اولا كدة بالصلاة عالنبى مش عاوزة حد يقولى انى بدعو للمثالية
ومش عاوزة حد يقولى انى بكره البلد دى
يعنى من الاخر عاوزة لبن العصفور
المهم
لية دايما نتكلم على مصر على انها اسوأ مكان فى العالم وانها سودا وكل حاجة فيها وحشة اوى
صحيح ممكن حكومتنا تكون بتستحق لقب اسوأ حكومة عن جدارة لكن دة ملوش علاقة بالارض والسما والناس والمكان اللى فيه حبايبنا وقرايبنا
ممكن نكره حكومتنا لكن مش لازم ابدا نكره بلدنا
البلد دى مش بلد الحكومة
دى بلدنا احنا احنا اصحابها الحقيقين واحنا اهلها
تعالو نغير شوية من نفسنا وبلاش حالة الاحباط واليأس دى
يعنى مثلا دايما نقول ان بلدنا مش نضيفة طب ما احنا اساسا اللى بنرمى الزبالة
ويوم ما يحطو باسكت الزبالة يتسرق
_البريمة اتسرقت وبير الجاز اتردم_
الخالد فى قلوبنا:رشدى اباظة فى هاميس
بجد البلد دى تحير لكن مش وحشة ماهو اللى سرق الباسكت مش لاقى ياكل هيبيعو ويجيب بتمنه اكل
بقت قاسية علينا
لكن محتويانا يعنى انت مثلا لما تهاجر بطرق غير مشروعة ويرجعوك تانى هترجع على فين ؟؟؟
على المانيا
سلامات يا المانيا ساعتها مش هتلاقى حتة تتاويك غير بلدك عشان كدة مينفعش نكره الارض اللى عايشين عليها والا بعد كدة هنتعلم نكرهه نفسنا وكمان هنفرح فينا الاعادى اللى عينهم على البلد والمية 3 الوان ولو جالنا احتلال احنا اللى هنساعد جيش العدو
هو صحيح احنا فى حالة غزو واستعمار ثقافى بسبب المواد الاعلامية الاجنبية ومحاولة فرض الامركة الثقافية على شعوب تتنافى عادتها ومعتقداتها مع المواد دى
لكن بلاش نسود الدنيا فى عنينا كدة
وفيلم حين ميسرة دة ولا حين مسخرة ولا اسمو اية
دة اية السواد الناقع دة هى خلاص بقت كدة البلد سودا كلها شواذ ومثليين واطفال شوارع وحرامية وشحاتين وابصر اية ومدرك اية
البلد دى فيها دكاترة وعلماء و4 واخدين نوبل
البلد دى مش وحشة
هيجى واحد يطلعلى ويقولى واحنا نجوع عشان خاطر الارض اللى متوايانا يا مزمازيل
هقوله اولا استهجى كلمة مزمازيل صح ثانيا بطل كل شوية تطلعى تخضنى بصوتك دة
هقوله طبعا لا
وعندك حق البلد دى قاسية اوى على شعبها مع اننا عندنا مقومات دولة عظمى بس مفيش حسن استغلال للثروات الطبيعية وكمان مفيش حسن تقسيم للخير اللى بيطلع عن البلد دى
وعندوكو حق تتفرسوا لما تلاقو واحد فلاح فى الغيط طالع عينة من الصبح لحد بليل فى الغيط عشان الف ولا الفين جنية
وتلاقو واحد تانى بالتليفون بيعمل ملايين وبيشترى بدلة بنفس الالفين جنية دول
ولازم تحس بضيق لما تلاقى شاب ذكى معاه شهادة محترمة وقاعد فى البيت مش لاقى شغل وابن الوزير الفلانى اللى مكنش نافع وماشى بالعافية فى التعليم مدير شئون الدولة لمش عارفة اية
وحرام كمان لما يجو ينيلوها ويخصخصو التعليم عشان يدارو على وكستهم وغلطهم الاول فى فتح التعليم على البحرى وانخفاض مجموع الالتحاق بالثانوى العام تبقى انت قاعد فى الديسك جايب270 وصحابك جنبك جايب 190
اكيد لازم نتفرس من حاجات كتير
ومش غلطان ولا حد يلومك لما تهج من البلد بطريقة شرعية او غير شرعية
ومتزعلوش لما يجى اليوم اللى متلقوش فيه مهندس مدنى واحد فى مصر بعد قلة عدد المهندسين الملحوظة اللى لو استمرت على كدة مصر مش هيبقى فيها مهندسين متزعلوش لما يهجو
اصل الاوزعة احمد عز بيستعبط ويرفع سعر الحديد وينزلو بمزاجه
ولما مصر ميبقاش فيها بنا وتعمير
ابقو خلو مصر تتقدم بينا بقة
والله ليحطو الاعلان دة فى دولاب الذكريات
فى خلال سنين معدودة اهل مصر هسيبوها وتتعرض للبيع فى مزاد علنى
والا اونة الا دوا الا تريا
مصر بتتباع يا رجالة
مصر بالطريقة دى لايمكن تتقدم بينا
وساعتها هلخص الكلام دة كله فى كلمتين
انى يا مصر بعشق ترابك
لكن ترابك دخل فى عينى
وعماها ومعنتش شايفة جمالك فين
4 comments:
طب انا شاب لسة فى الكلية عارف انى لما اتخرج مفيش شغل وبحاول على قد ما اقدر اسقط فى الكلية لحد ما الاقى شغلة مضمونة برة وساعتها هسيب الكلية خالص واروح اشتغل
كل الاحباط دة وعاوزانى احب مصر لية
الحياة سودا اوى قدامك وانت بتحاول تسقط فى الكلية على قد ما تقدر دى كلمة غريبة اوى
لو كانت مصر نفعتك كنت حبتها انما طالما ظروفنا كدة يبقى نكرهها
يعنى العلاقة بينا بقت منفعة وبس؟؟؟؟
لكن بردة انا مش بدافع عن موقف الحكومة السلبى ناحية الشباب
السلام عليكم ورحمه الله وبركاته ،،،
والله أنا معاكى فى كل كلمه بتقوليها أنا فعلا بفكر كده وبحب مصر جدا وبزعل أوى لما الناش تضلم الدنيا فى وضى فى كل حاجه كده بحجه ان البلد وحشه وبرضه بزعل لما أشوف شاب زى اللى علق على الموضوع هو اللى يسقط نفسه ازاى ده مش ممكن لهذه الدرجه يا جماعه علشان خاطرى زى ما بنشوف مصر بحجاتها الوحشه ممكن برضه نفتح عنينا كويس ونلاقى حجات حلوه فيها تقدر تعدى الحجات اللى مش كويسه وتفوقها كمان
والله بحبك يا مصر
الطبيبه الاديبة توكا
والله عندك حق
بس برضهمصر لازم تعملنا حاجة
مش هنفضل نحب من طرف واحد كدة على طول
Post a Comment