بياناتى الشخصية

صباح الفل على البلوجرية اللى بيقروا البلوج الصبح

ومساء الفل للبلوجرية للى بيقروا البلوج بالليل

المهم سلام مربع لجدعان مصطبتنا اجدع بلوجرية فيكى يا مصر

البوست دة بوست ومش بوست

انا بس كنت عاوزة اتكلم على حاجة ناس كتير بتكلمنى وبتقولى

انتى منين؟

انت بتشتغلى صحفية فين؟

وانتى الجامعة بتاعتك فين؟

بيسالونى المدرج بتاعك فين والسكشن يتراحلو منين؟

ايميلك الخصوصى ايه؟

وكمان يبعتولى ارقام موبيلاتهم عشان اكلمهم

او عاوزنى انا ابعت رقمى عشان يكلمونى

مالاول تانى عشان الحبايب

حبكم دة على عينى وعلى راسى من فوق ودة اللى حسسنى بنجاح بنميمه وان مصطبتى بقت معروفه فى عالم المدونات

بس فى حاجة

مينفعش حد يسال حد على النت هو منين ولو حصل من حق التانى ميجاوبش لو مش عاوز لان دى بيانات شخصية وكتير بنلاحظ ناس مش كاتبه هى ساكنه فين فى بروفيلاتهم

اظن ان دى باينه خالص انها رغبه فى الكتمان وانه لو عاوز يقول كان كتب فى البروفايل وريح دماغه

بالنسبه لموضوع شغلى هريحكم

انا مخرجة صحفية فى جريده سغنطوطه خالص وانا اللى صممت شكلها الاساسى من اول عدد وانا اللى بعمل الماكيت الاساسى وحاجات كدة يعنى وبحدد المقال الفلانى بتنشر فين وفى انهو صفحة

(انا بشرح لان مصر كلها مش اعلاميين وفاهمين)

وبالنسبه للصحافة نفسها مش الديسك والاخراج الصحفى مش هقدر اقولكم فين

اما الجامعه فده سؤالى بديهى تفتكروا بدرس ايه؟

اقتصاد منزلى مثلا!!!؟؟؟

وبالنسبه لارقام الموبيلات دى عيب اوى انى ادى نمرتى لحد وبعدين يا جماعة انا مخطوبه واهلى ناس محافظين والعمليه بحساب مش بالعبيط كدة

وايميلى موجود عندكم فى البروفايل بس اسفة مش الخصوصى بس هو دة اللى بفتحه على طول يمكن اكتر من الخصوصى بواحد وعشرين مرة

***********************************************

تم حذف باقى البوست بناء على اسباب مقنعه لا افضل ذكرها

يمكن ذكرها ولكن فى وقت لاحق

*********************************

انتظر تعليقاتكم

أوزة صينى هدوم اروسه

كنت عند واحد صاحبتى بنقضى مع بعض يوم كامل فى بيتها فجأه واحنا واقفين فى البلكونه لقينا شويه بنات صينيات معديين من تحت البيت وواحدة فيهم بتبصلنا وبتقولنا

(اوزة سينى هدوم اروسه)

الترجمة لغير المصريين (عاوزة هدوم صينى للعرايس)ههههههه

ده كان رد فعلى ضحكت وقولت لصاحبتى طلعيهاوالنبى

قالتى ليه ماهو احنا مش هنشترى حاجة من اصله

قلتلها طلعيها انا هشترى

كنت هموت واعرف فى ايه فى السنطة اللى قدها مرتين اللى هى شايلاها

طبعا العربى بتاعها عمل حادثة وهو بيعدى الطريق لا احنا فاهمينها ولا هي فاهمنا غير كلام بسيط اوى

مسكت قطعه ملابس فى ايدى وقلتلها بكام دى يا؟

قالتلى 250 جنيه

انا فى سرى(اسم الله عليكى وعلى اللى شربك الصنعة)هههههه لا مش ينفع

مسكت قطعة تانيه بكام دى يا؟

هو انا كل شويه هقولها يا ان اعاوزة اعرف اسمها ايه

انا:انتى اسمك ايه؟

هى:لاتهالىلؤلافللاتق

انا :ايه اسمك ايه؟

هى :تلابتينلاتنالتلعهب

يا خرابى مش فاهمة

المهم طلعت فى الاخر مش فاهمة سؤالى اصلا

اضطريت اسفة انى استخدم الصينى المضمحل بتاعى

انا :نى شى شيان شين مو مينج زيا؟(الكيبورد مش بتكتب صينى)هههه

هى :(ضحكت اوى) لى

بين وبين نفسى كنت هفطس من الضحك بقة من كل الاسامى ميطلعش اسمها غير لى زى البت بتاعة فيلم محمد هنيدى ههههههههه

هى: سيكو سيكو انوس بتاتس فرى؟

انا :لا يا لى انا مش بتكلم صينى اوى كدة هههه بكام دى بقة؟

لى: دة بخمسين وميه جنيه

انا:(قولت استخدم داء المصريين وافاصل وانا مبعرفش افاصل اصلا)لا يا لى لا دى 50 جنيه بس

لى :لا مس ينفع مدام مس ينفع

انا:لى انا مش مدام وهما 50 جنيه بس

بعد محايلات مريرة عشان اجيب اخرها اديتلى اللى انا عاوزاه ب50 جنيه

وهى ماشيه قلتلها :زاى شيان(باى باى) هههه

فطست على روحها تانى وقالتلى: واليكم السلام ورهمه الله وبركاته

الموضوع بقة مش انى شاطرة اوى كدة فى الفصال وبت ناصحة لا

الموضوع اكبر من كدة

البت لى طلعت عارفة ان المصريين بيفاصلو فى سعر كل حاجة قامت من الاول مغليه عليا السعر عشان تبيع بالسعر اللى هى عاوزاه بعد ساعة الا ؤبع فصال عشان هى كمان تجيب اخرى

متدربة على اعلى مستوى والله وحد مفهمها ابعاد الموضوع وكمان شكلهم كدة عاملين دراسه حاله للمجتمع المصرى

ولما سالتها انتى مين اللى مسرحك بس بلفظ اشيك طبعا قلتلها انتى بتشتغلى تبع مين؟

قالتلى انها شغالة تبع مصنع بيبع الحاجات دى عينات وهى بتسجل ايه الموديل اللى اتباع اكتر عشان المصنع يركز عليه فى الانتاج يبيع اكتر

يا اولاد اللئيمه

المهم انى من فتره كنت بكلم واحد على الشات صينى برده وقلتله على موضوع البنات دى ورد عليا رد غريب جدا قالى ان البنات دى الصين عارة بوجودهم وتقريبا مشرفة على الموضوع

بس دول مش نازلين يبيعو لبس اصلا دول جايين علشان يدخلو بيتكم ويعرفو شكلها ايه وشكلكم ايه وحياتكم ماشية ازاى ويصنعلكم الحاجات اللى انتو بتشتروها ويبيعوهالكم

يعنى مثلا يا جماعة الانتريهات العادية بتاعة المصريين غير الامريكان فرنتشر فلازم يعرفو المصريين عاوزين ايه من غير ما يسالوهم عشان الناس ممكن ترفض تساعد لانهم فاهمين انه عاوزين يعملو غزو اقتصادى

قلتله :بجد؟!!!!!!!! يالهوى

قالى:اومال انتى مفكرة ان بنت ولا ست منهم سايبه بيتها واهلها وحياتها عشان تنزل تبيعلكم هدوم القطعه منها ب50 ولا بميه جنيه؟!!!!!!!!! ااااااه

بصراحة رد مقنع تفتكرو الواحدة منهم تسيب دنيتها هناك عشان تعرض نفسها للخطر وتدخل بيوت ناس الله وحده اعلم هما مين وممكن يعملو فيها ايه عشان تبيع ملابس فقط؟؟؟

مش معقوله صح؟

الصين هتبدهلنا والحمد لله وسمعت انها على 2010 هتبقى دولة عظمى ليها مكانتها وبتهدد بضرب سعر الدولار

شوفتو الدول بتفكر ازاى والنبى جتنا نيلة فى وكستنا اللى ملهاش لون ولما خلصت كل الالوان اخدوا الشفاف

وبعد اذنكم انا عاوزة امشى بقة عشان الجو حر موووووووت

اووووووووف ايه ده ايه الجو الحر ده ! مفيش هوا صينى؟

انتظر تعليقاتكم

الناس دى جدعه اوى

متعرفوش وقفتكم جنبى فرحتنى قد ايه

كان نفسى ادى لكل واحد مدونتين هديه واصرفله ايميل مكافئه

شرفتونى قدام الدكتوره وعشان كدة حبيت اعرف البلوجريه كلهم انكم جدعان اوى

ربنا ما يفضحلكو حبيب ولا يعريلكم ركب

يكسبكم ويربحكم يستركم ما يفضحكم

يووووووووووووووه يعنى مفيش فايدة

دعوتين بحالهم ومحدش طلع فكه من جيبه

ما علينا والان البلوجرية حسب الترتيب اللى علقو بيه بس اولا شكرا لابى والشنكوتى الكبير اللى ملو اول استمارتين

جيهان على

سالى

رئيسه حزب الاحلام

مواطن مصرى نايم

فتافيت

تامر نبيل

عبد الرحمن ياسين

wanna be physician

النجم القادم

مدحت محمد

che the hermit

د\اجدع بنوته

خبيب

بنت مصريه

احمد

الفارس الملثم

وجهه نظرى

محمد حمدى

ولاء

تايه ومش تايه

مفقوعه مرارتها من حماتها

احمد منتصر

المصرى

واحد من البلد دى

رصيف نمرة خمسة

بطوط حبوب

ادم

نورة الخشن

مصطفى ريان

z_diva

باجوجو

شكرا ليكم واحد واحد واكيد طبعا مننساش الانونيموس اللى ساعدونا الف شكر

ساعدونى يا اولادى

بصو بقة انا مطلوب منى تسليم استمارات استبيان يوم الخميس وانا لسة مش جاهزة عشان مش لاقية مبحوثين حوليا بيفهمو نت اصلا

عاوزة مساعدة

هكتبلكم انا الاسئله دى وانت تجاوبونى فى التعليقات تكتب رقم السؤال والاجابه عشان متوهنيش وانت بتكتب التعليق تضغط على كلمه عرض النص الاصلى او

show original post

عشان يبقى قدامك الاسئله وانت بتجاوب واللى مش فاهم يفتح صفحة نميمه مرتين ويقرا من صفحة ويجاوب فى التانيه

المهم تساعدونى والنبى والصديق وقت الضيق اما اللى هيضحك عليا هزعل منه لانى عارفة ان الاسئله عبيطه ومش محتاجة توضيح والاصدقاء وقت الضيق

ملحوظة : محدش يجاوب على سؤال باختيارين ولما يقولك اخرى تذكر تقول انت اجابه من عندك لو عاوز

س1- هل تستخدم الانترنت؟

نعم

لا

احيانا

س2-اى المواقع تفضل استخدامها لاستضافة مدونتك الالكترونيه؟

بلوجر

ورد بريس

اخرى تذكر

س3 - هل ترى ان المدونات الاكترونيه وسيله للتعبير عن الراى؟

نعم

لا

احيانا

س4-ماهى اكثر المدونات التى تلفت انتباهك وتحب ان تتابعها؟

ذات المضمون الترفيهى

ذات المضمون السياسى

التى تعرض الاشعار والقصص القصيرة

س5-هل تقدم المواقع التى تستضيف المدونات مثل بلوجر وغيره مزايا جيدة للمستخدمين وتعد سهله الاستخدام لغير المحترفين؟

نعم

لا

احيانا

س6-اذا كنت ن مستخدمى بلوجر فما هو سبب تفضيلك لمدوناتها؟

لانها اشهر المواقع وتابعة لجوجل الذى يظهر مدونتى عن البحث

لانها لديها سياسه صارمة تجاه المواد الاباحيه التى تنشر بها

لانها بالنسبه لى سهلة الاستخدام ولا تنقطع الخدمة او تسوء

س7- هل تساعد المدونات على تبادل الاراء والمعلومات من خلال التعليقات وذلك حيث ان اصحاب المدونات فى الغالب اشخاص عاديه؟

نعم

لا

احيانا

س8-فى المتوسط كم من الوقت تقضى فى التصفح فى المدونات واستخدامها؟

من ساعة الى ساعتين

ساعتين فاكثر

حسب وقت الفراغ

س9 هل لديك اى طلبات تود توجيهها الى القائمين على بلوجر؟

1-.................................

2-.................................

3-.................................

*************************************************

البيانات الشخصيه:

الاسم:..............(اختيارى)

النوع: ذكر انثى

السن :من 15 الى 25 سنه

من 25 الى 35سنه

من 35 الى 45 سنه

من 45 الى 55 سنه

من 55 الى اكثر

مكان الاقامة:حضر يذكر.................... ريف يذكر........

الحالة الاجتماعية: متزوج اعزب مطلق ارمل

المستوى التعليمى:

حاصل على ابتدائيه

حاصل على اعداديه

حاصل على مؤهل متوسط

حاصل على مؤهل جامعى

حاصل على مؤهل اعلى من جامعى(ماجيستير او دكتوراه)

المهنه: يعمل -ذكر المهنه.....

لا يعمل

بجد بجد المرة دى انتظر تعليقاتكم ومحتجاها جدا

وشكرا لابى والشنكوتى الكبير اللى ساعدونى فى اجابه اول استمارتين

*****************************************************

تحديث: بصو يا اجدع بلوجرية فى الدنيا انا مش طلبت منكم ملأ الاستمارة دى عشان انا مش عارفة اجاوب ولا عشان الاسئله صعبه ولا حاجة بس بدل ما اغش واجاوبهم كلهم بايدى باجابات مش حقيقية وانقى الاجوبه هادى بادى كرنب زبادى واللى يقع عليه القلم اجاوب

دى امانه بحثية علميه بتنجانية يا ناااااااااس

لازم اجلد نفسى

هكون مرتاحة اوى لو كتبت البوست ده وهرتاح اكتر لما تعلقو عليه

من فترة كان فى واحدة فى زميلتى مكنتش اعرف حتى اسمها بس مكنتش بقبلها ولا بطيقها ومرة جت قعدت جنبى قلت يارب الارض تنشق وتبلعها لانها ملامحها مستفزه تحس انها هتاكلنى ونظراتها شرسه شويه وشكلها اكبر منى وطويله وعريضه كانت فى نظرى (جته) مالاخر يعنى

وكان اكتر حاجة مش بتعجبنى فيها هو الميك اب او المكياج بتاعها لانه كان اوفر جدا بشكل لايمكن حد يتخيله وغير متناسق كمان

وقولت عليها مرة ايه الرقاصة اللى ماشيه فى عز الضهر دى

ده رقبتها مش قادرة ترفعها من كتر الميك اب اللى على وشها

وكمان اصل لبسها جيبه وبلوزة واسعة وطرحة كبيرة زى الخمار بالظبط

يعنى مش لبس البنات بتوع المكياج الاوفر اللى انتو عارفينهم

والظاهر انها كانت عاوزة تصاحبنى اوى فجت قعدت جنبى تانى

رحت مديالها ضهرى ماهو اصل انا مش عاوزة ابصلها حتى

المهم يظهر انها كانت نواياها وقعدت تتجاذب معايا اطراف الحديث بصراحة انا مهما كان اللى قدامى ده مين لو بكرهه مقدرش اكسف حد وهو بيكلمنى الا لو غلط فيا شخصيا

وقعدت تقولى انا من زمان عاوزة اكلمك بس انتى مش بتدينى فرصة

انا بشوفك واقفة مع الدفعة كلها وكل ما اشاور لواحدة عليكى الاقيها عارفاكى

تسلم عليكى تطلعى عارفاها الا انا مكنتيش تعرفينى وكنت عاوزة اتعرف عليكى اوى

وابصلكم فى وشها لقيت طبعا المكياج اوفر زى كل مرة وللبنات اللى بيفهمو فى المكياج البودرة اللى كانت بتحطها بتدى على ضى احمر كدة حتى كنت بقول عليها البيضة المسلوقة

ولكن انا ملقتش المكياج الاوفر وبس

ان ان اااااااه

تخيلوا لقيت ايه؟

حرق كبير اوى وظاهر جدا فى وشها للى يركز ويشوفو عن قرب

وشها كلو بالكامل محروق

ونظرتها الشرسه كانت بسبب ان حواجبها مرفوعين 88

لان واحد منهم اتحرق وخد المنظر دة وبالتالى هى خلت التانى يشبهله عشان يبقو اخوات

مقلكمش انا قعدت اكلمها كتير اوى فى اليوم ده وقضيت اليوم كله معاها حسيت انى عاوزة اعتذرلها عن اللى قلتو فى ضهرها اصلو مش اسلوبى انى اتريق على حد كدة

بس هقولها ايه انا كنت بقول عليكى المكياج بتاعك اوفر بس لما لقيت ان وشك محروق بالكامل حبيت اقولك اسفة

حسيت ان لازم اجلد نفسى وانى محتاجة سبعين شبشب زنوبه على دماغى وانى لسانى منقوع فى الزيت زى الكرباج السودانى

المهم يعنى حكمة اليوم متاخدتش عن حد فكرة الا لما تعرفه كويس

واوعى تستغرب من تصرفات حد الا لما تفهم ليه هو بيعمل كدة

انا اسفة اوى يا منى

انتظر تعليقاتكم

تاج العز يا تاجنا

وصلنى تاج من تايه ومش تايه


وحبيت بس اوضح حاجة ان تاج مش بمعنى تاج زى اللى فى الصورة ده لا

تاج دى عماله زى لعبه كهربا مثلا ولعبه كهربه دى مجموعة من الاولاد يجروا وواحد بيجرى وراهم لو حس ان هيتمسك يقول كهربااااااااااااااااا

يقوم التانى ميقدرش يمسكه لانه مكهرب

انما لو لمس واحد ومسكه قبل ما يقول كهربااااااااااااااا يبقى اللى مسكه ده هو اللى عليه الدور يجرى وراهم كلهم

تاج يعنى اللى يلمسك تكمل اللى هو كان بعملو

يعنى انا اجاوب على التاج وابعتهلكم تقوموا انتو كمان تجابو عليه كفايه عليكو كدة

هوريكم بقة التاج اللى جالى

********************************************
قواعد التاج

اولا:اذكر عشرة اشياء عن نفسك

ثانيا:اختر خمس اشخاص تهدى لهم التاج

ثالثا:لا تهدى التاج لمن اهداه اليك

رابعا:عرف اللى بعتلك التاج انك نزلته عندك

***************************

عشرة اشياء عن نفسى
بحب التدوين جدا ومش بكتب بوست جديد غير لما اخد عدد التعليقات اللى يشجعنى اكتب البوست اللى بعده
خم نوم بتاجر فيه وبوزعه للدول الاخرى زى دمنهور وبوسعيد واسكندريه
شطورة فى شغل البيت وبعمل كل الاكل والحلويات كمان
بحب وائل(خطيبى) موووووووووووووووووووووووووووووووووت
مصابه بمرض التأمل والتفكير دون انقطاع
قلوقه ومتوترة وخايفة دايما من بكرة
بحب كل حاجة تحصل زى مانا عاوزه مع ان ده غالبا مش بيحصل
بكره الموبيلات والميسدات جدا جدا فوق الخيال قد كرهى للعمى والمكرونة الاسباجيتى
عاوزة اخلص الكليه من غير دبلره وننتهى من موال التعليم اللى بقاله 13 سنه ده
غلباويه سوفسطائيه وبسبعة وسبعين لسان

***********************************

اهديه لخمسه بس وده موضوع محرج انا عاوزة اهديه لناس كتير اوى بحبهم ومش اقدر اكرر اللى قالو تايه ومش تايه
واحد من البلد دى
هبه وكراكيب الكلام
سوووووووووووو
اجدع بنوته
قطه الصحراء

********************************************

مش ههدى التاج للى بعتهولى وعرف الناس بيه
التاج ده جالى من تايه ومش تايه
وانا اخترت ناس تانيه اهديهم التاج غير اللى هو اختارهم عشان منبقاش كررنا رغم ان فى ناس هو قالهم كنت عاوزة اهديلهم انا التاج

انا بصيحلك اهو يا تايه عشان اعرف الناس كلها انك انت اللى بعته

لولولولى بدأنا

بعد الاجماع بالموافقة على وجود مدونة لوحة شرف

انا عملتلكم لوحة شرف ينشر بها مقالات كل من دون فابدع

هتقولولى وهتجيبى المقالات منين

هقلكم الناس اللى بتعلق عندى هزورها واللى هيعجبنى من كتاباتهم هنشره واكيد هعرفهم قبلها انى هعمل كده

هتقولولى طب واللى معلقش عندك

هقلكم وانا اعرفه منين انا معرفش غير المدونين اللى بيعلقو عندى

استعدوا ببوستات جامده وانا هنشر اجمل بوستات امتعت لجنه الحكام الاجانب اللى مش هقلكم هما مين اصلا

وكل البوستات الحلوة هتتنشر يعنى مش ساخر بس ولا سياسى ولا نوع واحد فقط

الحياه ضحك ولعب جد وحب عيييييييييييش

اللى عاوز يشوف المدونة يضغط هنا

ومش عاوزين كلام بايخ واللى يحبنا ميضربش نار عشان العروسه حامل

سلام

انتظر تعليقاتكم

لوحة شرف

البوست ده ليكم وبيكم

مجرد اقتراح عاوزة اقترحه عليكم

عاوزة اعمل مدونة اسمها لوحه شرف

كل اسبوع ننشر فيها احلى بوست اتقدم من وجهة نظر لجنه الحكام(اللى هى طبعا مش انا) لانى هجيب ناس من بره لان كلكم اصحابى وحبايبى ومش عاوزة حد يزعل

يعنى من الاخرواللى يزعل قدامه 4 جدران فى الاوضه ينقى الجدار اللى يعجبه ويخبط دماغه فيه هههههههههه

هنعمل مدونة اسمها لوحة شرف هننشر فيها احلى بوستات فيكى يا بلوجر

ودى فكرتى وليا حق الملكيه فيها

واياك حد يقلدنى والا هحلقلقه شعره زى القرد اللى وقف العربيات لما طلع فوق العمود وبقت الاشاره حمرا

عارفة انكم مش فاهمين موضوع القرد

مش مهم

المهم تقولولى رايكم ايه عشان برده اللى يشوف بوست حلو يشاورلى عليه وانا انشره

واول بوست هيتنشر هيكون من نميمه

هتقولولى ليه؟

(عشان محدش يزعل ويقولى (مع انى كان نفسى ابقى الاولانى

انتظر تعليقاتكم

عاوزة اكبر واستعبط

اه انا عاوزة اكبرويبقى عندى 70 واستعبط وانتو مالكم بيا

امال عاوزنى اقول نفسى ارجع لايام الطفوله لا لا والف لا ده يبقى اسمه عبط

واللى يتمنى الامنيه دى يبقى لسه مفهمش اى حاجة فى الدنيا

واسمعو كلامى سن السبعين ده مميزاته خطيرة وهتشيل الدنيا من دماغك وتعمل اللى انت عاوزه وقت ما انت عاوزه

هتقولى ايه العبط دة اللى بيعمل اللى هو عاوزه وقت ما هو عاوزة العيال الصغيرة

هقولك مقولة محمد هنيدى هما الرجاله كدة لما بيكبروا بيتهطلو

بس المقوله دى لاتنطبق على الرجاله بس ولكن تنطبق على الرجال والنساء فى سن السبعين

طبعا مش كلهم عشان فى ناس عندها سبعين سنه واكتر وعقلها يوزن بلد

ولكن لما تبقى عجوز هتاخد امتيازات رهييييييييبه

منها الاذن الضمنى بقلة الادب وطول اللسان ومحدش يقدر يرد عليك

وكمان التخريف والتوقيع بين الناس ونقل الكلام

تيجى تلوم الشخص اللى يعمل كدة يقولك لم نفسك انا سنى ضعف سنك ازاى تكلمنى كدة

تيجى تشتكى للناس يقولولك ده راجل كبير يعنى هنربيه من اول وجديد

من شب على شئ شاب عليه

(يا راااااااجل)

مع انى اعرف انهم بيقولو الجمله دى للناس اللى عندهم صفات كويسة من الصغر وبيفضلو عليها حتى الكبر

(ما علينا)

تقدر تخرج وتيجى وقت مانت عاوز من غير ماحد يسألك انت رايح فين ولو شافوك على القهوة وبتشيش محدش يقدر يتكلم ولا يعاتب

تقدر تقعد على الكمبيوتر طول الليل والنهار وتشيت مع بنات مزز او شباب صغيرة من غير ما تلاقى حد من افراد البيت الاخرين يقولك انا عاوز الكمبيوتر

وطبعا انت وقتها هتكون على المعاش افرض ان المعاش خلص؟؟؟؟

تقدر تاخد فلوس من اى حد من اسرتك من غير ما تتحايل عليه ولا تقوله انت هتعمل ايه بالفلوس دى(هو اساسا يقدر يقولك لا مش هديك فلوس)؟

ده طبعا غير انك تقدرتقول كلام زى الرصاص يدخل فى اللى قدامك يقطعه وانت مش عارف ترد

هقول اية بس لواحد قد ابويا ولا واحدة قد امى؟

عرفتو بقه انكم لا تكبروا لا حدود ولا قانون ولا مسؤليه

يمكن حد يجي يقولى لما اصغر لا حدود ولا قانون ولا مسؤليه بس هقوله صح كلامك بس ضيف عليه امتيازات انك تكون عجوز وانت تعرف انك لما تكبر افضل من لما تصغر

ومحدش هيقومك من على كرسى عشان يقعد هو

ولا حد هبيعتك مشواير كتير

ولا حد هيكلمك وهو بيستهتر بكلامك لانك لسه صغير مش فاهم حاجة

الشيخوخة مصلحتك اولا

انتظر تعليقاتكم

الله يحرق دمكم زى ما حرقتو دمى

الله يحرق دمكم

اه انا اللى بقول ومش هاممنى بقة اليوم اللى نقول فيه اضراب عشان حقنا يرجعلنا ونعلم التجار الادب ويمكن الحومة كمان محدش يعمل اضراب

والناس اللى راحة تشترى كانتلوب واشى بقسماط وشيبسى ومولتو

الله يحرق دمكم مناظركم غاظتنى جدا

هتتعلمو تاخدوا حقوقكم امتى يا بشر

اه صحيح انا نسيت انتو معندكوش فكر عشان يبقى فى مبدا

هنقول ماشى مقدروش على المقاطعة مش عاوزين يستحملو

ومبداهم يعنى نجوع يعنى

بس دى مش حاجات اساسية خالص انا شوفت المناظر المستفذه دى بعينى

انا مقولتش متروحش اشغالكم لكن على الاقل قاطعو السلع فى اليوم ده

بهانة وحمدان مستنين اللى يجبلهم حقهم وشكلهم كدة عمرهم ما هيتحركو عشان يجيبوه

وانا من مكانى ده بقولها بعلو صوتى عشان خاطر حرقة الدم دى مش عارفة بنتقم من اية ولا من مين

لكن سادس كل يوم من كل شهر هضرب عن كل السلع مش هشترى حاجة
وبدون مظاهرات ملهاش لازمة وبدون مكوث فى البيت لكن مش هشترى حاجة

دعوة الى المقاطعة سادس كل يوم من كل شهر واللى عاوز يعمل زيي يقولى

عاوزين نبقى رجاله مرة واحدة بدل ما اثبتنا للحكومة ان العيب مننا واننا احنا المتخاذلين مش هما واننا ساعة الجد مفيش وبق ولوك لوك وفعل مفيش طلعنا عيال

سبحان من صبر حكومة مبارك والسادات وناصر علينا ده احنا شعب مش نافع

اتفو عليكم واحد واحد من اللى شوفتهم بيشترو حرقتو دمى

حسبى الله ونعم الوكيل