شد الحزام على وسطك غيرة ما يفيدك
لابد عن يوم هيجى ويعدلها سيدك
وان كان شيل الحمول على ضهرك يوم هيفيدك
اهون عليك يا حر من مدت ايدك
دى كلمات سيد درويش فى اغنية كلنا عارفينها
لكن احب اقول للاستاذ سيد درويش انى نفذت نصايحك وشديت الحزام على وسطى على امل انها تتعدل
لكن من كتر شدى للحزام فى كل مرة ترتفع فيها الاسعار الحزام اتقطع ومعدش نافع
وخد عندك
كيلو اللحمة 40 جنيه
الفرخة 25 جنيه
ازازة الزيت 11
ازازة الخل 7 جنيه
علبه السمنه 20 جنيه
كيلو العدس 7 جنيه
كيلو الفول 6 جنيه
كيلو الطماطم 3 جنيه
كيلو البصل 3 جنيه
كيلو الخيار 5 جنيه
كيلو الليمون 3 جنيه
كيلو الدقيق 3.5 جنيه
كيلو اللبن 5,5 جنيه
كيس لمكرونه 6 جنيه
كيلو الرز 5 جنيه
كيلو السكر 4 جنيه
كيلو الموز 3,5 جنيه
كيلو الجبنه البيضا22 جنيه
كيلو الجبنه الرومى 44 جنيه
كارتونة البيض 15 جنيه
وكمان عندك مواد البناء واللى عاوزة بوست لوحدها وتثبيت سعر الحديد عن 5100 هو الراجل قال مش هينزله عن 5100 لكن مقلش انه مش هيزوده
حمدان:اطبخى يا بهيه
بهية: اطبخى يا بهية كلف يا حمدان
حمدان: سيبك من اللحمة والحاجات اللى بتوجع البطن دى اعمللنا فرخة وحبه رز
بهيه:هات 30 جنيه
حمدان:ليه ؟ اومال لو قلتلك هاتيلى سمك ورزهتعملى اية ؟
بهية:هقولك هات 20 جنيه
حمدان:خلاص تعالى نقضيها عدس
بهية:انت بتتكلم عن العدس كدة وكأنه اكل الغلابه اللى زينا
(ارتفاع سعر الفول والعدس وخروجهم من قائمة طعام الفقراء)
حمدان: هو الاكل غلى كدة ليه يا بهية ولا انا اللى مش حاسس بالدنيا
(ارتفاع الاسعار بنسبه 166% من سنه 2005 الى2008)
انا المرة دى مش مع الشعب الظالم المفترى انا مع الحكومة التى لا حول لها ولا قوة وعشان الحكومة تهمنى اكتر من الشعب الطماع ده
انا مع الحكومة اللى بتقولنا انتو عندكم موبيلات واجهزة كومبيوتر فى بيوتكم وبتروحو مطاعم يبقى معاكم فلوس يبقى تستغنواعن الحاجات دى وتحاربو الاسعار بلا تكنولوجيا بلا تقدم بلا نيلة
مع اننا من حقنا اكل وشرب وتحضر ومعرفة للتكنولوجيا
انا بحذر الحكومة وبقول ان اى فساد الناس عرفته دايما بيحاول يسد بق الشعب عشان يعرف يسرق براحته وميخليش الشعب يتكلم عن الفساد
يعنى بيدوها كبسه ورز ولحمه وفراخ وملاهى زى دريم بارك وبرامج من نوعية ميلودى تتحدى الملل وخلينا نايمين فى العسل
لكن انتم عديتوا اى مستوى فساد ظالم الناس تعرفه
وانا بحذر وبقول حذاااااااااارى من ثورة الجياع
حذارى من الجعان لو طلع فى ثورة ومفيش وراه اللى يخسره
حذارى يا حكومة حذارى يا حكومة
لكل وزير او امين لجنة سياسات ويا ريس
حافظو على كراسيكم
مغصة الجوع اقوى من تعذيبات المعتقلات
محدش هيهمه الجيش ولا الشرطة لو جاع
هتقتله؟ الموت ارحمله من انه يعيش جعان فى بلده على الاقل عمره ما هيجوع تانى
هتورولهم العين الحمرا؟ وهتطلعو قوات الامن المركزى؟
طظظظظظظظظظظظظظظظظظظظظظظظ
ولا هيعملو حاجة ساعتها ما هما كمان مصريين وجعانين واهلم شقيانين زيهم واكتر ومش هيضربوا فى اللى حاله من حالهم بالعكس دة ممكن يستخدمو قوتهم وسلاحهم ضدكم ومش هتكون اول مرة تحصل فى مصر
هتقولوا ما احنا عاملين رقابه والدقيق مش بيتوزع فى السوق السودا؟ احب اقولكم ان الرقابه بتنصص مع بتوع المخابز وغيرهم وعلى عينك يا تاجر
الجعان بركان وقوة وطوفان مش هتقدروا تقفوا قدامه لو ثار
وبهانه وحمدان مش هيصبروا كتير ومش هيقدروا يشاركوا فى فيلم بطل للنهاية اللى كل محدودى الدخل بيمثلو فيه
هما صبرو بقليلهم ورضيوا لكن قليلهم مش راضى بيهم وبيتأمر
طب اعتبرونا فلسطينين وحنو علينا من فضلكم واكلونا
ولا اعتبرونا يهود حتى وبيعولنا الحديد بسعر ارخص خلونا نبنى ونلاقى حته نعيش فيها
شكلنا كدة محتاجين ثورة من اجل التغيير
هيجى البنى ادم الرخم والرزل والغبى بتاع كل مرة اللى انتو عارفينه ويسألنى هو احنا هنحتاج ثورة كل كام سنه عشان حال البلد ينصلح يا موزمازيل؟
هقوله مش هعلق على موضوع موزمازيل المرة دى لكن هقولك لاول مرة متبقاش غبى ويمكن كلامك فعلا المرة دى صح
وكدة يا حكومة الشعب بيقول لجيشك والشرطة لما تخوفيهم بيهم
كلمة عبقرية من حرفين لكنها ابلغ من الف مقال طظظظظظظظظ
انا كدة خلصت اللى عندى ونبهتك يا حكومة يا غالية على قلبى
مع انى عارفة انى بضغط عليكى وبرهقك بطلباتى لكن للاسف البد بلدكم ياللى ماسكين الحكومة واحنا ضيوف هنا فى البلد اللى تقريبا واحنا صغيرين قالو عليها بلدنا لكن مش عارفة اطلب من مين غيرك يا حكومة واحنا عبيد احسانك
واخيرا اقروا القصيدة دى لاحمد فؤاد نجم_وشكرا للدكتور اشرف حمدى اللى لفت نظرى ليها
هما مين و إ حنا مين .. ؟
هما الأمرا و السلاطين ..
هما المال و الحكم معاهم ..
و إحنا الفقرا المحرومين
حزر فزر شغّـل مخك
شوف مين فينا بيحكم مين ؟!!
..............
إحنا مين و هما مين ..
إحنا الفعلا البنايين
إحنا السنة و إحنا الفرض
إحنا الناس بالطول و العرض
من عافيتنا تقوم الارض ..
و عرقنا يخضر بساتين
حزر فزر شغل مخك
شوف مين فينا بيخدم مين ..؟؟!!
................
هما مين و إحنا مين ؟؟
هما الامرا و السلاطين
هما الفيلا و العربية
و النساوين المتنقية
حيوانات استهلاكية
شغلتهم حشو المصارين
حزر فزر شغل مخك
شوف مين فينا بياكل مين ..؟؟!!!
....................إحنا مين و هما مين
إحنا قرنفل على ياسمين
إحنا الحرب : حطبها و نارها
و إحنا الجيش اللي يحررها
و إحنا الشهدا بكل مدارها
منكسرين أو منتصرين
حزر فزر شغل مخك
شوف مين فينا بيقتل مين ..؟؟!!!
................
هما مين و إحنا مين
هما الامرا و السلاطين
هما مناظر بالمزيكا
و الزفة و شغل البوليتيكا
و دماغهم طبعاً استيكا
بس البركة بالميازين
حزر .. فزر شغل مخك
شوف مين فينا بيخدع مين ..؟؟؟!!!
.....................
هما مين و إحنا مين
هما الامرا و السلاطين
هما بيلبسوا أخر موضة
و إحنا بنسكن سبعة في أوضة
هما بياكلوا حمام و فراخ
و إحنا الفول دوخنا و داخ
هما بيمشوا بطيارات
و إحنا نموت بالاوتوبيسات
هما حياتهم بامب جميلة
هما فصيلة و إحنا فصيلة
حادي يا بادي يا عبد الهادي
يا اللي عليك قصد الغنوادي ( الغنوة دي أو هذه الاغنية )
لما الشعب يقوم و ينادي
يا إحنا يا هما في الدنيا دي
حزر فزر .. شغل مخك
شوف مين فينا حيغلب مين
وقبل ما اقول انتظر تعليقاتكم اللى عاوز يضيف على البوست من عنده يضيف المرة دى الموضوع ميخصنيش لوحدى ولا هو حدوته من حواديتى اللى بيحكيهالكم كله لازم لازم لازم يتكلم
انتظر تعليقاتكم
*******************************************
تحديث
شكرا لكل اللى شجعونى وفالولى اكتبى اللى فى دماغك مش لازم القواعد اوى وشكرا لكل اللى قرا العك اللى فات
انتظر تعليقاتكم
89 comments:
قلتي اللي في نفسي
وفي نفس تلاتة ارباع الشعب الغلبان ده
وبجد الطوفان قادم قريبا جدا
الاول الناس كانت بتموت بعضها
دلوقتي فيه ناس بتنتحر وبتموت نفسها
المرحلة الجاية احنا كلنا عارفين الناس هتموت مييييييين
احب اقولك انى جالى نقرس من كتر اكل اللحمه تخيلى انا روحت النهارده اكلت فى المطعم الى فى اخر دور فى سيتتى ستارز ودفعت 14 جنيه بس
الكلام ده كان سنه 64 مش دلوقتى انا لو فعلا مش جعان مكنتش فكرت انى اكتب ولا حتى اقرا البوست الجميل ده بجد تسلم ايدك يا مى ؟
صوت من مصر
هههههههه سنة 64
دة انت المفروض تحكى لاحفادك ايام العز زى ما جدتى بتحكيلى انهم كانو بيجيبو الفاكهة بالقفص والسمنة فى طشوت كبيرة واللحمة بالكيلوااااات
زى ما انا وانت هنحكى لاحفادنا ان ايمامنا كان في بركة وكان كيلو اللحمة ب 40 جنيه بس
سنوايت
اتمنى فعلا انه يكون بوست حلو وبيعبر عن الناس بجد
ياترى الناس هتموت مين
ابو تريكة مثلا؟؟؟!!!! يمكن
على كل حال شرقتنى زيارتك
انا خايف للكلام يغلي هو كمان , والواحد يموت مكتوم من الغيظ ..
انتي عارفة كان في نكتة بتقول اللي متحبس في عهد عبد الناصر عمره ما يتحبس ابدا , واللي ما اغتناش في عهد السادات عمره ما يتغني ابدا , واللي مشحتش في عهد مبارك عمره ما يشحت ابدا
وانا شايفها بتعبر عن الخقيقة تماما لان حتي ايام السادات اللي الناس فيها ثارت علي غلاء الاسعار واللي سماها وقتها السادات انتفاضة الحرامية ..
الاسعار ما ارتفعتش بالطريقة الجنونية دي ...
ويقولك دلوقتي اندي بون لكل مواطن محدود الدخل عشان يشتري بيه حاجته طيب والبون ده ايجيب بيه اللحمة والعيش والسكر والشاي ويدفع الكهربا والغاز وفاتورة التليفون واجرة الزبال وللمدرس الخصوصي " اللي بالتاكيد ايغلي الفزيتا بدل غلاء " ده غير الدكتور والمواصلات ..
اقول ايه ولا ايه ..
ربنا يرحمنا برحمته..
تقبلي مروري
الفارس الملثم
مرور كريم
ونكته معبره
وشكرا لتعليقك
أولا أقترح عليكى أن التعليق يطلع في نافذه مستقله عشان لو الواحد عاوز يشوف المكتوب في المقال يرجع لجزء منه فيقدر بدل ما تكون الصفحه راحت
ثانيا .. من أكبر الخطأ هو المبالغه و التهويل لأن دا بيدى فرصه لمن يريد أن ينتقد المقال كله و يرفضه كله و المبالغه عندك جائت في الأسعار .. فإزازة الزيت منها أنواع فليه تكتبى حداشر جنيه ... مش في نوع في الجمعيه برضه بسبعه و بسبعه و نص و في نوع بثمانيه و نوع بثمانيه و نص و نوع بتسعه .. لكن نك تتكلمى عن الفقراء ثم تختارى أغلى أغلى نوع من بتوع الأغنياء فدا مش طبيعى .. (دا على فرض إن في نوع فعلا بحداشر لأن مشفتش من اخر مرة إشتريت إن فيه نوع وصل لحداشر جنيه)
و كذلك كيلو اللبن .. جبتى منين خمسه جنيه و نصف تمنه
و كذلك اللحمه للى بتقولى بأربعين جنيه فالفقراء مش بيشتروا اللحوم البلدى لأنها فقط بتاعة الأغنياء .. و حتى الطبقة الوسطى لا تشتريها .. فليه متكلمتيش عن لحوم الفقراء المستورده و دي الكيلو أظن بتمنتاشر
و الجبنه البيضاء إللي بتقولى بإتنين و عشرين جنيه ... دي منين دي ؟ ... جبتى السعر دا منين ... عندك الجبنه البيضاء المصريين و حلايب بحوالى أربعتاشر و نصف و الدوبل كريم بنفس الثمن أو بخمستاشر
فهمتى قصدى ؟
هانى
هانى
ممكن اكون غلطانة لانى كتبت الاسعار اللى انا بواجهها
ولازم اتكلم على اللحمة بردة لانى بعرض اسعار السلع اغلبها
ودى كانت الاسعار الموجودة فى المصرى اليوم
العدد الكام مش فاكرة عشان اقولك
لكن انت ركزت مع الاسعار ومتكلمتش خالص على البوست
شفتي بقى لما كتبتي بتلقائية طلع البوست جميل ومعبر إزاي ؟
انا بس أحب ارد على هاني ، هي فعلا الأسعار مش دقيقة ، مش عشان فيها تهويل ، لكن عشان هي أقل بكتير من اللي موجود دلوقتي في الشارع !!!
قزازة الزيت بأربعتاشر مش حداشر
والزيت اللي بتقول عليه بتمانية ده ممكن تزيت بيه مكنة الخياطة وممكن يبوظها برضه لأنه غير صالح للاستخدام سواء الآدمي أو حتى الميكني
وأرجع أقولك يا نميمة بجد تسلم ايدك
وقد ايه انا فرحان بيكي لأنك كتبتي بصدق . الثورة قادمة لا محالة لو استمر الوضع على ما هو عليه شهر واحد كمان
وسمعت طرطيش كلام عن ثورة السادس من إبريل والتي تحمل اسم يوم التحرير الكبير ، ومش عارف ده مجرد كلام ولا ثورة حقيقية
انا بكتب التعليق ده بعد ما فشلت في الحصول على افطاري اللي هو مجرد باتيه بالجبنة من الفرن اللي جنب الشغل
كان بجنيه ونص وفجأة لقيته باتنين جنيه النهاردة ، قلت للراجل انشالله ماحد فطر وخدت بعضي ومشيت
تحياتي
أنا عارف إن المصرى اليوم عملت الفيلم دا
خدى بالك المصرى اليوم همهم الوحيد جيوبهم لا شيء أكثر و لا يتورعون عن السرقه في الموضوعات و الكذب ... و بما أن "الرايجه" في اليويمن دول و هذا العصر و هذه الفتره هي مهاجمة نظام الحكم لذا فهكذا يفعلون .. يهاجمون نظام الحكم في كام خبر و يتكلمون عن النفجار الوشيك و مشعارف إيه و لكن في الناحية الأخرى يدعون مصطفى الفقى الوجه الحكومى و صاحب أقذر فضيحة في تزوير النتخابات للكتابة عندهم و كذلك لميس الحديدي عضو الحملة الإنتخابية للمحتل الذي يحتلنا حسنى مبارك و أشياء أخرى كثيره
يذيد على ذلك الوجه الباكى لرئيس التحرير و هو يتكلم عن حد من الكبار في الدوله
كله نفاق و كله كدا و كدا و لا يهمهم لا شعب و لا مصلحة و لا أي شيء غير أنفسهم
الأسعار تلى هذا صحيح طبعا و بسرعه كبيره طبعا و السبب ليس الحكومه فقط و إنما نظام الإحتلال الذى يرأسه مبارك و عائلته و الذى يحتل مصر و ما الحكومه إلا جزء منه
ايه يا قمر الكلام الجامد ده عموما اللحمه ب42 والعدس ب10
آآآآآآآآآآآآآه يا بلدى يا حبيبتى والله مش عارفه هيعملوا فينا ايه اكتر من كده واللى يقولك استغنوا عن التكنولوجيا ليه يعنى ما ممكن نرشد استهلاكها بس طيب والله يا شيخه خلينى ساكته اصلى عارفه الناس دى عايشه ازاى وداخله بيوتها ربنا يزيدهم ويزيدنا بس اقسم لك بالله فيه ناس ولا فى دماغها
يا رب الغلابه هيعملوا ايه والله الناس بتصعب عليا الله يكون فى عونك يا مصر
بووووست جميل
يستاهل التاخير
بس كتابه الاسعار غلطه خلى بالك
انتى كده هتضطرى تعمليلها تحديث كل يوم
ههههههه
وبعدين مش نسكت بقا شوية ونرضى
اية يعنى كلوا لحمة حمير ولا كلاب مالها مش لحمة
والفول ده مش لينا ده لكائنات تانية
احنا احنا ولاد ,,,,,,,,,,,
نروح ننتحر نولع فى نفسنا
ربنا يعينا ويصلح الاحوال
تحياتى ليكى
انا بقالي سنتين عايش بره مصر بس ان شاء الله جاي اجازه قريب بس الكلام اللي بيتقال علي الاسعار ده ميطمنش ابدا انا خايف انزل بسلامة نيه وانسي واتعامل بالاسعار القديمه اصحاب المحلات يضربوني يعني انا فاكر الكشري كان ب 2 جنيه بيقولوا دلوقتي بقي ب 6 و 7 جنيه يعني لو روحت المحل ونسيت وطلعت للراجل 2 جنيه ممكن الاقي كرسي في وشي ولا حاجه ربنا يستر
بالنسبه لموضوع الغلا ده ففي حل جامد جدا ويتلخص كالاتي عمل برنامج ريالتي شو زي ستار اكاديمي كده ونسميه وزير اكاديمي نجيب فيه حبيبنا نظيف وبقية الوزراه وخصوصا بطرس غالي اللي محسسني انه وزير في الحكومه السويسريه وهو بيتكلم عن حال الشعب والاقتصاد ياله المهم البرنامج هيكون لايف لمدة شهر هندي لكل واحد منهم 300 جنيه وهنقوله عيش حياتك يامعلم ده طبعا بعد سحب العربيات والموبايلات والفلل والشاليهات بس لمدة شهر وهنشوف بقي هيعملوا ايه ب ال 300 جنيه كل وزير مع نفسه بقي يقف في الطابور يجيب عيش يعمل اللي هوا عايزه طبعا هيبقي برنامج تحفه كوميديا 24 ساعه متواصله وممكن نبيعه لقنوات اجنبيه ونجيب دخل قومي لمصر متهيالي ساعتها بس ممكن يحسوا بالناس شويه ويحاولوا يعملوا حاجه للبلد
مها
كيس المكرونه مش بسته جنيه ... روحى كدا في اى سوبر ماركت و شوفى
بإتنين جنيه أو بتلاته أو بتلاته و ربع .. يعنى حسب النوع ... لكن سته دي واسعه شويه
كلامك صح عن الغلو و لكن المصري اليوم مش صادقين .. عاوزين يبيعوا الجريده وخلاص
تحياتى
هانى
لازم تكون مش ثورة جياع لازم تبقى ثورتنا احنا الشباب على الاوضاع الموجوده اللي هتحرمنا من حقنا في الحياة
بكره ده بتاعنا احنا مش بتاع الجياع بس بتاع كل الشباب وكل اللي بيحب مصر لازم نعمل حاجة علشان بكره وإلا عمرنا كل هيضيع
تحياتي
د.اشرف حمدى
والله موضوع الاسعار ده انا مش هتكلم فيه لانه بيختلف من مكان لمكان يعنى اللى عايش فى القاهرة غير الارياف غير الصعيد ويعتمد بردة على الانواع
وانا هسيب الاسعار كدة
وكدة كدة لو انا كاتبه حاجة غالى شوية يومين وهيبقى ده السعر الحقيقى
مش انت بتقول باتية بالجبنه بتتنين جنيه
اقرب فرن ليا بيبيعه بجنيه
شوفت انى لى شغلت بالى بتغير الاسعار مش هخلص
هانى
الاسعار اللى انا كاتبها انا نفسى وامى كمان اتعاملنا معاها
لو بعضها خطأ يبقى احنا اتخمينا
او السوبر ماركيت كان بيغلى فى حاجة ويضرب فى التانية
وعندك د. اشرف بيقول الباتيه الجبه 2 جنيه
ان لسه بشتريه بجنيه
فانا مش هشغل بالى بغلو الاسعار
فى يوم هتوصل البضائع للسعر ده
ابى
انا مشتركه فى جمعية مش هقول اسمها
تقريبا قربت اسيبها من كتر الاكتئاب اللى جالى نتيجة عن رؤيتى للناس اللى مش لاقيه اكل يوم دى
دهغير واحد قالى انا بقيت باكل مرة واحدة فى اليوم وبنام معظم الوقت عشان محسش بالجوع
ودى تبقى عيشه دى بس اهو عايش
حسام يحيى
شكرا
بس فى المستقبل نقدر نقول ان دى وثيقة للاجيال القادمة ونقولهم عن العز والنغنغه اللى كنا عايشين فيها واللى هما مشافوهاش
وانا مش هعمل تحديث واعتبروه متوسط اسعار السلع لو الاسعار غليت شوية
wanna b a physician
مانا قولت فى البوست انه شعب طماع
والحكومة هى اللى غليانة
شعب مبيتكسفش على دمه
mk
اقتراح جميل اوى
اننا نديهم بادجيت 30 جنيه ونقوله حاول تعيش بيهم
بس بقالك سنتين برة مصر وبتفكر تنزل احسن لك بلاش
هتيجى تزور بلد تانية مصر من سنتين كانت بلد تانية خالص
هانى
نفسى تعلق باسم البولوج بتاعك عشان ازورك بقى :)
وكمان كتبت 3 تعليقات ومقلتش رأيك فى البوست
الاسعار انا مش هغيرها لانها هتوصل للسعر ده
وانا اشتريت كيس مكرونة ب6 جنيه
انا حر
ماهى بردة ثورة الشباب
انما الشباب الجياع
هى دى مصر الحديثة
صح الثوره الجايه ثورة الجياع
وبخصوص الاسعار ففعلا الاسعار مش مظبوطه بس ده مش عشان هى اقل من كده لا الاسعار فى الواقع ازيد من كده فعلا وخلاص الناس بدأت تتصرف وتشتغل الشغل المظبوط
فى واحد قتل ولاده التمانيه ومراته وانتحر هو كمان عشان مش عارف يأكلهم
شوفتوا الحال وصل بينا لفين؟
بصى يا اجدع صحفية فى الدنيا دى كلها
عندك اخطأء يا حبيبتى فى قائمة الاسعار
كيلو اللحمة 42 جنيه مش 40
ازازة الزيت 13ج مش 11
علبه السمنه 27 جنيه مش 20
شوفتى بقى عمال يزودا بالراحة وبالهداوة ازاى
واحنا بناخد على قفانا وساكتين
وحسبنا الله ونعم الوكيل
سلاموووووووووووو عليكووووووووو
حرام عليكي بجد ... هو الشعب ناقص ... كنت حطي الكلام ده في سرك
الناس صحيح شايفة وحاسه بس كمان مش ناقصة حد يفكرها
بس بجد الموضوع ينذر بعواقب وخيمة
جامدة حتة وخيمة ديه
بس بجد إيه الحل؟؟؟ مش عارف
هل الحل في الحكومة ؟؟ يبقى عليه العوض
هل الحل في الشعب إنه يتحرك ؟؟ بقينا شعب بارد وخامل ومنتهي الصلاحية
هل الحل في الجيش ؟؟ يا قلبي لا تحزن
بصي أول طيارة رايحة الإمارات بعد ساعة ونص
ده الحل الأمثل
كان معكم ..,
كيكوووووووووووو
باربى جيرل
ابتسم انت فى مصر
بحبك يا مصر
ربنا يستر علينا
ومنوصلش لدرجة الانتحار
قطة الصحراء
ديسرت كات
عاوزاكى تقولى الكلام دة تانى وبعلو صوتك انى مش عامله مبالغة فى الاسعار ولا حاجة
ودى متوسط الاسعار الموجودة فى السوق
يعنى مش اقلها ولا اغلاها
وميرسى ليكى عشان قولتى عليا اجدع صحفية
انتى شايفانى كدة بجد؟
كيكو
او طيلرة طالعة الامارات كمان نص ساعة يالهوى
خدنى معاك
ربنا يستر على الأيام اللى جايه مقدرش أقول أكتر من كده
وليه مش بقيتم بتزورونا
تحيــــــــــاتى
المصـــــــــــــــــرى
المصرى
ربنا يستر فعلا وجايالك حالا اهو
جوزي مرة شك في اني بخنصر من مصروف البيت وزعقلي ... وفي يوم كانت اجازته وقاعد في البيت اتعمدت اطلب فرخة مجمدة من البوابة واديتها خمسين جنيه رجعت بخمسة وعشرين جنيه واتعمدت ان زوجي يفتحلها الباب ويحاسبنها بنفسه عشان يعرف الغلا اللي بقينا فيه
اتنين هديه ببلاش ولا هتحطيها ضمن قايمة الاسعار
معانا يا رب
وقال يقلك الناس مضايقه ليه كل شويه يقللنا فكو الحزام ههههههه
طن الحديد
5600
مش 5100
وكان سعره من اسبوع
6200
اصبح الحديد حديد المدينه
قصدى حديث المدينه
بوست دسم الحقيقه
وفعلا صحفيه بجد
بس مش روشه وبس
لأ
روشه .. وشرسه
فعلا عندك حق .. لو احنا الشعب بجد كنا عملنا حاجه .. ولو احنا تبع الحكومه .. يبقى نستغنى عن التكنولوجيا
---- وبلاها ارتفاع مستوى معيشة الفرد .. بس هل معنى كده اننا نرجع لعصر الجمل والناقه والحمار عشان نوفر في الوقود ؟؟
وبالتالي نعيش في خيم ونوفر سعر حديد التسليح ؟؟
ونبطل ناكل .. ونشد الحزام ؟؟
ملحوظه قبل ما امشي
مؤلف اغنية شد الحزام مش سيد درويش .. كاتب الكلمات هو الراحل بديع خيري
سلاموووووووووووز
عزيزتى
مدونتى أفكارها جديده في الدين و الحياه كما إنها معارضه
ربما أفضل ألا أضع توقيعي بها على التعليق
هانى
اقولك على حاجه
مفيش مشكله خالص
الدنيا حلوه والموضوع هيتحل لوحده خلاص
الحمد لله
كل حاجه كويسه وكل حاجه ماشيه صح
الحمد لله على كل حاجه
ااااااااااااااااااه
آآآآآآآآآآآآآآآه
خلاص حرام بقى عليكم
انا قولت اللي انتم عايزينه
ايوه هي اللي شجعتني اتكلم
هي المحرضه يا باشا
انا هاعترف
خلاص حرام بقى
سامحيني يا صحفيه يا جدعه
هم الي اجبروني اعترف
--------------------
علشان بس لما يمسكوني تبقي عارفه ايه اللي حصل ومتزعليش لما اقر عليكم واحد واحد
هههههههههههههههه
اقولك مبقيناش زي زمان هم مجموعه من الناس اللي بتتلكم والباقي ساكت ومقضيها الكل هيولع الكل هيموت من الحسره الكل اتخنق خلاص
فاضل تكه صغيره واكيد الناس هتثور
حتى اللي اتعود طول عمره يسكت اكيد لما يجوع هيتكلم
حاجه من اتنين يا اما كل ده تخطيط لحاجه هتحصل وعايزنا نوافق بيها من غير ما نرغي كتير ونعترض عليها
ويمكن تتحل بثوره فعلا
لكن انا برجح انهم فجأه هيجيبولنا الحل على طبق من فضه بس بشرط نوافق عليه
وهيبقوا بيعملوه خوفا على مصلحتنا لكن ايه هو الحل ده ربنا يستر
سلاااااااااااااااااااام
بوست جامد يستحق التأخير
الثورة القادمة فعلا
عارفة فيه فرن قريب من بيتي كل يوم الناس بتقف تتخانق فيه على العيش ويضربوا بعض وبيخلص على الساعة 11 علشان بيسرب الدقيق للسوق السودا
من أسبوع الناس ثارت ودخلوا افرن وضربوا اللي شغالين فيه بالسكاكين
طبعا هو تنفيس غير موفق عن الغضب اللي جواهم لإن الفرانين اللي شغالين جوا غلابة زيهم بالظبط بس هي إشارة إن الناس خلاص معدتش قادرة تستحمل
فيه نكتة بتتقال اليومين دول
إن واحد اصطاد سمكة كبيرة وقال لمراته اقليها لنا فقالت الزيت غالي جدا .. فقالها طب اشويها قالت له مفيش ردة في السوق .. قالها طب اعمليها بالصلصة قالت له أنت عارف كيلو الطماطم بكام
.. قام الراجل رما السمكة في الميه وهي بتهتف تحيا مصر
بيتهيألي الثورة قربت جدا
تحياتي
السلام عليكم ورحمة الله وبركاتة
طيب كانو سابو الفول والعدس
كده الشعب هيموت من الجوع
بس عاارفه كل حاجه سعرها بيرتفع
وحاجه وااحده بس رخصوها الانسان
بس نرجع نقول ربنا على الظالم
تحياتى
المفقوعة مرارتها
والله هو ده الحل مع الازواج اللى من نوعية حمدان اللى مش مقدرين الغلاء
واحد بيدور على قلبة
لا الاتنين الهديه ببلاش
طبعا لازم يقولو لينا فك الحزام
عشان من كتر الاكل والعز بطننا اتنفخت
فرنسا هانم
دايما منورانى
انا مقلتش ان الحديد ب 5100
انا قلت انه خلاص مش هينزل شلن واحد عن 5100
لكن اكيد بيزيد سعرة
شكرا لتشريفك ليا
soooooooo
بص هو اكيد لازم ننفذ اللى انت قلت عليه
يعنى لازم الواحد وهو رايح الشغل يطلع الناقة الفور باى فور من الجراج ويشرخ على الشغل
ونعيش فى خيم قايمة على عمدان الخشب المسلح
وعلى فكرة اللى غناها سيد درويش وانا مقلتش انه الفها
هانى
ممكن تبعتلى اسم مدونتك فى رساله على ايميلى
مع انى اعتقد انك فعلا عملت كدة واعتقد انى اعرف مدونتك وزورتها اكتر من مرة
واظن انه من الواضح فى كتابتى انى بتقبل الاخر واراءه
لو مش عاجبنى الكلام مش هسيب تعليق
لكن هقرا وبس
ومش هكره دخولك مدونتى
عادى والله
ومش هقدر اسيب التعليقات فى نافذة منبثقة عشان لما باجى ارد على التعليقات الكتير اللى عندى بتهنج وبتتعبنى
ابقى افتح انت صفحتين
وكمان بالنسبه للاسعار
يبدو انها مطلعتش غلط زى ما كنت بتقول لان فى ناس بعتت زى مانت شايف بتقول انى فى اسعار سلع انا قولتها اسعارها اكتر من السعر اللى انا ذكرته
قولتى انت ساكن فين بقه عشان اجى اسكن جنبك واتمتع بالاسعار الرئعة اللى انت ذكرتها دى
______________________________
قولى صحيح انت صاحب بوست السخرة السكوت عليها فى عهد مبارك
وبوست الحجاب فرض على الرجل قبل المراة
انا مش هذكر اسم مدونتك احتراما لرايك
الشنكوتى الكبير
اعترفت عليا من اول قفا
هههههههههه
على العموم زى مانتا قلت بصيغة تانية الخيارات محدودة
يا نوافق يا نوافق
هبه
قلقتينى عليكى من كتر التاخير
فعلا الثورة جاية والنكتة اللى انتى قلتيها انا قريتها فى الصفحة الاولى من جريدة الدستور
وقولى تانى وسمعى صوتك للطرش اللى بيقولو ان الدقيق مش بيتوزع
لما الفرن بيقفل الساعة 11
يبقى الدقيق بيروح فين
بيصيف فى مارينا عشان حر الفرن مش عاجبه
عدنان المصرى عندك حق
كل حاجة غليت
ماعدا المصرى
هو اللى تمنه رخص
غربة وطن
ميرسى ليك بجد
انا كنت هعيط من كتر تقديرك ليا
انشاء الله جاية
وعلى فكرة انا فتحت الصفحة بس كانت مهنجة واكيد هحاول تانى
هههههههههه
ذكيه
هانى
كل الناس بتقولى انى ذكية يا هانى
ماعدا انا شايفة انى مش ذكية
اتمنى ان يكون كلامى طلع صح
وكمان انا احترم انك عاوز تحافظ على علاقتنا ببعض كمدونين فى كار واحد
وهزور مدونتك
واذا سمحتلى هقول رايى لو عاوزة اقول
sureeeeeeeeeeeeeeee
u more than welcomeeeeeeeeee
أما بالنسبة لكلامك فهو صح
Cheers
هانى
حينما يثور الجياع
فليقف الجميع
وينظر حوله
ويسأل نفسه
هل هناك من يوقفهم؟
جمعاوى اصيل
لن يوجد ابدا ابدا ابدا ابدا من يستطيع التصدى لثورة الجياع
أدينى مستنية والله ثورة الجياع دى
ومش راضية تيجى
عارفة إنها هتكون ثورة خطيرة جدا ستقضى على الأخضر واليابس وهتكون الفوضى هى عاملها الأساسى
لكن على الرغم من دا كله
قاعدة مستنياها
فزلوكة
مستنية ايه بس حرام عليكى دى ثورة هتقضى على مصر لانك زى ما قلتى عاملها الاساسى الفوضى
هو احنا ناقصين خراب اكتر من اللى احنا فيه
ده انا بحذر م الثورة دى
السلام عليكم اختنا الفاضلة
ربنا يعزك يارب
بسم الله ماشاء الله انتى اثارتى نقاط مهمة وهى الاسعار وسرقة الحكومة
وان الشعب اذا انتفض فلن يسكن مرة تانية
بس انتى اسعارك قديمة دى غلت كمان العدس بقى ب9 جنية والدقيق 4 وحاجات كتير كمان غلت
الدهب يوميا بيغلى
اول الاسبوع كان بــ151ــ
وفى نص الاسبوع وصل الـ157ـى
والحديد وصل الى 6000
حسبنا الله ونعم الوكيل فيك يامبارك انته ونظيف وعز وكل الحرامية
تحياتى لكى اختنا الفاضلة
وربنا يعزك يارب
برافو عليكى ايتها الصحفيه الروشه
جرأه تحسدين عليها
وعلى فكره كلمات عمنا احمد فؤاد نجم ملخص فيها اللى بيحصل واللى هيحصل
واموت واعرف الحكومه دى بيجيلها نوم ازاى
وهى شايفه الناس مش لاقيه رغيف العيش
ومش قادره تحلم بالعدس حتى
فما بالك باللحمه
بجد
ربنا يستر علينا
اولا تصميم مدونتك عاجبنى جدا
ثانيا ثورة الجياع هايلة
وجاية قريب قوى طول ما اللى بيطلع مبينزلش وانا بحكم شغلى واثق انها قربت جدا
فكرتينى ببوست عملته قريب
بتاع مصر مفيهاش حد فقير
كنت بكلم فيه عن وزير كده عايش فى الخيال
و بيقول ان لو الواحد معاه جنية و نص فى
جيبه ميبقاش فقير
لكن لو فى جيبه ربع جنيه كده يستحق
دعم من الحكومة
حسيت ساعتها انه مش حاسس ان الجنية
عايم و غرق من بدرى
و بقيت ال100 جنية
بتساوى ربع جنية
ربنا معانا فى الايام الجاية
لاننا هناكل بعضنا فى الاخر
المشكله انهم سحبو مني الناقه الفور باي فور
وكلبشو الفيل بتاعي
مش ناقص الا ان الخيمه بتاعتي في مرتفعات دار السلام .. يجيلها قرار ازاله
----
بيقولك في حمام زاجل ثري جي .. بيوصل الرساله صوت وصورة .. بس انفلونزا الطيور مخلياه يطلع صوت الواحد مزكوم
)دى كلمات سيد درويش فى اغنية كلنا عارفينها)
هو مبدأيا انا مش بقولك ان صاحب هذه الكلمات بديع خيري من باب اني اتفشخر ولا حاجه والله .. انا نفسي كنت فاكر ان اللي كتب الكلام ده هو بيرم التونسي لكن اتضحلي انه بديع خيري .. وانتي فعلا ما قولتيش ان سيد درويش ألفها .. بس قلتي ان دي كلمات سيد درويش .. كنتي ممكن تقولي دي اغنية لسيد درويش
معلش اعذريني وانا اسف لو اسلوبي ضايقك .. بس انا عن نفسي باشوف ان في مؤلفين كتير من بتوع زمان مهضوم حقهم واحنا ناسينهم وفاكرين المغنيين وبس
اسف اذا كانت طريقتي في الكلام اتفهمت غلط
سلاموووووووووووووز
إحنا فعلا مستنيين التغيير بس محبش أسميها ثورة الجياع لإن مش إحنا اللي يحركنا رغيف عيش
ممكن تكون ثورة التغيير أو الإصلاح
الفساد للركب في كل مكان مش مجرد غلاء أسعار
مشكلة الفقر دي مشكلة كبيرة وعايزة حلول غير تقليدية
لكن من اللي بشوفه في الحياة و كذلك في الأماكن الفقيرة
المرتشي و الغشاش و اللي مش عايز يشتغل دول مش ممكن يقوموا بثورة
مين اللي بيقوم بالثورات :
الشباب أهوه مشغول في الأغاني والكليبات والجيمز والفقير منهم مشغول بالدروس الخصوصية
الموظفين الحكوميين - غارقين في الرشوة والمرتشين لا يمشون في ثورات
البائعين والصنايعية - الغالبية غشاشين
الفلاحين - ازاي واحد مخلف خمسة فما فوق هيقوم بثورة ؟ هو عارف من جواه ان هو السبب
العمال ؟ هينضحك عليهم وقت اللزوم بمكافئات
كمان الحكومة عارفة هي بتعمل ايه كويس بتدي المسكنات في وقت مناسب
حكم مبارك شاطر جدا في اخماد الثورات في مهدها على العموم محدش عايز ثورة
لأنها لو قامت هتكون عشوائية وبدون قائد وبدون هدف محدد
انت بتحزر مين ياعم خلاص الحل
ثورو او موتو
تحياتى
انا جايب فرختين مشويين النهارده فى شنطه سوده ب 50 جنيه والله العظيم صوت اول ما شوفت الفرختين محطوطين فى الكيس والناس تقولى دول الفرختين مصدقتش
النجم القادم
الله يبارك فيك
وبالنسبة للاسعار مقصودة انها تتحط كدة عشان اللى يشوفها ويقول ان الحياة دلوقتى اغلى يترحم على ايام العز
واللى يشوفها ارخص يعمل حسابه للى جاى
:)
صالح سعيد
والله الواحد ظالم الحكومة احنا اللى طلباتنا كتير
الواحد بس بيزعلى لما بشوف ماضيه ويرجع يشوف حاضرة
زمان كنا عظماء ودلوقتى ناميين
واهى نظرية اب خلدون تطبقت علينا فى ان لكل دوله عمر افتراضى لا يزيد عن 120 سنة ازدهار
وبعد كدة كهولة وشيخوخة وتيتانوس بعيد عنك
:)
هيثم
الخوف من ثورة الجياع
الخوف انه تحصل ثورة اصلا ويجمدوا اموال الناس اللى فى البنوك زى ما خدوا الاراضى من الاقطاعيين مش جديدة يعنى
عادى
ربنا يستر
انت بتشتغل ايه بقة؟
selfmeaning
الخوف اننا نتحول لاكلى لحوم بشر فعلا
سوووووووو
دمك زى الشربات
وانت اللى زيك محدش يعرف يزعل منه
انا كنت بوضح بس ليكون فى سوء فهم
سلاحف
نور الازهر
الناس صبرت على الفساد فى كل مكان
وبكل طريقة
مقابل انهم ياكلو 3 وجبات محترمة كل يوم
انما لما نجوع فى بلد مش فقيرة ومليانه خير
اكيد لازم هتكون ثورة الجياع
بلوجاتى
اذا كان كله جعان مين هيدفع الرشوة؟
ومين هيطلب عمال ولا صنايعية عشان يعملو الارض باركية وهو جعان
ربنا يستر
الفئة اللى مش هتعمل الثورة بتوع الجيش
لان الحكومة ايدها فى بق الجيش
ضد الظلم
ربنا يستر وتتحل من غير ثورة
ضد الظلم
تعيش وتاخد غيها
الريس كان مرة ماشى فى الشارع وهو متخفى
فقد كان حريص على تفقد رعيته الله يكرمه
فلقى زحمة جامدة اوى وسأل رئيس الوزرا وقالو ايه الزحمة دى يا نضيف
فرد عليه وقالو يا ريس دى ناس بتتزاحم عشان تشترى عيش
رد الريس وقال
يااااااااااه
هما لسة معاهم فلوس يشترو عيش
دى نكتة سمعتها من واحد كان راجع من فرنة عيش
راسبوتين
نكتة زى العسل
هبعتلك واحدة اجمد كمان بس على ايميلك
شكرا لزيارتك واتمنى يكون الموضوع عجبك المرة دى مش زى المرة اللى فاتت
يا عينى علينا
منك يا مدينه
مجنونه ورزينه
وفيكى البدع
ماشيين بالتوكاله
وفى الفين مقاله
فى الزيف والاصاله
وضرب الودع
يا عينى علينا
صابرين للنهايه
بس انتى افهمينا
قوليلنا الحكايه
ازاى يبقى نيلنا
ويجرى لغيرنا
ياريته شويه
يعدى علينا
يا عينى علينا
منك يا مدينه
مجنونه ورزينه
وفيكى البدع
~~~~~~~~~~~~~~~~~~~~~
دى اغنيه لفؤاد
بتحكى كل اللى انتى قولتيه
بس يا ترى فى امل
نكون فى يوم بنى ادمين
ولا هنفضل كده لحد ما نموت
مش عارف
بوست جامد وجارح اوى
بس واقعى اوى اوى وى
تحياتى ليكى
طب فين الجديد يا صحفيتنا
الجرايد فيه يومى وفيه اسبوعى
انتى بقه سنوى
حكاوينا
شكرا لزيارتك ولاضافتك لمدونتى فى ليست المدونات اللى عندك
وشكرا على الاغنية
حسام يحيى
الحياه مشاغل يا صديقى العزيز
لكن اى وقت فاضى عندى نميمة وقراءها لها الاولويه
واصداراتى حسب الحالة المزاجيه
ادعيلى ربنا يشفينى من الانفلونزا اللى عندى
ربنا يشفيك ويشفي مصر كلها
بس ياريت مرضنا كان انفلونزا
صحفى مصرى مشاغب
ربنا يشفى الجميع
بس انت قصدك اية؟
لذيذه اوي
مع اني بعتب عليكي عشان شكلك بتتريقي على الاغنيه
dream
لا طبعا انا مش بتريق على الاغنية
لانى بحبها
وشكرا
قصدي ربنا يشفيك ويعافيك من الانفلونزا اللي عند حضرتك
ويشفينا كمصريين من واقعنا الاليم
وياريت المرض بتاعنا كان زي مرض حضرتك شوية انلونزا
المرض بتاعنا للأسف لسه محدش اكتشفه
والحكومة مش مصدقة اننا تعبانيين
صحفى مصرى مشاغب
قصدك وصل
وفهمت كلامك
الحكومةمش شايفة اننا تعبانين
لاننا اصلا مش تعبانين
ده احنا بناكل ونشرب احسن حاجة وبنحوش ونشترى عربيات كمان
ولا اية
:)
Post a Comment