اذاعة البرنامج العام

تطلبتوا تسجيل حلقة عن مدونتى وبالاخص بوست مكتب خاطبتكو للزيجات الفاخرة بدون ذكر تفاصيل
ارجو تقديم المزيد من التفاصيل ووسيلة الاتصال بى هى الايميل الموجود بالبروفايل الخاص بى
ولن ابدى موافقتى او اعتراضى على هده الحلقة الا بعد معرفة التفاصيل
ولازم اعرف اليوم اللى لو اتذاعت الحلقة عشان هتتذاع فيه عشان اسمعها

البيه اطول منى

بسبب ان البيه خطيبى اطول منى بحوالى 23 سم

دايما بيحس من الم فى رقبته من كتر توطيته وهو بيبصلى وانا واقفة تحت

وانا كمان دايما رقبتى بتخشب من كتر البص لفوق وانا بكلمة

شكل كوع دراعة بيعجبنى اوى بما انى لو حاولت ابص قدامى مباشر اخر حاجة هشوفها كوع دراعه بما انى كتفى لازق فى كوعة

اكتر مشاكلنا فى الكلام ذات نفسه بقة لان التسبيل رقبتنا بتوجعنا لكن المعلومة بتوصل اننا بنسبل لبعض انما الكلام مشكلته كبيره

دايما لما اتكلم يقولى:اية؟مش سامع على صوتك

وده نتيجة لان الشبكه بتبقى ضعيفة والصوت مش بيوصله واضح

اكيد الموضوع بيسبب مشاكل لانه بيسمع الكلام طشاش

وبرده من نتائج فرق الطول اللى بينا انه بيصيف قبلى

اااااااااه اهو الواد الرخم وصل هو واسئلته

الواد الرخم:وهو بيصيف قبلك ليه يا بزبازيل

تااااااااانى يا اخى ارحمنى بقة وقول مودموازيل مرة واحدة صح

بيصيف قبلى عشان هو بيحس بالحر قبل ما يوصلنا تحت لان الشمس بتبقى ضاربه في راسه واكيد بردة بيشتى قبلى عشان الجليد اللى بينزل على راسه قبل ما المذيعة فى التلفزيون تقول ان الشتا جه

والله كنت بفكر اقدملة فى الارصاد الجويه ويسيبه من الهندسه اللى طالعللى فيها دى

وكتير اوى ببقى خايفة مجلس المدينه ياخده منى واحنا ماشيين سوا لانه ماشى بمخالفة دور رابع اصلى ساعتها هضطر اروح لوحدى!!!!!!! ولا منظرى وانا ماشيه مأنجة فى صباعه وبجرى وراه عشان الحقه فى خطوته نننننننكته

بس اجمل ما فى الموضوع انى احيانا كتير ممكن استغل طوله فى حاجات مهمة

منها: انى ممكن مضطرش انى اجيب زعافة للسقف فى الجهاز لان كفايه عليا اقف على كتفه والمع السقف باى حاجة فى ايديى وساعتها هوفر فى الجهاز ومش هشترى زعافه

والحاجة التانية ان لما شبكة موبينيل تهنج كالعادة وابقى خارج نطاق الخدمة برده ممكن اطلع اقعد فوق كتفه واتكلم فى الموبيل وتبقى الشبكة كامله والصوت مش هيقطع

وكمان مش هشترى سلم عشان لما اعوز افتح فريزير التلاجه ال65 قدم هسند على ركبته وافتحها وبكده هكون وفرت كتير فى فلوس العفش والجهاز

ولا لما نيجى نصيف يا سلاااااااااااام مش هنجيب شمسية هخليه يحط ايده فوق منى كفاية اوى

كلمه فى سرك: هو مفكر انه هو اللى طبيعى والناس هى اللى اقزام بس محدش يقوله بقة انه هو اللى طوله مش طبيعى عشان ميتعقدش ويكتأب اصله حثاث

عندما يكون خطيبك مدمنا للشاى والقهوة والسجاير

لو خطيبك مدمن للشاى والسجاير ممكن تنطبق عليكى الاعراض والحاجات اللى جاية دى

لونك يتحول للون البنى لون الشاى عند التعرض للشمس لفترات طويله

لسانك ينقط سكر طول مانتى بتتكلمى وطول مانتى ماشيه

الشعور بمشاعر عدوانية ناحية الملاعق الصغيرة اللى بتدوخ الشاى فى الكوباية

وبتركبه الملاهى من كتر التقليب

ظهور ورق شاى اخضر تحت الابط بدلا من السيكو سيكو

الشعور بارتفاع درجه الحرارة عن رؤية اى براد شاى

الشعور بالكسوف والخجل من اى قهوجى معدى من جنبك

عدم التنفس بالطريقة العادية ولكن بطريقة الشيشة

صوت النفس يتحول من شهيق وزفير الى صوت كركرة شيشة

تسمعى بالليل اصوات مرعبه ومخيفة صوتها قريب من صوت تقليب الكوبايات

تقومى تصرخى فى عز الليل والناس نايمة وتقولى

اااااااااااااااااااه اااااااااااههههههوااااااااااااه(قهوه)الحقونيييييى

تقوم مامتك بالليل مفزوعة بالليل مخضوضة عليكى

تقعد تعيط وتتحسر

البت كان عقلها تقيل زى القهوة ويوزن الدماغ

قصدى يوزن بلد

يظهر خلاص انكتب عليها حياتها تكون مرة زى القهوة اللى ناقصها سكر

ويضطروا يعملولك زار

وخدى عندك بقا طلبات الاسياد

كوبايات تركى شاااى متين

واحد قهوة يعملو واحد رزين

هووووه هووووه

وكمان عاوزين سكر غالى من بتاع المصريين

وعشان نشرب القهوة عاوزين فناجين فناجين

وان جبتها صينى مضروب ولا تايوانى هنشيلك فوق دماغك الطين

حاضر يا اسيادى طلباتكم واجبه عليا وعلى اولادى

انتى بقة تقولى لمامتك:ايه الكلام الفارغ ده

مامتك:سامحوها يا اسيادى جاهلة يا اسيادى هبلة بنت هبله يا اسيادى

اشفوها يا اسيادى ساعودها يا اسيادى

(الشافى هو الله)

ويبدا الزار

شيخ محضر يا شيخ محضر واللى قالولنا عليه يحضر

شيخ محضر يا شيخ محضر واللى قالولنا عليه يحضر

وناس لابسه سبح فى رقبتها من طولها ينفع يدخلو بيها جينس

وانتى بتلفى ورا الناس فى الزار

واحدة وراكى بتبخرك بطفى السجاير

رقيتك واسترقيتك من عين كل اللى شافوكى ولا صلوش على النبى

اقسمت عليكى بحلاوة شاى عم ماهر القهوجى

والنشارة اللى فى شاى عم احمد النصبجى

والقهوة المغشوشة اللى طعمها زفتى زفتى من عند عم فتحى الاونطجى

ولما يغم عليكى لازم يفادوكى بحاجة

طبعا كلكم عارفين هيا ايه

لا يا فالحين مش فرخة ويمسحو ودمها عليا

هيفادوكى بعلبه سجاير كليوباترا

لازم تشربيها كلها عشان عفاريت الشاى والقهوة والسجاير متطلعلكيش فى الحلم تانى

هيجى البنى ادم الرزل اللى كلكم اتخنقتوا منه وانتو عارفينه ويسأل

طب اشمعنا كليوباترا ومارلوبورو لا؟

هقولو يا فالح عشان مينفعش تشرب ماولوبورو وتشجع الامريكان انما ينفع تشرب حشيش وتشجع افغانستان

اهم حاجة بعد كل ده والزار ويغم عليكى وطلبات الاسياد

خطيبك مش هيبطل يطلب شاى وقهوة وسجاير طول ماهو قاعد

ادعولى بقة ان خطيبى يبطل سجاير وشاى وقهوة كتير

او يغير من نيكست الى ميريت او روزمان

اللهم انك سميع مجيب

انتظر تعليقاتكم

**********************************************

تحديث

يادى النيلة انا مش قولتلكم انى مش بسرق حاجة من حد

ولا بزور منتديات اصلا عشان اخد منهم

وان لو البوست ده مش بتاعى هكتب جنب العنوان لزق انه مش بتاعى

برافو عليكو مانتو فاكرين اهو

امال ليه الناس الثقيلة اللى بتبعتلى ايميلات بتتهمنى ان الكلام دة مش تاليفى

هو انا لازم انزل كتالوج مع كل بوست

والله العظيم البوست اللى فوق دة من دماغى وانا اللى مألفاه بنفسى بدون مساعده من حد

والله والكيبورد على ما اقول شهيد

حذارى من ثورة الجياع

شد الحزام على وسطك غيرة ما يفيدك
لابد عن يوم هيجى ويعدلها سيدك
وان كان شيل الحمول على ضهرك يوم هيفيدك
اهون عليك يا حر من مدت ايدك
دى كلمات سيد درويش فى اغنية كلنا عارفينها
لكن احب اقول للاستاذ سيد درويش انى نفذت نصايحك وشديت الحزام على وسطى على امل انها تتعدل
لكن من كتر شدى للحزام فى كل مرة ترتفع فيها الاسعار الحزام اتقطع ومعدش نافع
وخد عندك
كيلو اللحمة 40 جنيه
الفرخة 25 جنيه
ازازة الزيت 11
ازازة الخل 7 جنيه
علبه السمنه 20 جنيه
كيلو العدس 7 جنيه
كيلو الفول 6 جنيه
كيلو الطماطم 3 جنيه
كيلو البصل 3 جنيه
كيلو الخيار 5 جنيه
كيلو الليمون 3 جنيه
كيلو الدقيق 3.5 جنيه
كيلو اللبن 5,5 جنيه
كيس لمكرونه 6 جنيه
كيلو الرز 5 جنيه
كيلو السكر 4 جنيه
كيلو الموز 3,5 جنيه
كيلو الجبنه البيضا22 جنيه
كيلو الجبنه الرومى 44 جنيه
كارتونة البيض 15 جنيه
وكمان عندك مواد البناء واللى عاوزة بوست لوحدها وتثبيت سعر الحديد عن 5100 هو الراجل قال مش هينزله عن 5100 لكن مقلش انه مش هيزوده
حمدان:اطبخى يا بهيه
بهية: اطبخى يا بهية كلف يا حمدان
حمدان: سيبك من اللحمة والحاجات اللى بتوجع البطن دى اعمللنا فرخة وحبه رز
بهيه:هات 30 جنيه
حمدان:ليه ؟ اومال لو قلتلك هاتيلى سمك ورزهتعملى اية ؟
بهية:هقولك هات 20 جنيه
حمدان:خلاص تعالى نقضيها عدس
بهية:انت بتتكلم عن العدس كدة وكأنه اكل الغلابه اللى زينا
(ارتفاع سعر الفول والعدس وخروجهم من قائمة طعام الفقراء)
حمدان: هو الاكل غلى كدة ليه يا بهية ولا انا اللى مش حاسس بالدنيا
(ارتفاع الاسعار بنسبه 166% من سنه 2005 الى2008)

انا المرة دى مش مع الشعب الظالم المفترى انا مع الحكومة التى لا حول لها ولا قوة وعشان الحكومة تهمنى اكتر من الشعب الطماع ده
انا مع الحكومة اللى بتقولنا انتو عندكم موبيلات واجهزة كومبيوتر فى بيوتكم وبتروحو مطاعم يبقى معاكم فلوس يبقى تستغنواعن الحاجات دى وتحاربو الاسعار بلا تكنولوجيا بلا تقدم بلا نيلة
مع اننا من حقنا اكل وشرب وتحضر ومعرفة للتكنولوجيا
انا بحذر الحكومة وبقول ان اى فساد الناس عرفته دايما بيحاول يسد بق الشعب عشان يعرف يسرق براحته وميخليش الشعب يتكلم عن الفساد
يعنى بيدوها كبسه ورز ولحمه وفراخ وملاهى زى دريم بارك وبرامج من نوعية ميلودى تتحدى الملل وخلينا نايمين فى العسل
لكن انتم عديتوا اى مستوى فساد ظالم الناس تعرفه
وانا بحذر وبقول حذاااااااااارى من ثورة الجياع
حذارى من الجعان لو طلع فى ثورة ومفيش وراه اللى يخسره
حذارى يا حكومة حذارى يا حكومة
لكل وزير او امين لجنة سياسات ويا ريس
حافظو على كراسيكم
مغصة الجوع اقوى من تعذيبات المعتقلات
محدش هيهمه الجيش ولا الشرطة لو جاع
هتقتله؟ الموت ارحمله من انه يعيش جعان فى بلده على الاقل عمره ما هيجوع تانى
هتورولهم العين الحمرا؟ وهتطلعو قوات الامن المركزى؟
طظظظظظظظظظظظظظظظظظظظظظظظ
ولا هيعملو حاجة ساعتها ما هما كمان مصريين وجعانين واهلم شقيانين زيهم واكتر ومش هيضربوا فى اللى حاله من حالهم بالعكس دة ممكن يستخدمو قوتهم وسلاحهم ضدكم ومش هتكون اول مرة تحصل فى مصر
هتقولوا ما احنا عاملين رقابه والدقيق مش بيتوزع فى السوق السودا؟ احب اقولكم ان الرقابه بتنصص مع بتوع المخابز وغيرهم وعلى عينك يا تاجر
الجعان بركان وقوة وطوفان مش هتقدروا تقفوا قدامه لو ثار
وبهانه وحمدان مش هيصبروا كتير ومش هيقدروا يشاركوا فى فيلم بطل للنهاية اللى كل محدودى الدخل بيمثلو فيه
هما صبرو بقليلهم ورضيوا لكن قليلهم مش راضى بيهم وبيتأمر
طب اعتبرونا فلسطينين وحنو علينا من فضلكم واكلونا
ولا اعتبرونا يهود حتى وبيعولنا الحديد بسعر ارخص خلونا نبنى ونلاقى حته نعيش فيها
شكلنا كدة محتاجين ثورة من اجل التغيير
هيجى البنى ادم الرخم والرزل والغبى بتاع كل مرة اللى انتو عارفينه ويسألنى هو احنا هنحتاج ثورة كل كام سنه عشان حال البلد ينصلح يا موزمازيل؟
هقوله مش هعلق على موضوع موزمازيل المرة دى لكن هقولك لاول مرة متبقاش غبى ويمكن كلامك فعلا المرة دى صح
وكدة يا حكومة الشعب بيقول لجيشك والشرطة لما تخوفيهم بيهم
كلمة عبقرية من حرفين لكنها ابلغ من الف مقال طظظظظظظظظ
انا كدة خلصت اللى عندى ونبهتك يا حكومة يا غالية على قلبى
مع انى عارفة انى بضغط عليكى وبرهقك بطلباتى لكن للاسف البد بلدكم ياللى ماسكين الحكومة واحنا ضيوف هنا فى البلد اللى تقريبا واحنا صغيرين قالو عليها بلدنا لكن مش عارفة اطلب من مين غيرك يا حكومة واحنا عبيد احسانك
واخيرا اقروا القصيدة دى لاحمد فؤاد نجم_وشكرا للدكتور اشرف حمدى اللى لفت نظرى ليها
هما مين و إ حنا مين .. ؟
هما الأمرا و السلاطين ..
هما المال و الحكم معاهم ..
و إحنا الفقرا المحرومين
حزر فزر شغّـل مخك
شوف مين فينا بيحكم مين ؟!!
..............
إحنا مين و هما مين ..
إحنا الفعلا البنايين
إحنا السنة و إحنا الفرض
إحنا الناس بالطول و العرض
من عافيتنا تقوم الارض ..
و عرقنا يخضر بساتين
حزر فزر شغل مخك
شوف مين فينا بيخدم مين ..؟؟!!
................
هما مين و إحنا مين ؟؟
هما الامرا و السلاطين
هما الفيلا و العربية
و النساوين المتنقية
حيوانات استهلاكية
شغلتهم حشو المصارين
حزر فزر شغل مخك
شوف مين فينا بياكل مين ..؟؟!!!
....................إحنا مين و هما مين
إحنا قرنفل على ياسمين
إحنا الحرب : حطبها و نارها
و إحنا الجيش اللي يحررها
و إحنا الشهدا بكل مدارها
منكسرين أو منتصرين
حزر فزر شغل مخك
شوف مين فينا بيقتل مين ..؟؟!!!
................
هما مين و إحنا مين
هما الامرا و السلاطين
هما مناظر بالمزيكا
و الزفة و شغل البوليتيكا
و دماغهم طبعاً استيكا
بس البركة بالميازين
حزر .. فزر شغل مخك
شوف مين فينا بيخدع مين ..؟؟؟!!!
.....................
هما مين و إحنا مين
هما الامرا و السلاطين
هما بيلبسوا أخر موضة
و إحنا بنسكن سبعة في أوضة
هما بياكلوا حمام و فراخ
و إحنا الفول دوخنا و داخ
هما بيمشوا بطيارات
و إحنا نموت بالاوتوبيسات
هما حياتهم بامب جميلة
هما فصيلة و إحنا فصيلة
حادي يا بادي يا عبد الهادي
يا اللي عليك قصد الغنوادي ( الغنوة دي أو هذه الاغنية )
لما الشعب يقوم و ينادي
يا إحنا يا هما في الدنيا دي
حزر فزر .. شغل مخك
شوف مين فينا حيغلب مين
وقبل ما اقول انتظر تعليقاتكم اللى عاوز يضيف على البوست من عنده يضيف المرة دى الموضوع ميخصنيش لوحدى ولا هو حدوته من حواديتى اللى بيحكيهالكم كله لازم لازم لازم يتكلم
انتظر تعليقاتكم
*******************************************
تحديث
شكرا لكل اللى شجعونى وفالولى اكتبى اللى فى دماغك مش لازم القواعد اوى وشكرا لكل اللى قرا العك اللى فات
انتظر تعليقاتكم

مش قلتلكم؟!عشان تبقو تسمعو الكلام

مش قولتلكم ان اللى هينشر حاجة من البلوج دة هعرف مكانها

ولم اكذب

لكن اطمنو محدش يسئ الظن فيه مطلعتش حراميه

دة شوية وكانت هتكتب فيا قصيدة مدح

شكرا ليكى

وابقى دايما ادخلى نميمة وعلقى

يا فرحة ابوكى بيكى يا نميمة

شوفو اللينك هنا
ودى مدونة هالة حلمى بطرس
اللى كتبت عنى فى الموقع اللى فات وفى مدونتها


*************************************

تحديث

معلش مازلت لسه بحضر حذارى من ثورة الجياع

لكن كتبته اكتر من مرة ولسه مش مقتنعة لكن اخر ما هزهق

هكتب اى حاجة وخلاص

وتحياتى للى هيستحملنى ويقرا العك اللى بكتبه

ادركت انه زمنا لا مكان فيه للقراءة والكتب

هى -----> فتاه لا غنية ولا فقيرة واهو ربك مش بينسى عباده اعرض عليكم يوم مر بحياتها
(للناس الفلحوسة العبقرية بس بالعكس الشخصية دى مش انا)


خرجت من باب الشقة -مش من باب الحمام- وكل خد عليه خوخة
نزلت من البيت وكانت ماشيه
وانتو عارفين بقة لما الحلوة تمشى تدلع يعنى اللى مش عاجبه يولع
رايحه مشوار كل يوم بتاع الكلية
ادلع يا كايدهم
عدت على ام يوسف البقاله الفتانة النمامه الغلاويه عشان تشترى باكو مناديل وكيس شيبسى اصلها مش بتحب تفطر
هى:كيس شيبسى والنبى يا ام يوسف
ام يوسف: اهلا يا حبيبتشى ازيك عاملة ايه شوفتى بنت ام هند اتجوزت وعريسها بيشتغل محاسب فى شركة انت عارفة عيله ولاد ابو اسماعيل هو منهم دول ولاد عم ابو اللى خلفوه......وكمان
هى:(تقاطعها) الف مبروك يا ام يوسف وعقبال يوسف (ماهو كدة هتاخرنا) كام كدة الحساب؟
ام يوسف: جنيه ونص
هى:باذبهلال والرياله شوية وهتنطر على وش ام يوسف,هو كيس الشبسى بجنية
ام يوسف:ايوة يا حبيبتشى
هى:حتى الشيبسى غلى يلا اشمعنا هو


استمرت ماشية فى طريقها وهى معديه شافت عم احمد بتاع الجرايد كانت عاوزة تعمل زى كل مرة وتعدى تشترى المصرى اليوم لكنها ادركت وبسرعة انها انفقت جنيه ونصف الجنيه فى اول الصباح مما يهدد ميزانية مصروفها اليومى المتواضع


هى:(تحدث نفسها) مش مشكله ابقى ارمى عينى فى جرنال اى حد راكب جنبى او قاعد جنبى وانقر اشوف فى ايه فى الدنيا


واستقلت مواصلاتها اليوميه لكنها لما تجد احدا يقرا جورنال لتقرا معه
يعنى الحال من بعضه والناس مطلعه قرص وسندويتشات وبتاكل
فادركت انه زمنا لا مكان فيه للقراءة والكتب
اخرجت روايتها المفضلة تقرأها نظر اليها الجميع نظرة وكانها اخطات فى فعل شئ وتحدث اليها احد الجالسين بجوارها
هو:هو انتى بتقرى ايه؟
(ادركت حينها انه الامر الغريب الذى فعلته انها تقرا وهو فعل اصبح غريب ومستهجن فى ذلك العصر)
هى:دى روايه الة الزمن لويلز
هو:ودى بتحكى عن ايه دى
هى:بتحكى عن.....أ
هو:يقاطعها:هى بكام اصلا
هى:(تشير له على سعر الروايه الموجود على غلاف الكتاب) بس مش مهم المهم متعة القراءة
هو:متعة ايه بس وبتاع اية انا اجيب بالفلوس دى كيلو لحمة ولا تيشيرت احسن
هى:الموضوع اراء


ولم يتحدثا ثانية حتى نهاية الطريق حيث ادركا انهما مختلفان تماما فهى تعشق القراءة ولكنها لا تستطيع ان تنفق عليها المال طوال الوقت اما هو فلا يقرأ ابدا


وصلت الى جامعتها وفوجئت(بكشك) مكتوب عليه مكتبة بيروت وهو فرع من مكتبه بيروت واخذت تتأمل الكتب المعروضة وهى تأكل الكتب بعينيها تريد ان تجمعهم جميعا داخل حقيبتها وهى تعرف انها تقوى على قراءة كل واحد منهم فى يومين فقط


فهذا كتاب عن الاساطير الفرعونية وهذا كتاب عن الاساطير الفارسية وهذه اشعار لنزار قبانى و....و....و...ولكنها عندما نظرت الى المال فى جيبها ادركت انها لا تستطيع شراء الكتب ولا كتاب واحد حتى فهى عندها احتياجات اخرى يجب ان يلبيها ذلك المال

وهى احتياجات مهمة بالنسبه اليها يتمثل اولها فى شراء خط محمول اليوم
(يعنى المحمول اولى ولا الكتاب اكيد المحمول طبعا)
ولكنها اخذت تفكر وتاكد لها انه زمنا لا مكان فيه للقراءة والكتب
قالت لنفسها:يمكن الغلط عندى انا اللى بختار كتب غاليه هحاول ابص على الارخص بعد كدة
يقابلها اصدقائها
اصدقائها:ايه يا بنتى انتى ميته بقالك 4 ايام ولا اية احنا رايحين نتغدى تيجى معانا؟
هى:( هموت من الجوع اصلا) اه هاجى معاكم
اصدقائها:هنروح فين بقة؟
هى:هنروح فين يعنى الساعة 3 العصر بينا على الكبارية


يضحكون جميعا ومن الممكن ان تكون ضحكاتهم تخفى حزنهم وتخفى حزنها على عدم قدرتها المادية لشراء الكتب وممارسة هوايتها التى تعشقها ومن الممكن ان يكونوا واجهوا مشكلة عدم القدرة الماديه سابقا


(لان كيس الشبسى وباكو المناديل وخط المحمول اولى وهى باين عليها كدة همها على بطنها ورغاية ساعة لقلبك)
ولكنها اخذت تفكر وتفكر رغم ارتفاع ضحكات اصدقائها حولها كان يدور فى بالها جمله وهى
انه زمنا لامكان فيه للقراءه والكتب
وفى طريقها للعودة رأت كتب _على رصيف _لا يتعدى طولها السنتيمترات
ارادت شراء كتاب لكنها ادركت انها انفقت اموالها على الطعام
ومن غيظها الذى لم تستطع التحكم فيه اكثر من ذلك صرخت وقالت
انه زمنا لا مكان فيه للقراءة والكتب
انه زمن الجياع
زمن اللى معاه قرش يحوط عليه
زمن لم يعد يذكر فيه مثل اللى معاه قرش محيره يجيب حمام ويطيره
اصبح زمن اللى معاه قرش محيره يجيب حمام ويحمره وياكله قبل ما الاكل يتمنع

زمن غلاء الاسعار زمن ضياع اهداف الثورة
انه زمن الفوضى زمن الافلاس
انه زمن الجياع انه زمنا لا مكان فيه للقراءة والكتب
انتظر تعليقاتكم

*************************

تحديث
ميجيش الواد الرخم ويقولى كتب ايه اللى بتتكلمى عنها دول غلو السكر غلو الزيت وكمان هنبيع عفش البيت انا كتبت اللى انا عاوزاه وخلاص

انتظروا بوست (حذارى من ثورة الجياع) coming soon