شوفتو حلقة وائل الابراشى مع البهائيين الموجودين فى مصر؟
عجبتنى
مبدئيا انا مش بهائية انا مسلمه سنية بقول اشهد ان لا اله الا الله وان محمد رسول الله
وكمان انا مش متحيزة للبهائيين
لكن الحلقة اللى انا شوفتها امبارح بليل وانا متكلفتة فى البطاطين وباكل شيبسى
وكنت متغدية حمام محشى وشبعانة ودفيانة وكل دة
كنت مع البهائيين فى طلباتهم
كان فى واحد بهائى عنده مشكلة انه عندو ولد وبنت توأم مش عارف يطلع ليهم شهادات ميلاد لمجرد انهم بهائيين
الحكومة مش عاوزة تعترف بيهم
مشكلتهم ظهرت من اول ما الحكومة قررت تعمل بطاقات الرقم القومى
رفضو يعملو ليهم بطاقات لكن اللى ليه واسطه عمل بطاقة
عاوزنهم يكتبو فى خانة الديانة مسلمين مثلا عشان يقبلو والبهائيين رفضوا قالو ان ده غش
وبصراحة دة اقتراح عبيط
لان ممكن واحد منهم يكون بهائى مكتوبله فى البطاقة مسلم يروح يتجوز مسلمة وهو اصلا بهائى
وكمان خانة الديانة فى مصر اربع خانات مسلم ومسيحى و يهودى و اخرى
متحطولهم اخرى وخلاص
البهائيين محدش سمع عنهم ولا عاوزين حد يعترف بيهم ولا هما عاوزين يضروا الاسلام ولا هما دودة تنخر فى عضد المسلمين زى ما الشيخ الخرفان دة قال
والا يبقى المسيحين واليهود المصريين كمان بيأذو الاسلام
وفى الاول والاخر هما مصريين واحنا اللى عملنا ليهم وزن وسمعنا الناس بدينهم
لو كانت الحكومة استمرت زى ما هى مستمرة فى اصدار بطاقاتهم وشهادات ميلادهم ووفاتهم مكنش حد سمع بيهم
لكن ازاى بقة نسيب الناس فى حالها؟
البهائية موجودة فى مصر منذ اكثر من 100 سنة وكان بيطلع ليهم بطاقات وشهادات وفاه وميلاد وكل حاجة كانت ماشية عادى ومحدش سمع عنهم
وكان فى دكتورة بهائية فى الحلقة بتقول ان الوضع خلاص اصبح لا يحتمل لان فى موظفين بهائيين كانو بيشتغلو فى الحكومة وكانت الحكومة بتستقطع جزء من رواتبهم عشان المعاش
ولما مات رفضو يعملو لزوجها شهادة وفاة ومعرفتش تعمل معاش
تعيش منين الست دى
وسيدة انجبت ومعرفتش تاخد اجازة وضع يعنى تروح وهى نفسه
اطفال وصلو لسن المدرسة مش عارفين يروحو مدارس لانهم ملهمش شهادات ميلاد
طب تخيلو ان الحاجات دى كلها بتحصل فى مصر بس البهائيه هى الديانة الاعم والمسلمين هما الاقلية
سيدة مسلمة مش عارفة تاخد معاش زوجها لمجرد انها مسلمة
سيدة مسلمة انجبت ولازم تروح الشغل وهى نفسه
اطفال مسلمين مش عارفين يلتحقو بالمدارس
اتضايقتو صح؟
يبقى لية نقبل على غيرنا اللى منقبلهوش على نفسنا
يعنى مصر بتعمل بطاقات لليهود المصريين اللى هما اعداء الاسلام رسمى ولا يؤمنوا بتاتا بسيدنا محمد ومش عاوزة تعمل بطاقات للبهائيين المصريين اللى بيقولو لا اله الا الله وبيؤمنو بسيدنا محمد مع بهاء الله اللى هما لا يفكرو بتاتا فى ايذاء الاسلام او المسلمين
واذا كانو بيقولو ان محمد مش اخر رسول المسيحين واليهود بيقولو انو مش رسول اصلا فبلاش نمسك فى حجة هتخلينا نعادى كل الديانات بسببها
ولا هما عشان اقليه يبقى ندوسهم
الاسلام كان اقليه وكل الديانات حاولت تدوسه
انا مش بقول اديهم فرصه ينشرو دينهم انا بس بقول مطالبهم شرعية ومن حقهم تنفيذها
طب عاملوهم معاملة اليهود طيب دة حتى متساوش باليهوووووود
حرام
والناس كانو صرحاء وواضحين قالو مش عاوزين حد يعترف بينا ولا احنا بنعمل دعوة لعقيدتنا بس اكتبولنا فى خانة الديانة (اخرى) وخلاص واحنا راضيين المهم تتطلعو البطاقات وشهادات الميلاد والوفاه
يا جماعة هما احرار فى الديانة اللى يختاروها ما يولعو بيها هما وبهاء بتاعهم ده
دى حاجة بينهم وبين ربنا
وازاى نقول انهم مرتدين
ارتدوا عن اية اصلا هما مش مسلمين خااااااااالص عشان يرتدو عن الاسلام
يا جماعة البهائيين ليهم مقابر خاصة الحكومة فى الماضى وهبتهم الارض دى عشان تبقى مدافن ليهم يعنى هما فعلا مننا واهلنا وناسنا ومش جداد فى البلد دى
وبعدين احنا دين تعب من الاضطهاد ايام الدعوة ودلوقت كمان
والرسول عليه الصلاة والسلام مكنش بيجبر حد على دين وكان بيسبهم براحتهم ويدفعهم الجزية وخلاص ليه احنا دلوقت نسينا ده وعاوزين البهائيين يطلعو بطاقات مسلمين
وبعدين الدستور نص على حرية العقيدة ولاهو نص على حرية اى عقيدة ماعدا البهائية؟
احنا بنرجع لورا ايام ابو جهل ولا بنمشى لقدام يا مسلمين يا مصريين
اه يا بلد
على العموم رايى انا قولتو وخلاص
شوفو اللينكات دى
لينك1
لينك2
كفاية عليكم كدة اللى عاوز فيديوهات تانى يدور بنفسه
انتظر تعليقاتكم
13 comments:
تحياتي
بداية طرحك جميل اوي للموضوع... انا شخصيا ضد خانة الديانه في البطاقة وشايف ان مفيش ليها أي لازمه أبدا ، ودا مش رأي بقوله عشان أنا ليا صديقه عزيزه بهائيه أنا بقوله لأني فعلا مش شايف ان فيه اصلا لازمه لخانة الديانه وشايف انها تكريس للعنصريه في دوله تدعي انها مدنيه .... بالمنسابه اليهود كديانه مش اعداء للاسلام لانها ديانه سماويه لكن الي بيعملوه ولاد الستين في سبعين هناك فلسطين يبقوا اعداء لكن اليهود المصريين مش اعداء مدام مش عملوا لينا حاجه .... ومينفعش نساويهم باليهود لأن اليهود على الأقل اصحاب كتاب سماوي لكن هما لأ .. المشكله ..لكن مش دي مشكلتي مهو لو الحكومه بنت الستين في سبعين الي هما 420 يسيبوا الناس في حالهم مش هيحصل الي بيحصل دا ... برضه ما علينا ...
نرجع بقى لأهم حاجه في الموضوع الي لازم اطرح عليها بعض التساؤلات يا ترى الحمام كان محشي ولا مش محشي ولو محشي كان محشي ايه رز ولا فريك وياترى الشيبسي كان بطعم ايه وعائلاي ولا صغير كل دي أسئله مهمه في الموضوع لأن مش معقوله تجوعينا كده وليكي زوار بيموتوا في الحمام المحشي والشيبسي ابو شطه ولمون وياترى كان فيه كوكا بعد الحمام ولا اكتفيتي بالشاي
على العموم بألف هنا وشفا والمره الي جايه تعملي حساب زورك
بالنسبه للمدونه كان فيها عطل من السيرفر لكن هي شغاله دلوقتي والحمد لله
يسعدني انك تحاولي تشرفيني فيها تاني
www.chabfares.arwp.net
أو هنا
http://abdofares.blogspot.com/
محبتي دائما تلك التي لا أملك سواها
..و ..
ود
زي النعام ،، دافنين في الرمل راسنا
و كأن البطحة طابت ، مش على راسنا
عايشين و مش فاهمين رايحين و لا جايين
ما ينوبنا غير الدق بالفاس على راسنا
و عجبي
KING TOOOT
مها
أنا عن نفسي لغاية وقت قريب لما ابتدت هوجة البهائيين على الفضائيات مكنتش اعرف بوجودهم أصلا
وفوجئت برضه من كلامك هنا انهم كانوا بيتعاملوا معاهم عادي ودلوقتي رافضين يطلعوا لهم أي أوراق رسمية
وأنا شايفة أنهم في الأول وفي الأخر مصريين صحيح البهائية مجرد تخاريف وكفر من الأخر يعني مش هينفع نساويها باليهودية أو المسيحية لكن الناس دول مواطنين مصريين يبقى على الأقل من حقهم تكون لهم أوراق رسمية ويأخدوا كافة حقوقهم كمصريين
تحياتي
مها ليكي تاج عندي تعالي خديه
تاج الصباغ
بجد انا مش فاهم هما تبع ايه ومع مين
انا اصلا ماشفتش الحلقه ومعرفش عنهم حاجه
عبد الرحمن فارس انا مش ضد خانة الديانة فى البطاقة دى ضرورية لانها هويتك وعشان ميجيش واحد بهائى يتجوز سنية بعقد شرعى وعشان العك عموما اصلها مش ناقصة وحتى اليهود مش اعداء الاسلام دى وجهات نظر انت حر تعتبرهم كدة او لا اليهود اصحاب الكتاب السماوى اختفوا وحتى الكتاب السماوى
اختفى وعاش المحرف
وبالنسبة للحمام كان محشى رز وشيبسى عائلى بالشطة وانا مش بشرب شاى او قهوة او نسكافية او كوكاكولا انا اخرى كوفى ميكس
:)
كنج توت كلامك دايما عاوز كتاب غلافة من دهب يحميه
شرفتنى زيارتك
وابقى كررها
هبة حبيبة قلبى
زى مانتى قولتى معرفتيهمش الا ايام الهوجة الاعلامية يعنى احنا اللى عملنا ليهم دعاية وعملنا ليهم وزن ومحدش كان يعرف بيهم
هما مطلبوش كتير هما طلبو اوراق رسمية يقدرو يمشو مصالحهم بيها
دايما زورينى
unique
جايالك يا قمر وهاخد التاج
جمهورية مصر العربية
امال انا حاطة اللينكات لية عشان تشوف الحلقة ودور على مواقعهم على النت وحاول تعرف معلومات هنهم
الثقافة حلوة برده
عشان تبقى مسأف
زورنى على طوووووووووووول
بصي انا من ضمن الناس اللي محتارة بصراحة في امرهم
نحط الديانة بتاعتهم ولا لا
طب ما هو لو كتبناها يبقى احنا كدة بنقر ان دين رباني ودة حرام الدي الخاتم هو الاسلام
ولو ما تكتبتش ممكن يحصل بلاوي بقى يتزوجوا ويختلطوا بينا
ولوسيبناهم كم مهمل ممكن يروحوا يقلبوا علينا الدنيا بقى وحموم الانسان والخيبة دي ودلوقتي الامة فيها اللي مكفيها
بس انا مع ان الحقوق الدستورية ياخدوها خصوصا حكاية المعاشات والامهات اللي بتولد وعاوزة اجازة
بس فيه حاجة دول بيعلنوا ان ولائهم لاسرائيل علشان الحج بتاعهم هناك طيب وبيلجاءوا لاسرائيل وامريكا في حقوقهم طيب ودة مش وقته نمسك الاعداء فرص علينا وخصوصا ان البهائية دي من تاليف الصهاينة
انا كمان محتارة جدا جدا
لي عندك طلب يا حبيبتي
الشيخ اللي كان بيتكلم في الحلقة دة يوسف البدري دة عالم كبير ومهما كان غلط او لا لازم احترامه يا حبيبتي
لان الكلام دة ونقدنا اللاذع للعلماء ولاي مسلم بطريقة ساخرة بيمسكها علينا اعداء الدين
لو ما عجبكيش كلامه قولي انك مش متفقة معاه
ولا ايه رايك
خصوصا وان الشيخ دة هو وكتير برده اجمعوا على ان البهائية بالذا ت مفسدة للدين وللبلد كمان
وما تصدقيش انهم مش عاوزين نشر دينهم امال اللي علاملينه في النت دة ايه
دمتي بخير وتقبلي كلامي بصدر رحب
طبعا انا مش موافقة انهم ينكتبلهم بهائى لانه هنا فى مصر احنا مش بنكتب غير الديانات السماوية فقط
بس عشان الاشكال دة ينكتبلهم فى خانة الديانة(اخرى) زى ما كانو بيعملو
اخرى يعنى ديانة اخرى غير الديانات السماوية الثلاث
وانا شوفت بعينى بطاقة مكتوب فيها اخرى لواحد بهائى لية يعملو لواحد
والباقى لا
وكمان هما ولائهم مش لاسرائيل لان دينهم موجود من قبل وجود اسرائيل
يعنى لما كانت الارض كلها ارض فلسطين
زى ما احنا اول قبلة لينا هناك وزى ما المسيحين واليهود حجهم هناك تحت ايد اليهود
اسرائيل ارض فلسطينية وهما مقام البهاء هناك زى اى دين
والبهائية مش من تاليف الصهاينة دى بدات فى بلاد فارس
الشيخ اللى كان بيتكلم دة مش نبى عشان مقولش عليه او اقول او حد من دين اخر يمسكها عليه انا من حقى اناقش اى حد بيتكلم فى الاسلام ماعدا الرسول وربنا فقط
والراجل الشيخ دة كان تايه ومش عارف يرد ومقلش اجابة واحدة مقنعة ومعندوش احترام الاخرين اثناء الحوار
عمال يتكلم وخلاص ويدش فى الكلام
والبهائيين اللى كانو معاه كانو احسن منه اقصد اتكلمو احسن منه وكانو بيقولو كلمتين فيهم المفيد
ورايى انهم كسبو الحوار منه
والاسلام دين عظيم محدش يقدر يهده انشاء الله
انا نحن انزلنا الذكر وانا له لحافظون
وهما كانت مطالبهم واضحة ومتنازلين عن كلمه بهائى فى البطاقة
والاختلاف فى الراى لا يفسد للود قضية
تشرفنى زيارتك دائما
أنا موافقك على كل آرائك في الموضوع ده .. ماهو صحيح تبقى مصيبة لما واحد بهائي يتجوز مسلمة .. إذا كان فيه مشاكل في زوتج الشيعة بالسنة نقوم نكلكعها أكتر وندخل واحد بهائي بينا ؟؟
يمكن الناس الكبارة العاقلين دول مستنيين لما واحد بهائي يتجوز أخته ولا بنته .. ولا تبقى جامدة قوي لو اتجوز الحاجة .. وبقى مطالب يقولله يا عمي ... يمكن ساعتها المرارة اللي هايحس بيها تخليه يعقل ويفهم ... مالها أخرى ..؟؟ وحشة ؟؟؟ دول رضيوا بيها .. يعني مش متمسكين بكتابة معتقدهم بالإسم ... ولا أحنا يعني غاويين عقد وكلاكيع؟؟
ده حتى ربنا يحاسبنا لو نسبناهم للإسلام ... والإسلام منهم براء
Post a Comment