لولولولى....عقبال عندك يا ام احمد

لولولولى .....عقبال ما تشوفى بناتك يا ام نوسة

وسط جو جميل بين ام احمد وام نوسة

بهزر طبعا

تمت خطوبتى انا ووائل خطيبى

حسيت انو مينفعش صورتى تبقى صورة خطوبة فى البروفايل وانا بلبس الدبلة من غير ما اعرفكم بالموضوع دة

عشان كدة قررت احكى ليكم ملابسات الحادث

أأأأ......اقصد الظروف اللى جمعتنا

خطوبتنا كانت جميلة وقصة تضحك كل اللى يسمعها

مبدئيا هى خطوبة صالونات

كانت عمة وائل بتدور ليه على عروسة

وقالت لمامتى تدور معاها بما انتو عارفين ان ماما خاطبة او عايشة دور الخاطبة بس عندها حق جمعت 300 راس فى الحلال

عشان مطولش عليكم

ماما سمعت كلام عمتو وبقت عمالة بتدور لية على عروسة

وبالفعل جابتله عروسة دكتورة صيدلية

مرضاش يروح يشوفها لاسباب خاصة

المهم عمة وائل بتكلم طنط محبات احدى الصديقات المشتركات بينها وبين ماما

عمة وائل: وام مها بتدور على عروسة معايا لابن اخويا

طنط محبات:(باستغراب) بتدورلك على عروسة طب ما هى عندها عروسة

عمة وائل:بس هى بتقول ان بنتها صغيرة

طنط محبات:صغيرة اية بس دى فى الجامعة

عمة وائل:(باستغراب) بجد والله؟

طنط محبات: اه والله واسمها مها ومواصفاتها كذة وصفاتها ونعاتها وانتى عارفة انها من بيت طيب

تنتهى المكالمة وتغلق عمة وائل السماعة وتتصل بماما

وتديها دش تمام عشان ازاى يبقى عندها بنت فى سنى ومتقولش

عمة وائل: ازاى يبقى عندك بنت على وش جواز ومتقوليش ولا وكمان بتدورى على عروسة

ماما: عروسة اية بس دى مها عندها 18 سنة ميجيش فى بالى انكم تكونو بتفكرو فى السن دة

عمة وائل:احنا جايين نزوركم بكرة

ماما: بس.. اصل...أ

عمة وائل:اصل وفصل اية بكرة الساعة 8 انشاء الله

ماما:تشرفونا انشاء الله

ماما تغلق السماعة وتيجى تقولى انتى يا بلوة ياللى قدام التليفزيون

(اصل ماما تحب تهزقنى..أأ.. قصدى تدلعنى)

انا: ايوة يا ماما

ماما:تعالى يا تحفة جالك عريس... انجغة جالك عريس يا بت

انا :(زى العبيطة فاتحة بقى والريالة بتنزل)عريس؟!!!! ازاى

ماما: هو اية اللى ازاى زى الناس زى اى بنت

ملحوظة: اتضح فيما بعد ان وائل مكنش اول عريس بس ماما مكنتش بتقول عشان متشغلش بالى

ماما: وجايين بكرة الساعة 8 هو وعمتو وطنطك محبات

انا: طب ازاى انا مش جاهزة

خلاص اوك حتى يشوفنى على طبيعتى من غير تزييف بدل ما احط مكياج ميعجبوش محطش معجبوش ما هو العرسان بتتلكك اليومين دول

ملحوظة_جه وائل ومكنتش رحت لكوافير ومحطتش مكياج كمان قولت بلاش ابقى عروسة من اياهم عروسة تكنى كلر فول اوبشنز وكل الالوان متاحة ومشترتش طقم جديد

المهم جه وائل انكسفت ادخل الاول

ورفضت رفض تام تام تام انى ادخل وفى ايدى صنية عليها عصير وادلقها على العريس وجو الابيض والاسود دة

دخلت بعد نص ساعة سبتهم قاعدين وقعدت اتفرج على ام بى سى فور

ونسيت ادخل خالص لحد ما طنط محبات جت خدتنى من ايدى

وقعدنا كلنا سوا وهو قعد يتكلم وانا قعدت اتكلم بس احنا الاتنين مكلمناش بعض كل واحد فينا كان بسمع التانى صوته لحسن حد فينا يطلع اخنف ولا وحاجة

ومقلكوش على الضحك اللى بدأ من ساعة ما دخلت وانا كل كلمة اقولها يستظرفوها ويضحكو انا طبعا مكنتش بضحك لانى خلاص حافظة الكلام اللى بقولوه

المهم

الكلام دة كان يوم الاحد وعجبنا بعض اوى ووافقنا احنا الاتنين

غاب الاثنين والثلاثاءيوم خرج ويوم كان فى ماتش للاهلى ففضل انو يتفرج عليه وميجيش ولا يتصل حتى

المهم جه يوم الاربعاء ومعاه العيلة كلها

باباه ومامتة وعمتو وبنتها وجوزها وبناتها الاتنين واخوه الاصغر منه واخوه الكبير ومراته اللى هى كانت لسة عروسة من 10 ايام وقتها

المهم طبعا انتو عارفين ان انا ولا يهمنى انا اعلامية كبيرة وواخدة على الجماهير الكتير ودايما عندى حضور

دخلت اسد عالكرسى وكلمتهم كلهم واحد واحد وارد ردود تمام وعجبتهم وعجبونى

وقررنا نشترى الشبكة ونعمل الخطوبة

يعنى بالملخص

الاحد وائل شافنى

الاربعاء قرينا الفاتحة

الخميس جبنا الشبكة

الجمعة(اية اجازة رسمى)هى شغلانة ولا اية

السبت اول يوم من شهر تسعة خطوبتى

الاثنين:حمايا العزيز سافر الكويت

ولكم ان تتخيلو انا روحت اخترت الكوافير والفستان والشبكة واشتريت الاكسسواروالبرفان والكلام دة كله فى كام ساعة

اه طبعا كام ساعة امال كام يوم

مانتو شايفين الزنقة

كل دة فى يوم واحد لما رجليا اتكسرت

وتمت وحصلت الخطوبة واتخطبت فى ست ايام لواحد معرفهوش

ويوم الفرح كنا لسة بنسال بعض انت اسمك اية وانتى اسمك بالكامل اية وكدة يعنى

وعشان مبقاش كدابة كنت خايفة منحبش بعض

لكن حصل وحبينا بعض وحصل اللى يخلينا نتاكد انو حب بجد مش كدة وكدة

وطبعا مش هقلكو اية اللى حصل عشان ميبقاش فضايح

وبحبه بجد

وهو بيقول ان كل اللى محتاجة عندى

ما جمع الا لما وفق جوز مجانين واتخبطوا..أقصد اتخطبو يا اخواتى

وعقبال عندك يام حمدى وام نوسة وام كريم وام السيد وكل امهات المنطقة

هههههههههههههههه

اوعى حد يجى يقولى انهم جوزونى بدرى عشان احنا فلاحين

انا مدنية وانتو عارفين

انتظر تعليقاتكم