفناش السواق اتارى السواق طلع عيل صغير تقريبا اصغر منى بكذة سنة ومن روزى كمان يعنى تقريبا مطلعش بطاقة المهم مشى بينا من على طريق جنزور واللى بيسافر شبين اكيد فاهم انا بتكلم على اية دة انا فرحت لما مشى من على الطريق دة عشان بياخد نص ساعة بس لشبين عشان مختصراليوم دة كان الاثنين 10\12\2007وليخلد فى ذاكرة التاريخ الى ابد الابدين وسيظل ذلك التاريخ محفور فى ذهنى طالما حييت(شوفتو الكلام الكبير دة)طريق جنزور واحنا ماشيين بيعدى على بلد اسمها نفيا انا طابعة مش متاكدة من الاسم ولا روزى كمان الجميل فى الموضوع فى اليوم دة كان يوم سوق الاتنين فى نفيا وما ادراك يعنى اية سوق الاتنين فى نفياوزحمة يا دنيا زحمة وحمة وتاهو الحبايب زحمة ولاعدش رحمة مولد وصاحبه غايب والله صدق الفنان الكبير عدوية لما قالهاوقفنا تقريبا نص ساعة فى الطريق فى السوق وحالة المرور فى شلل تام الطريق جايب عربيات من اربع اتجاهات وكلهم داخلين فى بعضواللى رايح فى وش اللى جاى بعربيتهوالست بتاعة البط واقفة تتخانق عشان البطة بتاعتها والبط يطير وحاجات بقة اية مقلكوش فى النص ساعة دى شفنا مهازل فى السوقولما الاتجاهات كلها دخلت فى بعضها عندها قام بعض الجنود البواسل من سواقين عربيات الخط بتاع شبين الكوم بالنزول من عربياتهم لحل المشكلة وتنفيذ حلم الطفولة لانهم كانو نفسهم يشتغلو فى المرور وبالفعل نجحت الفكرة وعدينا بالعربية وكتر خيرهم السواقين ولا وعملوها الرجالة ورفعو راس مصر بلدناالمهم مشينا بالعربية عشر دقايق وعدينا البلد اللى اسمها جنزور دى والسواق قابل سواقين فى الطريق قالوله متدخلش عشان فى ظباط قدام وهو مش معاه رخصة وهما عارفينيا نهار اسود!!!!!!!!!!وطب وانا هعمل اية انا وروزى ونسيت اقولكم ان كان فى واحدة صاحبتنا تالته معانا معادنا كان الساعة 9 والساعة دلوقت 10 واحنا موصلناش هنعمل اية طيب؟ببص حوليا لقيت غيطان كرنب على يمينى وترعة ميه على شمالى . يعنى ياما ترمى نفسك فى الترعة يا اما تدى ضهرك للترعة وتنزل من العربية وتاخدها مشى لاقرب مكان فيه مواصلات وهو قدام جامعة المنوفيةوبالفعل حدث ما كنتم تتوقعونه نزلنا مشينا جنب الغيطان والترعة على ايدك الشمال(متخيلين الموقف؟)وخدناها جرىىىىىىىىىىىىىىى مش عشان احنا مستعجلين احنا خلاص المشوار راح علينارغم انه كان مهم جدا جدا لكن لان المشى ى الطريق دة مرعب جدا جدا ومفيش عربيات كتير بتمشى فيه لانة مش طريق سريع ومفيش تجمعات سكانية ولا عمران زى ما قولتلكم الغيطان والترعة فقط ودى طبعا حاجة ترعب بالنسبة ل3 بنات ماشيين لوحدهم وقعدنا نجرى ونجرىوموتنا من الضحك ضحكنا ضحك هستيرى على منظرنا واحنا بنجرى ماهى اصلها هيست معانا خلاص ماشين فى مكان معرضين للسرقة والقتل والاغتصاب وكل اللى تتخيلوهواللى اظرف من كدة كمان بتوع عربيات النقل كانو بيبصو علينا ويضحكو واللى يقولنا اتفضاااااااااااال ! واحنا"نقولوهم شكرا اصلا الجرى رياضة ومفيد للصحة" وفترة الجرى على الطريق استغرقت حوالى ساعة الاربع او نص ساعة مش فاكرة بالظبط عشان نوصل لاقرب منطقة عمار بدل الطريق المهجور دة فى واحد هيجيى يسألنى طب والناس اللى فى العربية عملو اية؟ اصل الواحدة ده دايما بيسألنى كتيرهرد عليه واقول ان الرجالة اللى فى العربية كانو مستغربين ان تلات بنات زى الورد نازلين يجرو فى الطريق اللى مفيهوش صريخ ابن يومين دة وهما خايفين ينزلو اصلا(عشان تعرفو بس انى قلبى ميت)ههههههههههههههههههههههههههههههههههههههههههههههههههههواخر حاجة سمعتها قبل ما امشى انهم عاوزين السواق يرجع بيهم ميت موسى عشان يركبو اى مواصلة من هناك لكن السواق رفض وعشان تعرفو انى قدوة يقتدى بها بقية الركاب نزلو خدوها مشى على الطريق دة وفيه اللى جرى بردو عادى يعنى زيناماهو السواق رفض يروح بيهم ميت موسى ماهو اصله بردة زى ما قلتلكم حتة عيل!!!! حكمة اليوم: دة انا ممكن اركب مع عجلاتى يخلينى معاه اهاتى لكن لا يمكن اركب تانى مع ذلك الواد الصرماتى! وعجبىاللذيذ فى الموضوع ان هوهوز صاحبتى التانية قابلتنى فى شبين انا وروزى ودعت علينا ان العربية "تخيش فى زنارة" على غرار ما كنت اقوله للركاب فى اليوم السابقاهو كتر الدعاء على خلق الله طلع علياالعربيةاللى انا ركبتها وانا راجعو وقفت فى زناة والكوتش ضرب وحلفت ماهى ماشية من مكانها نزلنا فى وسط الطريق (مش طريق جنزور على فكرة دة طريق بابل)وقعدنا ندور على عربية والحمد لله لقينا عربية والناس وقفتها عشان نركب وعدنا سالمينبصراحة كان فعلا يوم غريب لكن كل ما افتكره اضحك

انتظر تعليقاتكم

رحلة العذاب الى مكان اسمو شبين الكوم_الجزء الاول

فى يوم عادى جدا من الايام العادية جدا رحنا نركب انا وصاحبتى هوهوز عشان نروح طنطا والوسيلة الافضل فى الحالة دى هى عربيات الميكروباصات الصغيرة
جت اول عربية ومعرفناش نركب لان كل الشباب والرجالة هجموا على العربية وركبم وسابوا البنات والسيدات واقفين
عمركم شوفتو جنتلة اكتر من كدة
المهم جت العربية التانية بردو معرفناش نركب فانا اتغظت جدا ورحت قايلالهم "تبا لكم" للناس اللى راكبين العربية عنها وراحت هوهوزفطسانة من الضحك والناس اللى قاعدين فى العربية سمعوا وضحكم هما كمان
ثم جاءت العربية التالتة وجينا نركب نفس الموال كل الرجالة والشباب ركبم والسيدات والبنات مركبوش
وكنا واقفين بقالنا حوالى ساعة الا ربع والشمس حامية ورجلينا وجعتنا
رحت متنرفزة اوى وقلتلهم "تبا لكم وربى لنا تصلون الى زنارة"_للى بيسافر شبين كتير اكيد عارف ان زنارة دى بلد بي طنطا وشبين فى نصف الطريق_ طبعا وعنها كله وشه احمر من الضحك اللى قاعد على الرصيف وهوهوز والناس اللى فى العربية وكله بيضحكو على اية دول؟
طب هوهوز بتضحك على اية طيب ؟ماهو دة العادى بتاعى انى بتريق على اى حاجة فى اى حاجة طول الوقت المفروض تكون اتعودت
ما علينا
ولما سمعونا 3 شباب من جنود مصر البواسل ضحكو ونزلو وركبونا مكانهم فى العربية
وانا من موقعى هذا احب اشكر الثلاث شباب دول واهنى ماما وباب وعمتو وخالتو وطنط هدى بالمولود الجديد واحب اسمع اغنية سيد الحبايب يا حنانا انت
ههههههههههههههههه
اقصد ميرسى ليكم يا رجالة
هما دول شباب مصر اللى رافيعن راسنا
والله وعملوها الرجالة ورفعوا راس مصر بلدنا
انتظر تعليقاتكم

مقلب كبير....خلا قفايا يقمر عيش

اسحب كلامى عن المعسول عن الاستاذة امل يظهر انها حلوة ولذيذة بس من بعيد لبعيد
لان انا موتى وسمى ان حد يحلقلى وانا بصراحة اتحلقلى جامد اووووووووووووووى
مش عاوزة احكى التفاصيل عشان متفرسش اكتر واحس انى بقيت مهزقة وكل الناس تعرف الموضوع
مع انه هايف اوى
بس انا اضايقت
سلام

وما الدنيا الا سكشن كبير

فاكرين لما قولتلكم انى هحكى لكم عن الاستاذة امل المعيدة عندنا
افتكرت انى مخنوقة من الكلية كلها عشان كدة هكلمك عن جامعتى ودكاترتى وبصو بقة .....اللى يطلع منى وخلاص
تحياتى للى هيستحمل ويجى على نفسه ويقرا
اساتذة الجامعة والمعيدين.. مشكلة الطلبة كلها المشكلة بقة فى ان كل واحد خد الدكتوراه عاملنا فيها دكتور فى حاجة محدش واخد باله منها مع احترامى لشهادته وخبرته العظيمة والمجهود المضنى اللى قام به عشان يوصل للدرجة الادبيه اللى هوفيها دلوقتى لكن مش كلهم بيعرفو يشرحو ويوصلو المعلومة للطالب وفى دكتور مثلا تلاقيه كل سنة عمال يشرح مادة ملهاش ادنى علاقة بالمادة اللى قبلها واكنة كشكول او اجنده او المعلم بتاع كله وياترى بقة الدكتور دة الدكتواره بتاعتة كانت فى اية بالظبط؟ علم الاجندات والكشاكيل لو انا غلطانى ارجوكم حد يقومنى ويفهمنى اذا كنت غلطانة بس نصيحة يعنى اذا قفشت مع او على دكتور ما هي الوسيلة للتعبير عن رفضك للظلم في هذه الحالة .....؟؟
رايي الشخصي ...انه لا يصح نقد الدكتور علانية ...او رفض طلباته علنا ومطابلته بالحق علنا الا في حالات محددة
- انه يأمرني بشئ فيه معصية -
انه يخصني انا لالذات بانتقاص من كرامتي دون مبرر مقبول ودون حق
...وفي هذه الحالة يكون الاعتراض بأسلوب مهذب-
انه يبالغ في الاهانة الي الحد الذي لا يمكن التغاضي عنه او لا يمكن ان نجعل الموقف يمر سريعا
-استنفاذ جميع وسائل النصح السري ثم بعد ذلك ...يكون توجيه النقد للدكتور باسلوب مهذب علي انفراد وتوضيح اوجه الاعتراض لان الاعتراض علي الملا يزيد الدكتور عنادا واصرارا علي موقفه ورايي انه الجدهنة ليست في معارضة الدكتور جهارا نهارا والجدعنة ليست كذلك طبعا في عمل القفشات طول السكشن والخروج عن النظام عشان اضحك زمايلي وابقي جدع ومبقاش عيل خنيق بينفذ كل طلبات الدكتورة للاسف في ناس لسه بتعتبر ان هي دي الجدعنة
المصيبة الكبيرة او البلوة الكبيرة مش فى الدكاترة اهم نقدر نستحملهم ووالله بردة مش كلهم وحشين بس بعضهم له افعال مستفزة تجنن الطلبه المهم المصيبة الكبيرة فى اية بقة؟
فى المعيدين برافو عليكم ايوة كدة خليكم صاحيين معايا
المعيدين واااااااااااااااااااااااااه منهم عندنا بالذات والله لولا الاستاذة امل ماكنت طقت نفسى فى الدراسة هى اللى محليه علينا الدراسة
اما فى معيدة مثلا مهزوزه جدا ومعندهاش ادنى ثقة فى شخصيتها ومطلعاه على عنينا لانها طول الوقت تقول مش عاوزة اسمع صوت واحيانا احنا بنكون زهقنا منها لدرجة اننا بلمنا وتنحنا وزهقنا من الكلام وعاوزين السكشن يخلص ونبقة قاعدين هس هس ودى تقول انا سامعة همس والله ربنا يسامحها بوظت دماغ جيل من خيرة شباب مصر
والتانية يلا سلام عليها وعلى دماغها الكبيرة بتدخل تملينا بالنص حصة املاء مش سكشن والله فاهمين اوك مش فاهمين سورى يعنى طز واخرتها كمان عاوزة تسألنا فى اللى احنا خدناه هو احنا خدنا اية اصلا يلا ربنا يسامحها
اما بقة المعيد التالت الله عليه بجد والله انا اول سكشن حضرتة مكنتش عارفة دى مادة اية اصلا واصحابى قالولى على اسم المادة دى بعدين بيرغى فى كلام وتفاصيل ملهاش ادنى علاقة بالمادة وحاجات ملهاش لازمة اصلا نفسى اخلص كلية بقة بدون اعادات ادعولى يا جماعة بجد اسألكم الدعاءأأأأأأأأأأأأأأه من كليتنا واه بجد
وما الدنيا الا سكشن كبير

بين المسلم والمسيحى.....نسيو انهم انسان

رغى ودش وكلام كتير فى موضوع المسلم والمسيحى
طول عمرنا مسلمين ومسيحين فى مصر جسد واحد وبلد واحد اية اللى جرى ؟ وبتتقال كلمه مسيحى على استحياء كدة واكنها كلمة وعيب ونوطى صوتنا ومنقلهاش قدام واحد مسيحى واكنها حاجة بيخجل هو منها او بتجرح مشاعره مع انه عادى يعنى انا واصحابى المسيحين بنتكلم بدون حدود او خطوط حمرا زى انا وكريستين ويوستينا اصحابى اللى معايا
اللى خلانى اقول كدة الجو اللى فى الجامعة من اول ما تدخل لحد ما تطلع اول ما يشوفو واحدة بشعرها دى شكلها كدة مسيحية ويبدأو يبعدو عن صدقاتها وتبقى مش اكتر من سلامو عليكم
ولما تيجى تصاحب او تتعرف على ناس جداد اول ما تدخل لو اتعرفت على مسيحين تبقى انت كمسلم غريب وشاذ عن القاعدة ازاى تصاحبى مسيحين طب ما تصاحبى المسلمين اولى منهم مسلم اية ومسيحى ايه بس هو انا لما بصاحب حد لازم يكون موافقنى فى كل ارائى ومعتقداتى عادى يعنى بلاش النظرة العنصرية دى بس اصل الموضوع زاد عن حدة معايا اليومين دول وبما ان انا منتشرة فى الجامعة بالطول والعرض ومش برضى ازعل حد لما يجى يكلمنى فكل من هب ودب بيكلمنى وانا بحب كدة اصلا _انى اكون جماهيرية_ لقيت اكتر من واحدة بيعلقو على كونى بكلم البنات المسيحيات وبصاحبهم فى الجامعة واكنى اول واحدة اصاحب مسيحيات او اول مره هما يشوفو مسيحين
وواحدة ساذجة بتقولى انا مش بحبهم دة انا مش بطيقهم
فسألتها ايه السبب ؟
زى الجزمة معرفتش ترد
عارفين لية ؟ لان مفيش سبب اصلا وعلى فكره من باب العلم بالشئ دول بشر عاديين زينا والله وبياكلو وبيشربو وبيحبو وبيكرهو ومصريين بردو ولا بلاش دى عشان اصلا الوطنية وحب مصر انعدم فى كل الناس اليومين دول اصلا وبقت كلمة تضحك
دايما اللى بيتكلمو على المسيحين بالطريقة اللى ساذجين مفيش سبب لكلامهم دة بالعكس دة انا بحس انهم لذاذ وبيحبو يثبتو نفسهم ومتنسوش انهم 15% بس من البلد عشان كدة بيسعو دايما لاثبات جدارتهم ودى اكتر حاجة بتعجبنى فيهم انهم بيحاولو يعمو عيون الناس عن نظرتهم العنصرية وبيخلوهم يبصو لحاجات اهم
عارفين ان مرة واحدة بتتحدانى انها تعرف المسيحيى اول ما تشوفو من (انفه) فانا طبعا احب ارخم وريتها واحدة وقولتلها دى مسيحية ولا لا
قالتلى مسيحية عشان (انفها) معقوفة الهيئة
على فكرة البنت اللى هى قالت عليها مسيحية دى كانت مسلمة وانا عرفاها بس هى مش تعرفنى يا خبيتك ياختى ياللى عاملا فيها برم وواد جامد يعنى وقعتى فى اول اختبار

طب عارفين انا السنة اللى فاتت كنت لسة محولة من الجامعة اللى كنت فيها قبل كدة للجامعة اللى انا فيها دلوقت دى وطبعا فاتنى كتير
سألت اكتر من واحدة على السكاشن ولا واحدة عبرتنى وكانت مادة (فن اتصال بالجماهير) عارفين مين اللى ادانى السكاشن _كريستين _صاحبتى بنوتة زى العسل هبلة حبتين بس عادى نفوت دى
والسنة دى بردة فاتنى سكاشن مادة معيدة رخمممممة موووووووت طبعا مش استاذة امل لانى بحبها هكتبلكم عنها بعدين هى كمان زى العسل وانا بحبها
المهم تفتكرو بعد ما سألت فلانة وعلانة عن السكاشن ومحدش عبرنى كلاكيت تانى مرة تفتكرو مين اللى ادانى السكاشن؟
يوستينا_ صاحبتى التانية بردة والله بت عسولة بس هى مش هبلة اوى زى كريستين سورى يا كريستين انتى عسل بردة خليكى انتى الكبيرة ومتفهمنيش غلط
شوفتو بقة مين اللى دايما بينفعنى وبيكتبلى اسمى فى السكاشن لما اكون مش موجودة طبعا ما عدا سكشن الاستاذة امل لانى مش بفوت فيه مرة لانى بستفاد بجد وعلى فكرة بردة عشان مبقاش ناكرة للجميل نور صاحبتى الجديدة بس اصلى مجبتش سيرتها لانها مسلمه ملهاش دعوة بالموضوع دة طالع عينها معايا فى المذاكرة والكتب والتلخيص وبتكتب اسمى فى السكاشن بردة
هههههههههه
عارفين اللى هيفرق بين مسلم ومسيحى بعد كدة ويجي يتكلم فى الموضوع دة فى وشى ملوش عندى غير الكوتشى الاديداس
فى انتظار تعليقكم

اضحك .......الصورة تطلع حلوة . كل فتره انشاء الله هقدم شوية صور طريفة وتحتها تعليق من عندى وانتم تبعتم تقولو رايكم وتبعتولى تعليقات واطرفهم سوف ينشر

ياسيدى ولا يهمك التخن عز على الاقل عشان الناس تقول نفسها اتفتحت فى بيت جوزها امال عاوزها تخس يعنى ويقولو انك انت اللى جايبلها الكافية ومنكد عليها عشان كدة يا عينى اتعدمت وبقة وزنها 50 كيلو !!؟صدقنى كدة احسن
الستات بتوع زمان فى زمن ماقبل الحرية فى زمن ما قبل قاسم امين

مستقبل السيدات مع الرجال بعد عصر حرية المرأة والتى يطالب فيه الرجال بحقوقهم
لا حول ولا قوة الا بالله انتحرت بنانا هانم كريمة السيد ابو الموز بعد ما رفض ابوها السيد ابو الموز العريس اللى كان متقدملها واللى كانت بتحبه ونسألكم الفاتحة ولا يجوز عليها الا الرحمة الله يرحمها كانت بنت حلال والله

اهم درس لازم تتعلمو فى الحياه انك متخونش صاحبك ولا تخسره عشان واحدة ولا تخسرى صاحبتك عشان واحد محدش يستاهل وقدامكم مثال اهم مش قادرين يستنو لحد يا يوزعو كيس الجوافة
صدق اللى قال الميه تروى العطشان وتطفى نار الجربان
الارهاب لا دين له
اوعى يا واد لحسن اغزك مخليش الدكتور يعرف يخيط فيك غرزه واحدة

قررت الحكومة الغاء نظام عربات المترو والتى تسببت اكثر من مرة فى حوادث بسبب انفصالها عن بعضها فى حوادث شنيعة وقرروا وضع نظام الجمال زى مانتو شايفين كدة لانها منظمة وبتمشى فى طوابير وانتو عارفين حكومتنا تموووووووت فى الطوابير وكمان لان الجمال مش كل يوم والتانى هتدوس حد من الاطفال او غيرهم زى ما المترو كان بيعمل
وقال احد المسؤلين: النظام دة فل الفل بالصلاه عالنبى واللى مش عاجبوه يخبط دماغه فى اتخن حيط وليس لكم حق الاعتراض بقة لا مؤاخذة فى دولتنا الديمقراطية
المطربة هيفاء فى حوار صحفى سنة 2090
هيفاء:انا لسة مصرة انى من افضل الفنانات اللى ظهرت على الساحة الغنائية وان صوتى بس هو اللى ساعدنى وانا معتمدش على جسمى خالص بالعكس كان كل تركيزى على صوتى وهو اللى وصلنى
ولما سألناها:انتى مش شايفة انك كبرتى على المكياج الكتير دة ؟
قالت طول مانا حلوة وجميلة زى مانا احط مكياج زى منا عاوزة وافرح بنفسى وبشبابى واغنى انا هيفا انا
هى دى اخرتها اخرة الصياعة واللف ورا القطط ولعب ببنات القطط المحترمة ولاد الناس ربنا خلاك عبره لمن يعتبر
قرر السيد الرئيس رئيس جمهوريتنا (صفار البيض) كوكو ابو ريشه وحرمه حضور مؤتمر (مستقبل كتاكيتنا الصغار...بين الحاضر والمستقبل) وكانت هذه صور من واقع المؤتمر ونرى فيه مدى حبه واهتمامه بكتاكيت بلدنا
والله عمار يا بلدى....عمار يابلدى يا صفار البيض رئيس دولتك مهتم بكتاكيتك مش زى الدول التانيه رئيسها بينفض للكتاكيت الصغار يا بختنا بيك يا ريسنا
الحدق يفهم....!!!!!

خبر حقيقى, ومحبط... وليس اشاعة
الاسبوع الماضى تم عقد قران المطربة العظيمة هيفاء وهبى على الاخ اللى قدامكم دة ولما عرفنا ان جوزها مش هيخليها تغنى تانى عملنا استطلاع رأى مع الشباب اللى قالو ان دة خبر محبط وقال احدهم: واتفرج .......أأأ اقصد اسمع مين من بعدك يا غالية

دمى اتحرق

فاكرين لما حصل موضوع البابا لما شتم فى الاسلام والمسلمين كان موضوع كبير طبعا انا بجد دمى اتحرق مووت ومكنتش طايقة كل مسيحين الغرب رغم انى عمرى فى حياتى ما فرقت بين مسلم ومسيحى وانا الوحيدة فى اصحابى اللى بصاحب مسيحين وكانو دايما اجدع ناس معايا فى السكاشن والمحاضرات واصحابى كانو بيقلولى انى حبيبة المسيحين ههههه المهم انا ايامها كتبت مقاله او يعنى تقدرو تقولو عليها مقاله قولت فيها كل اللى فى نفسى بس مكنتش درست صحافة ولا طريقة الكتابة ولا الكلام دة خالص كنت مبتدأه وفى ثانوى كمان هههههه كان دمى محروق بجد ممكن تقروها وتدونى رايكم بجد محتاجة اسمع رايكم
hello all
iam Maha
muslim girl from Egypt
I think everybody knows now what the Father of the Vatican had said in his speech. I will not talk a lot ,
I will tell you one of the Quran texts:
{In the name of Allah}
[ I do not worship what you worship. You have your religion, and I have my religion. ] Let me explain for the people that are not Muslims. That means that everybody has his own religion, and he/she is free to choose it.
Another Quran text:
{ In the name of Allah}
[ There is no force in choosing the religions. ]
What the Quran tell us, [no force] everybody is free. He/she must decide what he wants to be.
We are not terrorists like the media says, everywhere. Tell the kind of people , that have no idea about Islam. They try to confuse the ideas of Islam, and never let the people know what the truth is. They tell them about Sharia , and they make it something frightening, making the Muslims human without a heart and never feel .the media tell them, that we cut the thiefs hand off, and a lot of things like that. But they never tell them the good things about it. They talk about why the Muslim man is allowed to marry four women. They have no idea about that for sure. There is an answer for that, and a lot of other questions they have no idea about. They think that they know everything although they know nothing.
If somebody knocked at your door, and he came in, then he said to you go out of here. Will you leave or will you defend your house?
For sure, you will defend your house. But he will cry and say you are a terrorist , that is what's happening in Iraq, Palestine, and Lebanon. They want to shoot us, and kill our kids without saying any words. If we defend ourselves, we will be terrorists. The answer to the question is, by yourself , are the Muslims terrorists? We want to live in peace. We want the U.S.A to leave us alone. We want Israel to stop killing the Palestinian, and say "stop killing the Jews". We just want to live in peace, forever.
Does anybody know how to say hi, in the Islamic country? It is "elslamo alekm w rhmt allah w brkato", and the translation is "peace on you and the mercy of the god and his blessings". Imagine everyday you say, "peace.. peace ..peace", and the people say that you are terrorist. How come?
For that, people who say that the Islam spreaded, by the foil that's not true. If I'm a liar, then ask the people in the countries. The countries like Pakistan and Malysia, who forced them to be Muslims. The answer is nobody.
The Muslim merchants, where they sell the goods, for the people there. There good treating with the people, made the people began to ask about the religion of those merchants. A long story, they asked about that religion and they learned how to be Muslim, like those merchants.
I want somebody to tell me who forced all of the people to change their religion to be Muslim. In the 21st century, nobody can do that. If they read about Islam, and they are satisfied to be Muslims. In huge numbers, about 10,000 new Muslims every year. Who forced them? The answer is nobody.
The Muslims believe in all of the religions, and all of the messengers too. We believe in Jesus, Maria, and Moses too. And just to let you know, the messenger of Islam (Mohamed) in the past married woman called, Maria and she was a Christian. Anybody who says that we hate Christians are liars.
Please help in spreading the e-mail, send it to all the people in your list,
or just add at least 10 people. Just send it to all of the people you know, please.
If you want to know the truth from a Muslim girl, add me in your list. I promise to answer all of your questions that are on your mind to correct the wrong.
Written by: Maha Eldib

الاستفتاح_اصطبحنا وصبح الملك لله_يلا نرش مية يا بلية

السلام على اهل السلام

انا مها من مصر وبيقولو عليا روشة ودمى خفيف (مش انا اللى بقول والله ده الناس اللى حوليا)

فعشان كدة انا قررت انى هخلى البلوج دة روش ودمه خفيف فى مقتطفات حلوة ولذيذة انشاء الله تعجبكم

وكمان غير الروشنة لانى ساعات بتخنق من الكلمة دى هكتب هنا كل اللى نفسى فيه واى راى انا عاوزاه

وعلى سبيل العلم بالشئ القوانين والقواعد هنا على طريقتى انا ودى مملكتى انا وليس لكم حق الاعتراض فى مملكتى الديكتاتورية لانى ناوية استبد بتصرفاتى لكن على العموم مسموح ليكم بارسال تعليقات على البلوج هههههههههههههه
طريقتى مستفزة فى الكلام صح؟انا بس بهزر بخرج شوية من اللى جوايا من الضيق من الدكتاتورية واستبداد الرأى شوية من نفسى بقة وعلى العموم تحياتى للى هيستحملنى هينوبه فيا ثواب ويدخل الجنة:)