Friday, April 11, 2008

عاوزة اكبر واستعبط


اه انا عاوزة اكبرويبقى عندى 70 واستعبط وانتو مالكم بيا

امال عاوزنى اقول نفسى ارجع لايام الطفوله لا لا والف لا ده يبقى اسمه عبط

واللى يتمنى الامنيه دى يبقى لسه مفهمش اى حاجة فى الدنيا

واسمعو كلامى سن السبعين ده مميزاته خطيرة وهتشيل الدنيا من دماغك وتعمل اللى انت عاوزه وقت ما انت عاوزه

هتقولى ايه العبط دة اللى بيعمل اللى هو عاوزه وقت ما هو عاوزة العيال الصغيرة

هقولك مقولة محمد هنيدى هما الرجاله كدة لما بيكبروا بيتهطلو

بس المقوله دى لاتنطبق على الرجاله بس ولكن تنطبق على الرجال والنساء فى سن السبعين

طبعا مش كلهم عشان فى ناس عندها سبعين سنه واكتر وعقلها يوزن بلد

ولكن لما تبقى عجوز هتاخد امتيازات رهييييييييبه

منها الاذن الضمنى بقلة الادب وطول اللسان ومحدش يقدر يرد عليك

وكمان التخريف والتوقيع بين الناس ونقل الكلام

تيجى تلوم الشخص اللى يعمل كدة يقولك لم نفسك انا سنى ضعف سنك ازاى تكلمنى كدة

تيجى تشتكى للناس يقولولك ده راجل كبير يعنى هنربيه من اول وجديد

من شب على شئ شاب عليه

(يا راااااااجل)

مع انى اعرف انهم بيقولو الجمله دى للناس اللى عندهم صفات كويسة من الصغر وبيفضلو عليها حتى الكبر

(ما علينا)

تقدر تخرج وتيجى وقت مانت عاوز من غير ماحد يسألك انت رايح فين ولو شافوك على القهوة وبتشيش محدش يقدر يتكلم ولا يعاتب

تقدر تقعد على الكمبيوتر طول الليل والنهار وتشيت مع بنات مزز او شباب صغيرة من غير ما تلاقى حد من افراد البيت الاخرين يقولك انا عاوز الكمبيوتر

وطبعا انت وقتها هتكون على المعاش افرض ان المعاش خلص؟؟؟؟

تقدر تاخد فلوس من اى حد من اسرتك من غير ما تتحايل عليه ولا تقوله انت هتعمل ايه بالفلوس دى(هو اساسا يقدر يقولك لا مش هديك فلوس)؟

ده طبعا غير انك تقدرتقول كلام زى الرصاص يدخل فى اللى قدامك يقطعه وانت مش عارف ترد

هقول اية بس لواحد قد ابويا ولا واحدة قد امى؟

عرفتو بقه انكم لا تكبروا لا حدود ولا قانون ولا مسؤليه

يمكن حد يجي يقولى لما اصغر لا حدود ولا قانون ولا مسؤليه بس هقوله صح كلامك بس ضيف عليه امتيازات انك تكون عجوز وانت تعرف انك لما تكبر افضل من لما تصغر

ومحدش هيقومك من على كرسى عشان يقعد هو

ولا حد هبيعتك مشواير كتير

ولا حد هيكلمك وهو بيستهتر بكلامك لانك لسه صغير مش فاهم حاجة

الشيخوخة مصلحتك اولا

انتظر تعليقاتكم

32 comments:

فزلوكة said...

واضح إنك مضايقة أوى من موضوع قوم عشان أقعد مكانك

بس برضوا أنا لسه عند رأيي

لاحياة بعد الثلاثين

almasry said...

أنا حد ربنا انى راجل لأنى كده عندى امتيازات بالطوره لكن صدقينى ان البنات
دول كفايه انهم مخلوقات جميله

طبعا انتى تقولى الواد ده مش فاهم حاجه لكن أهى أى انتخه والسلام علشان نسلم عليكم


تحيـــاتى
المصــــــــــرى

واحد من البلد دى said...

علشان تعرفى بس إن أنا حريص على زيارتك..أدينى تالت تعليق أهوه..عموما موضوعك ده حقيقى بجد..مع إنك تناولتيه بطريقة ساخرة..لكنه بيحصل فعلا..بوست جميل ودمه خفيف..وبرضه فى إنتظار زيارتك

Anonymous said...

هههههههههههههه
اول زياره لمدونتك بس مش هتكون الاخيره
مين بس العجوز اللي مطلع عينك
بس مصطبتك مريحه
تحياتي

صحفية روشة said...

فزلوكة
اه طبعا متضايقة من الموضوع ده

صحفية روشة said...

المصرى
اهم حاجة انك جيت تسلم

صحفية روشة said...

واحد من البلد دى
اه طبعا بيحصل ومش عارفة بيحصل معايا انا بالذات ليه
المهم عاوزاك تعرف ان انا كمان كنت حريصة على زيارتك لكن كان فى عطل فنى كنت كل ما اجى ابعتلك كومنت ميرضاش لكن دولفتى لو فتحت ااى بوست فى مدونتك هتلاقينى معلقة عليه

صحفية روشة said...

مادى
العجوزه اللى مطلعة عينى
ربنا يسامحها وخلاص
اهم حاجة تكون لقيت فسحايه عشان تقعد على مصطبتى كل ما تيجى
:)

wanna b a physician said...

ياستى مش تقومى وبجحى لان فى ناس بتستهبل خليك شباب كدا 70 اية بس اعقلى عودى لصوابك يا هاميس
اقصد يا صحفية

صحفية روشة said...

wanna be
انا مقولتش نبجح
ومقلتش ان كلهم كدة
لكن بعضهم فعلا مستفز
والموضوع مش موضوع مين يقعد ومين يقف وبس

ولد مصري said...

كلاكيت أول مرة

أنا رأيي في سن السبعين الواحد احسن حاجة يقعد على جنب ويعمل شوية لأخرته لأنها المفروض قربت قوي طبعا هيه مقربه مننا كلنا بس في السبعين بتبقى على وش وصول.

ما علينا المهم البلوج جميل والبوست فكرته ظريفه ويا خوفي لتطلعي انتي كمان عندك 81 سنه وغلطتي وكتبتي 18 معلش يا بني العتب على النظر.

أتمنى يا تيزا نشوفك عندنا

dr. Ahmed Sakr said...

الحياة بتبقى جميلة بعد الثلاثين لكن برضه الواحد عاوز يعيش شباب علشان يتمتع بكل حياته

وبرضه مش عيب أن الواحد يكون عيل بس عيل بحق وحقيقى

shreen said...

تصدقى بالله كلامك صح

بس ده ما يمنعش ان فى خلق زيى كده
لا يهمها ستين ولا سبعين سنه

اة انا بلطجيه

اقول للاعور انت اعور فى عينة العورة

ولا يهمنى


بس طبعا فى ناس محترمة وتقولك
لا دة اد جدى ازاى ارد عليه

فيه ايه يعنى ؟
اصل فى خلق من الكبار دول بيستهبلوا عن عمد وان بقى ولا يهمنى

وفى ناس بتبقى غلابة بجد
ومش قصدها

دول بيبانوا


بس برضه انا مصرة انك زى العسل

وياترى خطيبك غير النيكست ولا لسه ؟
:)

mohammad hamza said...

:D
هو فى حاجة حصلت فاتتنى ؟؟

أول زيارة ليية .. ومش الأخيرة

بس المهم متضايقة أوى من العواجيز وواخدة منهم موقف
..
بس برضه عملوا كتير ولازم نستحمل ..
مش قصة ..

وبعدين فى حد يكون فى أحسن سنين حياته ويتمنى يسيبها ؟

د/اجدع بنوته said...

لا ياشيخه

تصدقى ممكن برده

هههههههههههههههه

ومين قالك اصلا

ان احنا علبال منوصل 70 سنه

هيكون فيه شاتينج وشيشه

ده هنسافر للمريخ ونرجع ياماما

لوووووووووووووول

صحفية روشة said...

ولد مصرى
انا مش تيزة ده انا قد ولادك
كان نفسى قوى بتوع حزب السبعين يسمعو كلامك ويعملو شوية لكلامهم بدل الاخطاء اللى عن عمد اللى بيعملوها

صحفية روشة said...

الحشرى
الا ليت الشباب يعود يوما لاخبره بما فعل المشيب
نورتنا

صحفية روشة said...

شيرين
انابتكلم على العالم اللى بتغلط فى الناس وهى متعمدة وعارفة ان محدش هيقدر يكلمهم عشان سنهم

صحفية روشة said...

محمد حمزة
ماهو من غلبى اعمل ايه بس
عاوزة اخد نفس الامتيازات عشان اعاملهم الند بالند

صحفية روشة said...

اجدع بنوته
تصدقى صحيح
نروح نصيف فى المريخ ونيجىبس المشكله هيعملو باركنج صواريخ ازاى

صوت من مصر said...

حلو قوى المثل بتاع عيش عبيط تموت مسطور
هههههههههههههههه

تــــايه ومش تـــايه said...

لا انا كده حلو اوى ومش عاوز اوصل سبعين .

صحفية روشة said...

صوت من مصر
اه حلو
هههههههههههه

صحفية روشة said...

تايه ومش تايه
اسمع كلامى تكسب هتاخد امتيازات رهيبه

Desert cat said...

هو لسه فى حد بيعيش سن الشباب اصلا
فى ظل الظروف السودة دى الطفل بيبقى شيخ مبيعديش على مرحلة الشباب خالص اصل فى مرحلة الشباب بيشتغل ويتجوز ويكون اسرة
دلوقتى الحاجات دى بح مفيش
لا فى شغل
ولا حد لاقى يتجوز
وبالتالى هو بينط دلوقتى من الطفولة على الشيخوخة مباشرة
تحياتى

Empress appy said...

انتى مستعبطه وانتى صغيرة كمان

بس يا بنت انتى بجد انا تيته كبيرة وبقيت احسها ارق من الاول يا عينى وبقت زى البيبى بتزعل من اقل حاجه وربنا ما يوريها لحد الزهايمر عندها وبتصعب عليها نفسها بجد
والله حرام
انتى وحشه ومش لاعبه معاكى تانى

صحفية روشة said...

قطة الصحراء
اكيد ظروف بلدنا منيله
تشيب شعر البيبى

صحفية روشة said...

appy
طبعا مش كلهم عشان فى ناس عندها سبعين سنه واكتر وعقلها يوزن بلد

الكلام اللى فوق ده انا واخداه من البوست اللى كتبته
انا مش بتكلم على كل الناس الكبار
انا بتكلم على الفئة اللى تفرس منهم فقط
فهمتى قصدى؟
هتلعبى معايا تانى بقة ولا لا؟

ياسر said...

صح ياجماعة في
ناس فعلاا الشيخوخة
بالنسبة لها مبتفرقش
كتير وباالذات هنا في اوروبا
انا اول امبارح شفت واحد
عندة 101سنة في ايطاليا
بيستعد وبيدرب علشان يدخل
مسابقة جري ويدخل موسوعة
الارقام القياسية ومن 3شهور
هنا في فرنسا واحد عندة
90 سنة وبيضرب يلعب مطش
بوكس وبردة علشان يدخل موسوعة
الارقام القياسية شوفوا انتم بقي
الاعمار الا زي دي عندنا في مصر
هنا الناس مفيش حاجة شغلة
بالة دماغهم فاضية
ومقال شيق

صحفية روشة said...

ياسر
كويس انهم عندهم حاجة يعملوها بدل ما يضايقو فينا
شكرا لزيارتك

أمل عبد الحكيم said...

هههههههههههههههههههههه
جامدة اوى الفكرة اننا نكبر منصغرش
بس اكيد فى كمان عيوب لان الواحد يكبر زى انه مش هيكون قادر يعمل كل الحاجات اللى قلتى عليها عشان سنه كبير
وهيبقى ياله حسن الختام

البوست حلو
تسلم ايدك

صحفية روشة said...

امل عبد الحكيم
ربنا يخليكى
بقالك فترة مش بتزورينى ليه