الفرح اسلامى نص ونص

اللى عاوز يكبر الصورة ياخدها كوبى ويعملها زوووووووم ان

من مدة كدة سمعنا انه فى خطوبه هتم بين واحدة احنا عارفنها وواحد احنا عارفينه بردة
ومحدش يظن الظن اياه فى ماما مكنش ليها يد فى الموضوع دة
الست بريئه المرة دى مخطبتهمش لبعض

كل الحكاية ان احنا عارفين العريس لانه ساكن جنب خالتشى العزيزه (ماما سوسو) اللى عمرى ما قلتلها يا خالتشى خالص

طبعا مش قادرة اقلكم انا فرحت قد ايه طبعا لسبب تانى غير الخطوبه وهو ان البنت دى يتميه ومفيش اى فرح من اى نوع دخل بيتهم من يوم بيت مامتها الله يرحمها وقد ايه كل الناس كانت فرحانة بردة لنفس السبب

واكيد طبعا فرحتلها برده عشان هتتخطب

ندخل فى الموضوع

قبل فرح البنت دى بيوم وانا قاعدة بذاكر لقيت زغاريط زغاريط زغاريط واغانى من نوعيه النهاردة فرحى يا جدعان والعنب يا اخويا العنب طبعا دوشه ملهاش مثيل وانا بكره كدة وبدات بنفسى ومكنتش مشغله مزيكا يوم فرحى عشان مضايقش حد كفايه يوم الفرح او ساعتين كدة ولا حاجة

دول ولا اى حاجة من الكلام دة فكرو فيها

من الساعة 11 ونص الصبح مصحيين الناس اللى حوليهم كلهم بالاغانى والزراغيط

مش مشكله عدوها بقى متبقوش رخمين دة مهما كان فرح

ولما تعرفو بقية البوست هتعرفو انى بجد قلت مش مشكلة اللى عملته

طبعا فى اول البوست انا قلتلكم ان ماما مكنش ليها يد فى الموضوع

لكن طبعا طبعا طبعا مينفعش تسكت كدة وتقعد حاطة اديها على خدها وتستنى المعلومات تجيلها من برة دة يبقى عيب عليها اوى

لازم طبعا كالعادة تلبس بالطو شارلوك هولمز وتعمل تحرياتها اللازمة

هيجى الواد الرخم ويسالنى ويعنى هى هتعرف بيانات العريس منين مظنش انها عرفت يا فزفازيل؟

ياهووووووووووووو حد يخليه يقول كلمه مودموازيل صح بدل ما ااجرلو اتنين على باب المدونة يقطعوه لو دخل تانى

مين دى اللى متعرفش يا فاشل هو انت مفكر ان ماما دى زينا كدة وزيك وعادى يعنى

طبعا عرفت وعرفت هو مين وساكن فين (مش قلتلكم انه ساكن قريب من خالتشى) وبيشتغل فين وكل حاجة تقريبا

وكان الكلام عادى انه سنى ومربى دقنه وبيشتغل فى السعودية وكتبوا الكتاب والدخلة لما يخلصو التجهيزات وهيسافر بيها السنة اللى جايه

وعرفنا كمان انه فرض شويه شروط

اولها ان الفرح لازم يكون اسلامى

ثانيا ان من اول الخطوبه لازم لازم لازم لازم تلتزم بلبس الاسدال

ثالثا انه لما يتجوزوا لازم لازم لازم تلتزم بالنقاب

وكانت دى شروطة غير الشبكة والاتفاقيات التانيه طبعا بس هو مكنش هيتمم الجوازه دى من غير ما يوافقكو على شروطه

الشرط الاول الفرح كان اسلامى جداااااااااااااااا لدرجه اته مكنش فى اى اغانى من اللى بيقولو عليها اغانى اسلامية

وكان الرجاله تحت والحريم فوق

وطبع منظر قعدة الرجاله تحت برصتهم جنب بعض ومربعين ايديهم وكانه

عزا احنا قولنا الفرح اتلغى دة حتى مفيش اغانى اسلامية ولا مسابقة دينية ولا نفس ولاحس

لكن اكتشفنا انه عادى فانا طبعا مسكتش لازم ارميلى كلمه على الماشى وانا مع ماما واصحابها واحنا معديين على الرجاله بقولهم (اصحاب ماما)ايه دة هما عاملين الفرح سيلنت ولا ايه؟؟راحت ماما ضاحكة وقالتلى اسكتى قلتلها خلاص متزعليش عاملينه فيبريشن المهم ممنوع الرنات (يعنى لا رنتك باسم حضرتك ولا اسماء الله الحسنى حتى) راحو كلهم ماتو من الضحك وفضحونا لان ابو العريس كان لازم فى قفانا وتقريبا والحمد لله سمع كل تعليقاتى

كانو بيضحكو على ايه مش عارفة

بعد كدة طلعنا فوق عشان نبارك للعروسه احنا جاينلها اصلا

ندور العروسة مفيش عروسة ندور على العروسة مفيش عروسه

يالهووووووووووووووى العروسه اتخطفت يا جدعان حد يدور وانا بهم بشمر كمامى عشان ادور على العروسة تحت الكراسى او الترابيزات او عند الشباك لتكون انتحرت من الفرح بعد ما اديت لماما الموبايل عشان تتصل ب122 بسال الناس فين العروسه قالولى العروسة هناك

وانا طبعا شعرى وقف وكانه لزق فى ماس كهربا_بعد الشر عليا وانشالله اللى يكرهونى _ اول ما شوفت العروسه

دى العروسه؟؟!!!! خليكو معايا يا بنات واحكمو انتو عشان تفهمو الشباب

بادئ ذى بدء لابسه عبايه عاديه جدا اشبه للجلابيه(انا مش بتريق انا بوصف الحقيقة والله) ومن دون كل الالوان اختارت اللون البنى الغامق

طنشو اللى فات دة واعتبرو نفسكم ماخدتوش بالكم خليكو فى اللى جاى

كمان العباية مش سواريه يعنى لا خرز وترترايه واحدة حتى طب ليه كدة يعنى ماهو ممكن تجيب عبايه بس سواريه وبلاش اللون اللى مش نافع اللى كانت لبساه ده لكل مقام مقال دة فرح يعنى مش نازلين السوبر ماركت

هتقولو عشان الترتر بيلفت انظار الرجال من قبيلة بنى عدس وقبيله بنى عدس بجبه فعشان محدش يشوفها وهى جاية كدة حتى لو كان يوم فرحها

طب ايه رايكم انها مراحتش لكوافير من اساسو ومنزلتش من باب البيت ومكنتش حاطه حاجة خالص غير الكحل ما علينا حتى الطرحة كانت لفاها واكنها نازله تجيب حاجة من البواب

مع العلم انى حضرت افراح اسلاميه قبل كدة كانو بيجيبو دفوف فى القاعة عادى وبياجرو قاعتين بردة فوق ستات وتحت رجاله بس كان بيبقى فى اغانى واحيانا زغاريط والعروسه بتبقى عامله فى نفسها اللى متعملش وميكب اب مفيش عروسة عاديه تعمله وفستان لو حاولت تظهر بيه على التلفزيون الرقابه هترفض بس كله ده بردة ولما كانت بتيجى من برة كانت بتبقى مستغطية وتشيل الغطا فى القاعة عادى

طب ليه هى مثلا معملتش كدة ؟ مع العلم ان الظروف المادية ملهاش مكان فى حديثنا هنا

كله ده عشان خاطر عيون العريس عشان بذكائه الغير معهود من ذى قبل عاوز كدة

دة غير انها كانت قاعدة على كرسى مش على كوشه فمحدش عرفها وكله كان بسال عليها هى فين

مش عاوزة اقلكم طبعا ان البنت مكنتش مبسوطة بقة هودة اليوم اللى البنت بتستناه يوم خطوبتها اليوم اللى يجيلها فيه واحد تحبه وخصوصا انها عادية بتلبس بناطيل وبلوزات وبتسمع اغانى وبترقص عادى يعنى هى مش متدينه اوى ولا حاجة متدينه عادى

بس هى كان منطقها(انا كل اللى فى سنى اتخطبوا اشمعنى انا) وعشان كدة اتنازلت ولبست الاسدال وهتلبس النقاب فى مقابل انها تتجوز

وكان كل ما العريس عينه تغفل عن المكان ساعة الاغانى تشتغل والرقص يشتغل والناس مبقتش عارفة الفرح عند الحريم فوق اسلامى ولا مش اسلامى وموقفين حد (نادورجى) لما يحس ان العريس ممكن يطلع يعرفهم يقفلو كل حاجة ويعملو محترمين وقاعدين مربعين ايديهم دة غير الهيصة بتاعة اليوم اللى قبليه

يعنى البنت متغيرتش ولا هتتغير لانها حابه تعيش حياتها على نمط وهو نمط تانى خالص

طبعا كان المفروض ان العريس العبقرى يعرف انها ملبستش الاسدال ولا هتلبس النقاب عشان ربنا

دى هتلبسو عشان تتجوز يعنى محجبه من بره لكن قلبها مفهوش حجاب والحجاب اللى على الجسد مش بيستر زى الحجاب اللى من جوة الانسان

اللى مزعلنى انها عملت كدة عشان بنى ادم مش عشان ربنا واحكمو انتو من اللى فات هى عملت كدة عشان مين

وكمان انا مش فاهمة ليه التشدد اللى ملوش لازمة ده الفرح كله حريم ليه حكم عليها متعملش حاجة ولا تروح لكوافير ولا تلبس فستان كدة غباء بجد

طب مانت عملت الفرح اسلامى ودة احسن انه بيدى للعروسة فرصة تبقى على راحتها فى لبسها ومكياجها وعلى فكرة انا مش ضد الافراح الاسلامية كل واحد يختار فرحة بالطريقة اللى يحبه بيها

بس دة مكنش فرح خالص لا اغانى اسلاميه ولا عروسة شكلها عروسة دى كان بيبقى شكلها عروسه فى الايام العادية اكتر من كدة ولا حتى واحدة صورتهم زى ما بيعملو فى الافراح الاسلاميه ولا اى حاجة خالص

ليه النكد دة بس

انتظر تعليقاتكم