والله وعملوها الرجاله

والله وعملوها الرجالة ورفعوا راس مصر بلدنا


الف مبروك لمصر ياجماعة


لولولولولوى عقبال عندك يا كوتيفوار لولولولولى وعقبال عندك يا ام كاميرون


هى هى هى هى هى


وزرغتى ياللى منتش غرمانة


وايوة يا واد يا ولعه خدها ونزل الترعة


يلا قولو ورايا


ايوة يا واد يا ولعة خدها ونزل الترعة


سيبكم من الواد والولعة ونتكلم بجد


الف الف الف مبروك لمصر


وميت الف تحية للحضرى اللى كان شايل اخر ماتشين لوحدة يظهر مكنش عندنا دفاع كويس اصل انا مش بفهم فى الكورة اوى بس فرحانة لمصر اوى انها فازت وعماله اغنى من ساعتها يلا غنوا ورايا


وكعبو كعبو كااااااااااعبويجينى وانا الاعبه لاااااعبو


دخل الجنينة ودخلت ومعاه قطف الليمونة وقطفت معاه بس حلفت انى مقعدش معاه


وكعبو كعبو كااااااااعبو


المهم يعنى بعد وصله الردح...ااقصد الغنا


فى حاجة غاظتنى وحرقت دمى وطفت الفرحة من جوايا


وهى الملايين اللى اتفرقت على اللعيبة

ليه الاستفزاز دة يا جماعة الناس عاوزة 200 جنية زيادة عشان الكادر واللى نفسه الحوافز تطلع بسرعة اللى هما اصلا 20 جنية عشان يشترى جذمة للواد

وانتو بتفرقو فى ملايين


مهما كان الكورة مش جد لكن الفقر اللى مصر وصلتلو جد جدا واصبح واقع مؤلم


كيلو اللحمة ب40 جنية


حتى الفول بقة بيتأمر وبقة 6 جنية للكيلو

ودة كتير على نبات زى الفول


وانتوو رايحين تحرقوا دم الناس بالملايين اللى بتتفرق


دلوقتى الملايين طلعت؟


خلاص يعنى ديون مصر اللى هى حجتكم خلصت والمشاريع اللى مستهلكة فلوس الدولة انتهت والتضخم الاقتصادى اختفى


كل ده اختفى وبقينا بنفرق ملايين


فاكريين البوست اللى قولت فيه البلد دى فيها خير لكن مش بيتقسم كويس


وهو دة خيردليل على كلامى


اه البلد طلع فيها ملايين لكن الملايين بتروح لاصحاب الملايين اما الملاليم بتروح لاصحب الملاليم


والغنى يزيد غنا والفقير يزيد فقر


واه يا بلد عايزة ولد


يحكمهاويشكمها


وعجبى يا ابويا عجبى

فجأة بقيت بقول شعر :)


بعد كدة لما تحبو تكافئو اللعيبة خلوها فى سركم الناس مش ناقصة حرقة دم


هما خلاص رضيو بالهم


حتى الهم لاوى بوزه ومش راضى بيهم

انتظر تعليقاتكم

تــــــــــــــــــــــــــــــــــاج

هل توافق على حذف خانة الديانة من البطاقة الشخصية ؟

اكيد لا طبعا دى هويتى وتتكتب فى البطاقة قبل اسمى

ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

شوية عيال لاسعة مش لاقيين حاجة يضيعو بيها وقتهم غير كدة

, حرية شخصية مين يا عم دة انا سمعت ان فى حديث للرسول بيقول سحاق النساء زنا

انا طبعا مشفتش الحديث بعينى فى كتاب ومقدرش اقول انى متاكدة منه

لكن اللى يمشى على الستات يمشى على الرجالة اللى بعتبرهم مقرفين فى الموضوع دة اكتر من الستات ولا مليش اصحاب منهم انا مصاحبش الاشكال دى وماما كمان قالتلى متكلميش العيال الوحشين

وانا مش بعترف بيهم الا كظاهرة بالفعل موجودة ولكن لا اؤيدهم اطلاقا

هل تعتقد بوجود إضطهاد للمسيحين فى مصر ؟

اضطهاد لا الموضوع مش كبير اوى كدة فى بس شوية احتقار ليهم ولدينهم

من هو الشخص الذى تختارة لرئاسة مصر ؟

والله مش مهم مين لكن فى شوية صفات وسمات اساسية لرئيس الجمهورية منها انه يكون غنى عشان ميجيش جعان ويبقى محدث نعمة وكرشه لسة فاضى بالاضافة الى الفراسه والحنكة والذكاء والدهاء

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

هضم ناس مصلحتها على البلد دى بجد اوى على الاقل عاوزين يطوروها عشان تبقى دوله عظمى وهما اكيد ليهم مصلحة فى كدة ودة راى شوية تابع لانصار مذهب المنفعة الحدية

يعنى هما هيطورو مصر مش عشان سواد ترابها لكن عشان مصلحتهم فى كدة يعنى هات وخد

وملكمش دعوة ببتوع المنفعة الحدية دول الكلام دة كبير لكن اللى بيقرا فى الفلسفه هيعرفه اكيد

وانا مش هخلى حد يشارك فى الحكم على اساس دينى كلنا مصريين وعايشين تحت سما البلد دى ولما الحرب هتحصل مرقص ومحمد هيطلعو الجبهة سوا

لكن طبعا الاخوان المسلمين فى الحكم لالالالالالالالا

لانهم عاملين الاسلام غطاء عشان يوصلو للحكم بيفكرونى بالحملات الصليبية اللى جاءت تحت شعار الصليب وحماية مسيحين الشرق وقتلوهم مع المسلمين لما دخلو عادى يعنى

سيبكم من الاخوان اللى هما سواق التاكس وعم احمد البقال دول ناس معمول ليهم غسيل مخ

خليكم مع التقايل الكبار

فى رأيك الشخصى .. ما هى أفضل مدونة على بلوجر قمت بزيارتها ؟

كدة هتزعلو الناس مننا لكن كل مدونة ليها طعمها بما انى طفسه

للذكور فقط : أيهما تفضل كزوجة .. إمراءه عاملة ، أم ربة منزل ؟

طبعا انتو اكيد عارفين انى مش ذكور عشان اجاوب ولا انتو شاكين فى انوثتى هههههه

للإناث فقط : هل توافقين على الزواج من رجل مطلق ؟

لا لانى مش هكون حب حياته لانه اكيد كان بيحب الاولى وانجرح وقال الجمله الشهيرة الستات ملهاش امان كلكم زى بعض والجو دة وهى مش ناقصة عقد

اذا تزوجت وأنجبت ولدين وبنتين .. أى الأسماء تحب أن تسمى ؟

محمود وعمر,سمو ومها

هل تعتقد أن توريث الحكم فى مصر . . سيتم فعلا أم لا ؟

هو انت شايفنى فاتحة المندل لكن ممكن بنسبة 60% هيحصل

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

هعمل زى الست اللى كانت قاعدة جنب اللمبى فى امتحان نحو الامية

ههههه هههههههههه هههههههههههههههه ههههههههههههههههههههه

لكن طبعا حكومة مبارك بتاعة انشاء وافتتاح الكبارى

وانتظار كبار الزوار فى المطار

ثم لمن تمرر هذا التاج ؟

لكل الناس اللى بيزورنى وبيعلقو على البوستات اتفضلو مدو الماوس ومدو اديكم انت مش غرب البيت بيتكم خدو التاج دة

لكن اللى مش بيسيب تعليق تمد ايدك على التاج اقطعهالك

انتظر تعليقاتكم

عدنا من الفاصل

ميرسى لكل واحد وواحدة سابولى تعليق معلش اتاخرت فى الرد على التعليقات

الواد اخويا الصغير السوسة النوسة كونوسه شاف فيرس على الجهاز فضل وراه لحد ما عمله عملية استئصال

وكان هيضحى بالام والجنين

عشان الاب يعيش ونزل نسخة الويندز ست مرات ربنا يكرمه الواد تعب اوى وانتو وحشتونى اوى

تحيه ممزوجة بحبى لكل من يزورنى ويترك تعليقات

اللى مش بيسيبو تعليقات دول لو شوفت واحد فيهم هعضة عضة قوية ينتج عنها الالتزام بال21 حقنة

فى اسبوع واحد عداد الزوار داخل على 90 زائر جديد ومعندينش نفس العدد من التعليقات

والله شكلكم بتستخسرو فيا تعليق لحسن الكيبورد يدوب من كتر الاستخدام اصل الكيبوردات غليت مانا عارفة

انتظر تعليقاتكم

وائل الابراشى مع البهائيين

شوفتو حلقة وائل الابراشى مع البهائيين الموجودين فى مصر؟

عجبتنى

مبدئيا انا مش بهائية انا مسلمه سنية بقول اشهد ان لا اله الا الله وان محمد رسول الله

وكمان انا مش متحيزة للبهائيين

لكن الحلقة اللى انا شوفتها امبارح بليل وانا متكلفتة فى البطاطين وباكل شيبسى

وكنت متغدية حمام محشى وشبعانة ودفيانة وكل دة

كنت مع البهائيين فى طلباتهم

كان فى واحد بهائى عنده مشكلة انه عندو ولد وبنت توأم مش عارف يطلع ليهم شهادات ميلاد لمجرد انهم بهائيين

الحكومة مش عاوزة تعترف بيهم

مشكلتهم ظهرت من اول ما الحكومة قررت تعمل بطاقات الرقم القومى

رفضو يعملو ليهم بطاقات لكن اللى ليه واسطه عمل بطاقة

عاوزنهم يكتبو فى خانة الديانة مسلمين مثلا عشان يقبلو والبهائيين رفضوا قالو ان ده غش

وبصراحة دة اقتراح عبيط

لان ممكن واحد منهم يكون بهائى مكتوبله فى البطاقة مسلم يروح يتجوز مسلمة وهو اصلا بهائى

وكمان خانة الديانة فى مصر اربع خانات مسلم ومسيحى و يهودى و اخرى

متحطولهم اخرى وخلاص

البهائيين محدش سمع عنهم ولا عاوزين حد يعترف بيهم ولا هما عاوزين يضروا الاسلام ولا هما دودة تنخر فى عضد المسلمين زى ما الشيخ الخرفان دة قال

والا يبقى المسيحين واليهود المصريين كمان بيأذو الاسلام

وفى الاول والاخر هما مصريين واحنا اللى عملنا ليهم وزن وسمعنا الناس بدينهم

لو كانت الحكومة استمرت زى ما هى مستمرة فى اصدار بطاقاتهم وشهادات ميلادهم ووفاتهم مكنش حد سمع بيهم

لكن ازاى بقة نسيب الناس فى حالها؟

البهائية موجودة فى مصر منذ اكثر من 100 سنة وكان بيطلع ليهم بطاقات وشهادات وفاه وميلاد وكل حاجة كانت ماشية عادى ومحدش سمع عنهم

وكان فى دكتورة بهائية فى الحلقة بتقول ان الوضع خلاص اصبح لا يحتمل لان فى موظفين بهائيين كانو بيشتغلو فى الحكومة وكانت الحكومة بتستقطع جزء من رواتبهم عشان المعاش

ولما مات رفضو يعملو لزوجها شهادة وفاة ومعرفتش تعمل معاش

تعيش منين الست دى

وسيدة انجبت ومعرفتش تاخد اجازة وضع يعنى تروح وهى نفسه

اطفال وصلو لسن المدرسة مش عارفين يروحو مدارس لانهم ملهمش شهادات ميلاد

طب تخيلو ان الحاجات دى كلها بتحصل فى مصر بس البهائيه هى الديانة الاعم والمسلمين هما الاقلية

سيدة مسلمة مش عارفة تاخد معاش زوجها لمجرد انها مسلمة

سيدة مسلمة انجبت ولازم تروح الشغل وهى نفسه

اطفال مسلمين مش عارفين يلتحقو بالمدارس

اتضايقتو صح؟

يبقى لية نقبل على غيرنا اللى منقبلهوش على نفسنا

يعنى مصر بتعمل بطاقات لليهود المصريين اللى هما اعداء الاسلام رسمى ولا يؤمنوا بتاتا بسيدنا محمد ومش عاوزة تعمل بطاقات للبهائيين المصريين اللى بيقولو لا اله الا الله وبيؤمنو بسيدنا محمد مع بهاء الله اللى هما لا يفكرو بتاتا فى ايذاء الاسلام او المسلمين
واذا كانو بيقولو ان محمد مش اخر رسول المسيحين واليهود بيقولو انو مش رسول اصلا فبلاش نمسك فى حجة هتخلينا نعادى كل الديانات بسببها
ولا هما عشان اقليه يبقى ندوسهم
الاسلام كان اقليه وكل الديانات حاولت تدوسه
انا مش بقول اديهم فرصه ينشرو دينهم انا بس بقول مطالبهم شرعية ومن حقهم تنفيذها

طب عاملوهم معاملة اليهود طيب دة حتى متساوش باليهوووووود

حرام

والناس كانو صرحاء وواضحين قالو مش عاوزين حد يعترف بينا ولا احنا بنعمل دعوة لعقيدتنا بس اكتبولنا فى خانة الديانة (اخرى) وخلاص واحنا راضيين المهم تتطلعو البطاقات وشهادات الميلاد والوفاه
يا جماعة هما احرار فى الديانة اللى يختاروها ما يولعو بيها هما وبهاء بتاعهم ده
دى حاجة بينهم وبين ربنا
وازاى نقول انهم مرتدين
ارتدوا عن اية اصلا هما مش مسلمين خااااااااالص عشان يرتدو عن الاسلام

يا جماعة البهائيين ليهم مقابر خاصة الحكومة فى الماضى وهبتهم الارض دى عشان تبقى مدافن ليهم يعنى هما فعلا مننا واهلنا وناسنا ومش جداد فى البلد دى

وبعدين احنا دين تعب من الاضطهاد ايام الدعوة ودلوقت كمان

والرسول عليه الصلاة والسلام مكنش بيجبر حد على دين وكان بيسبهم براحتهم ويدفعهم الجزية وخلاص ليه احنا دلوقت نسينا ده وعاوزين البهائيين يطلعو بطاقات مسلمين

وبعدين الدستور نص على حرية العقيدة ولاهو نص على حرية اى عقيدة ماعدا البهائية؟

احنا بنرجع لورا ايام ابو جهل ولا بنمشى لقدام يا مسلمين يا مصريين

اه يا بلد
على العموم رايى انا قولتو وخلاص
شوفو اللينكات دى
لينك1
لينك2
كفاية عليكم كدة اللى عاوز فيديوهات تانى يدور بنفسه
انتظر تعليقاتكم

بطلوا تغيظونى

ارجوكم ارجوكم

كفاية بقة كدة بطلوتغيظو فيا

كل ما ادخل بلوج الاقى كل بلوجراتى حاطط الاغنية اللى بيحبها

عشان زواره اول ما يدخلو يسمعوها

يا اما تقولولى بتعملوها ازاى

يا تتفضلو مشكورين تمسحو كل الاغانى اللى عندكو على بلوجاتكم

:P

والناس اللى بتدخل بدون ما تسيب تعليقات

شايفين عداد الزوار اللى حطاه الاسبوع ده عد كام زائر

يعنى معنى كدة ان زوارى كتير لكن مش بيسيبو ليا تعليقات

هو انا مستاهلش ولا اية؟

دة لو كل زائر ساب تفه واحدة

هيبقى عندى كمية تفافه محترمة اعملى بيها كام تعليق

اوعو تتفوا انتو اتهبلتو ولا اية

بس لما يبقى عندى فى العداد اكتر من 100 زائر لازم يكون عندى على الاقل 100 تعليق

اتنظر تعليقاتكم دااااااااااااااائما

الى كل عريس يهمه الامر

طبعا فى البداية احب اوضح انى بتكلم عن جواز الصالونات

لما يكون عريس رايح يشوف واحدة ميعرفهاش ولا تعرفه

واول مرة بيشوفو بعض ليه متوقع انها هتقوم تقعد على حجرك

ولا تقعد تهزر معاك طول القعدة وتديك مقلب حرامية وانت معدى

وتقول نكت وكفك ياااااااض

وحلوة النكتة دى واقول تانى
بخيل راح عشان يتجوز ابو العروسة بيقولوا احنا عايزين مهر عشر تلاف جنية البخيل قاله: ايه عشر تلاف جنية ده انا معروض عليا بالفين وحامل كمان؟؟؟

هق هق هق

ويلا السقفة الجامدة وهب لأ لأ لأ زغرتى يا منحرفة

هى هى هى هى
لولولولولولوى



الرحمة يا عرسان

البنات (المحترمة طبعا) بتبقى قاعدة مكسوفة وخايفة تتكلم تاخد عنها انطباع وحش وهى مش وحشة تقوم لما تتكلم فى حدود الاسئله الموجهه ليها تبقى بنت قفل وكشرية ومش بحبوحة

طب يعنى هتبحبح ازاى حضرتك لو بحبت معاك يبقى ممكن تبحبح مع اى حد ماشى فى الشارع توقفة وتقوله احنا برنامج بحبح بحابيح ممكن نبحبح مع بعض شوية

وممكن تبحبح مع اللى قاعد جنبها فى القطر ولا فى الاتوبيس

يعنى هتكون بنت لاى حد وبتاعة اى حد عاوز يتكلم

انا عن نفسى لو فى قعدة جواز ولقيت بنت عماله مدياها وفاتحة على الرابع مش هستريحلها
ولو ان السهوكة مش دليل على الاحترام فى بعض الاحيان

طبعا انا مش بدعو البنات للقفلنة

بس انتى كمان لازم تحسسية انك انسانة مش مملة

ويا اخواننا العرسان البنت غير الست

واللى واخدة على التعامل مع الرجالة والشباب غيراللى ملمومة فى بيت ابوها وكرامتها وسمعتها تهمها

راعوا كل الكلام دة وانت بتختار عروستك

لاحظ انها فعلا مش عارفة تتكلم لانها متعرفش اية اللى يضايقك واية اللى يبسطك واية هو حكم مقياسك على الناس

ومفيش اساسا مواضيع بينكم عشان تتكلمو فيها

ارجو ان ميطلعليش عريس متخلف بعد كل دة يقولى انا مش فاهم حاجة يا مزمازيل

هقوله هو انت بتاع يا مزمازيل

وهقوله سمى كدة واقرا الفاتحة واقرا من الاول واتهجى حرف حرف يمكن تفهم حاجة تنفعك فى دنيتك

اصل الجواز ادب مش هز كتاف

انتظر تعليقاتكم

من هى العانس؟

اسئلة على بالى من فتره
امتى نقول على واحدة عانس؟
هل العانس هى اللى قاعدة فى البيت نفسها تتجوز ومش لاقية عريس مناسب ليها؟
ولا العانس هى اللى مش بيجى ليها عرسان من اصله؟
وهل البنت اللى قررت تشوف حياتها وتشق طريقها بايديها لحد ما سنها كبر ينفع يتقال عليها عانس؟
ولا مينفعش عشان هى اللى اختارت كدة؟
يعنى العانس دى تكون عانس لو اختارت انها تكون كدة ولا العانس هى المجبرة على عنوستها؟
وعلى العموم ليه نستفز اى بنت بكلمة عانس دى
كلمة مستفزة اوى لدرجة انها بقت عاملة زى الشتيمة؟
ليه مفيش تعبير تانى ارحم من كدة؟
لية مفيش رأفه بظروف البنت دى وحالتها النفسية؟
الموضوع دة مش عارفة افكر فيه لوحدى
فكروا معايا ارجوكم
وجابوا على اسئلتى بليز
وانتظر تعليقاتكم

تعليق جالى_وكان لازم ارد عليه

مقدرش اأقول مبروك ... إنتى إتخطفت حياتك و شبابك و حب الجامعة إللى كان محتمل تمرى بيه و التجارب إللى كان ممكن تمرى بيها كلها و لو تفوقتى كان ممكن تقدمى على منحه في جامع في الخارج و تفوزي بيها و تسافرى وحدك عصفور حر طليق يلف و يشوف ... قولى لكل دا وداعاعندك تمنتاشر سنة و تتجوزى جواز صالونات ؟ .. غريبه دي .. أمال العواجيز يعملوا إيه

دة تعليق وصلنى من احد زوار بلوجى

وقولت ارد علية

اولا كدة بالصلاه على النبى قبل ما نستفتح ونكتب محدش يفهمنى غلط

افهم كلامى زى مانا قصدى تفهمنى بالظبط

اولا بتقولى انتى اتخطف شبابك وحياتك وحب الجامعة

ممكن اولا توضحى يعنى ايه حب الجامعة احب طالب فى سنى او اكبر باربع سنين عشان نحب بعض بس

اسفة انا مش من النوع دة انا مش بحب لمجرد الحب والتسلية

انا طول عمرى كنت اتمنى حب من النوع اللى انا فيه دة حب يتوج بالزواج

حب يعرف النور

حب امام اهلى وامام العالم كله

محبش انى اكون مستخبية او فى الدرا

او خايفة حد يشوفنى يروح يقول لاهلى او ايدى تتفعص من كترما تتمسك فى كل كافى شوب شوية

وافشل واحب تانى وافشل واحب تانى

مش انا ومش اسلوبى

ثانيا انا مش مجبرة على حب خطيبى وانا وهو بنحب بعض بجد مش عشان جواز تقليدى يبقى اهلى غصبونى

ان قعدت معاه وكلمته ولما عجبتنى شخصيته وافقت محدش ضربنى على ايدى وبابايا سألنى الف مرة وقالى لو مش موافقه مش مشكلة انتى مش مجبرة

وجميل اوى انك تحسى ان ماماتك اللى هى اقرب واحدة ليكى كبنت بتساعدك وتدعمك عشان علاقتك تستمر

وتلاقى الناس كلها فرحانه بحبكم وعاوزاه يزيد ومش هيبصولك النظرة اياها لو شافوكى لابسه نضارة شمس ومتخفيه عشان محدش يعرفك وانتى مع الجو بتاعك

وبعدين مش الفكرة اللى مضيقاكى اوى انه جواز صالونات

يعنى لازم يكون عرفنى برة وكنت الجيرل فريند بتاعته فتره قبل الجواز او الخطوبة

مش الصدفة هى اللى بتجمع الاتنين سوا

الصدفة دى بردة جت بس صادفت انه شافك فى البيت مع اهلك

نفس النتيجة واحدة لو كنت عجبته برده كان هيخطبنى

سواء شافنى فى الشارع او الشغل او الجامعة او غيره

مش عاوزه استخدم تعبير فظ لكن هى عاملة زى

تعددت الاسباب والموت واحد

هنا بقة تعددت الاسباب والجوازة واحدة

لانه مكتوبلى عند ربنا انى هقابلة وهتجوزه وهو نصيبى مهما كانت الطريقة اللى عرفنا بيها بعض

وكمان مش عشان احنا جواز صالونات متنشيين وكل واحد فينا بيرسم التت على التانى وانه احسن انسان فى الكون للتانى بالعكس دة عشان احنا كدة اتفقنا من الاول اننا نكون مكشوفين لبعض لان الحاجات دى الكدب فيها يضر

ودة اللى حصل واحنا دلوقت نعرف عيوب ومميزات بعض وكل واحد فينا متقبل التانى زى ماهو عليه

وحاجات كتير مش هتعرفيها الا اذا كنت بينا وقاعدة وسطينا

وبتقولى اتفوق واقدم منحة والكلام دة

انا الحمد لله بحب دراستى وكويسة فيها الحمد لله

وهو كمان مش ممانع انى اكمل تعليم وانى اخد دبلومة واعمل ماجسيتير او دكتوراه حتى

بالعكس هو ورايا وبيدعمنى ودايما يقولى زاكرى المذاكرة هى اللى هتنفعك انا كنت بذاكر ثلاثة عشر ساعة فى اليوم فى الامتحانات وكلام من ده كتير

وابقى عصفور حر طليق والكلام دة

قصدك عصفور لوحده صحيح حر لكن لوحدة

مش جنبه حد يسنده ولا حضن دافى يترمى فيه وقت ما يحتاج او وقت ما يضعف

كانت عاجبانى حريتى ولسة عاجبانى لانها لسة مستمرة وزادت حدود حريتى اكتر من يوم ما عرفته كمان

لكن مكنش عاجبنى وحدتى

وكفاية انى فضلت غالية وعزيزه فى ايد واحد بجد بيقدرنى واختارنى اكون شريكة حياتة

مش واحد عاوز يحب حب طلبه وخلاص

وكمان انا شباب الجامعه عمرهم ما ملو عينى التيشرتات الضيقة والبنطلون الساقط

مش دى الرجالة مينفعش يتقال عليهم رجالة اصلا
انا مش قصدى المظهر لوحده انا قصدى اللى ورا المظهر دة اكيد انتو فاهمنى
انا مش بحكم على حد من مظهره

وانا ميملاش عينى غير راجل بجد زى اللى معايا الناس تحترمه وانا كمان

وحب الجامعة اتعرض عليا بدل الواحدة عشرين

وانا كنت برفض لانى مش عاوزة كدة

انا عاوزة حب يتوجه الزواج الناجح انشاء الله

واذا كنت هقول وداعا زى ما بتقولى

هقول وداعا لوحدتى ولكتم اسرارى جوه قلبى وشيل همى لوحدى لوحصلى مشكلة او اى حاجة

اصبح عندى اللى احكيله واشتكيله عن اللى جوايا

متعة احساس بالحب وان حد جنبك متتكلميش عنها ولا تقولى رايك فيها الا اذا جربتيها عشان يكون راى عن تجربة وخبره

وبعدين مش العواجيز بس اللى بيتجوزو جاوز صالونات وجواز الصالونات مش للعواجيز بل انه اثبت ناجحه فى حالات كتيرة وبصى حواليكى كويس

لانك لما بتختارى شريك حياتك بتختاريه بعقلك ولازم تشوفيه بعين الحقيقة وتعرفى عيوبه ومميزاته وهو مناسب ليكى ولا لا

بدل ما مرايه الحب تعمينى

واخد بنى ادم فيه عيوب غير قابله للتصليح

تفكير خالى من العاطفة اللى ممكن تاثر على اختياراتك الصح

واحب اقولك انك مجربتيش الحب ولا تعرفيه وكمان بعد ما تعملى كل حاجة فى حياتك انتى كنتى عاوزاها هتلاقى نفسك فى سن غير مناسب للجواز ويا اما القطر هيفوتك ويا اما هتتجوزى واحد كان متجوز قبل كدة ومعاه اولاد او ارمل او مطلق

المهم انه هيكون جرب الحب قبل كدة

وعمرك ما هتكونى انتى حب حياتة

لانه حب قبل كدة

والحب الحقيقى مرة واحدة فى العمر ولا يتكرر

ولا انتو رايكم ايه يا جماعه

انتظر تعليقاتكم
ملحوظة:انا تقريبا عارفة مين اللى كتب التعليق دة لان اسلوبه فى الكتابه انا عارفاه وواضح جدا لكن انا مش زعلانة من التعليق دة
وعلى العموم ان بعض الظن اثم

حالة ادمان

موقع ظريف شوفته واستخدمته بيقيس درجة ادمانك للبلوجنج

بيسألك 14 سؤال ولما تجاوب عنهم بصدق هيديك النتيجة بصدق والنتيجة دى هى اللى بتقول انت مدمن بنسبه قد اية للبلوجنج

انا طلعت مدمنة بنسبة 74 فى الميه زى مانتو شايفين فى الصورة اللى فى البلوج كدة

جربوه هيعجبكم

انتظر تعليقاتكم

بدايتى فى كار البلوجرية

كانت جاتلى فترة كنت زهقت من النت وانا طبعا مش بشيت مع عرب او مصريين لان اكيد كلنا عارفين يعنى اية شات عربى او مصرى فكنت عايشة على الاى سى كيو شوية ايام لحد لما زهقت من الشات كله وبدات استفاد بجد من النت وكنت بقرأ كتب علية ومعلومات وحاجات كتيرة وسعت ثقافتى وفكرى

ثم فى يوم من الايام لاح لى نور بعيد فى الافق

(شوفتى الكلمتين النحوى دول يا اختشى)

كنت مرة بدور على صورة لمطربة بعشقها وهى سميرة سعيد

دخلت جوجل وكتبت سميرة سعيد وبعمل بحث فى الصور دوست على صورة دخلتنى لاول بلوج شوفته فى حياتى ومكنتش اعرف يعنى اية كلمة بلوج من اصله كان بلوج واحدة اسمها رشيدة وبتشتغل صحفية قعدت والله يومين كل يوم افتحه واتفرج وقريتة كله فى حوالى 36 ساعة متواصل لاعجابى بفكرة ان الواحد يكون عنده مكان بكتب فيه اللى هو عاوزه وساعتها قررت انى لازم يكون عندى بلوج وعملته ونزلت اول بوست وكانت دى البداية

رشيدة اخدت ايميلها وكلمتها على الايميل حبه كدة وبعد كدة لما غيرت ايميلى بطلنا نتكلم

بس هكلمها تانى

عارفين ليه؟

لانها عسولة اوى وانا دايما متابعة البوستات بتاعتها

فى البلوج الاولانى بتاعها اوالتانى كمان لما بدأت فيه

ودة كان موجز الانباء كانت معكم

مها الديب من خلف الكيبورد

انتظر تعليقاتكم