![](https://blogger.googleusercontent.com/img/b/R29vZ2xl/AVvXsEhASdZfz9wavrXYgVyM4kQ8tdk6MhvlyxF-B_4vt_Ky2Bd0DWfBvi3nJLykdGMPbCWhkaWSHAbMHu3Dy0PqvjWOw5NtdCAhsbkNspC6WU-ipSGaIxf0kgcRARJV3VL79SIOBPE0BBGnSQ/s320/untitled.bmp)
ومحدش يظن الظن اياه فى ماما مكنش ليها يد فى الموضوع دة
الست بريئه المرة دى مخطبتهمش لبعض
![](https://blogger.googleusercontent.com/img/b/R29vZ2xl/AVvXsEjI-CMxT1YqaUgQO36NrhKlz-qZhABCYt7-bQet2C6mnhqB9yrbw3ZYrPBnIjvbz4b74C7yPwLw3SctCyhYlq5r7Uz5Z7l79T5lskE4S_5pgYvk2e-rNAP_NvMnFFvSWL1IOqYEcOtf-A/s320/200px-Lens_lente_francesco_ro_r.svg%5B1%5D.png)
![](https://blogger.googleusercontent.com/img/b/R29vZ2xl/AVvXsEhEwYPkGme6U54aXQI9XHKrYRywbIxFUGyPF4Q04Im-i5tatEcWzmVppXH7ttvhTW9pN6Nz5CLF_85aL3QwEj1RJ-c1bC97Oegtj4GveGqT60MB5a5YfDHRgpnmSd13GZSs0TW8KI72Zw/s320/628816027656%5B1%5D.jpg)
وانا طبعا شعرى وقف وكانه لزق فى ماس كهربا_بعد الشر عليا وانشالله اللى يكرهونى _ اول ما شوفت العروسه
دى العروسه؟؟!!!! خليكو معايا يا بنات واحكمو انتو عشان تفهمو الشباب
بادئ ذى بدء لابسه عبايه عاديه جدا اشبه للجلابيه(انا مش بتريق انا بوصف الحقيقة والله) ومن دون كل الالوان اختارت اللون البنى الغامق
طنشو اللى فات دة واعتبرو نفسكم ماخدتوش بالكم خليكو فى اللى جاى
كمان العباية مش سواريه يعنى لا خرز وترترايه واحدة حتى طب ليه كدة يعنى ماهو ممكن تجيب عبايه بس سواريه وبلاش اللون اللى مش نافع اللى كانت لبساه ده لكل مقام مقال دة فرح يعنى مش نازلين السوبر ماركت
هتقولو عشان الترتر بيلفت انظار الرجال من قبيلة بنى عدس وقبيله بنى عدس بجبه فعشان محدش يشوفها وهى جاية كدة حتى لو كان يوم فرحها
طب ايه رايكم انها مراحتش لكوافير من اساسو ومنزلتش من باب البيت ومكنتش حاطه حاجة خالص غير الكحل ما علينا حتى الطرحة كانت لفاها واكنها نازله تجيب حاجة من البواب
مع العلم انى حضرت افراح اسلاميه قبل كدة كانو بيجيبو دفوف فى القاعة عادى وبياجرو قاعتين بردة فوق ستات وتحت رجاله بس كان بيبقى فى اغانى واحيانا زغاريط والعروسه بتبقى عامله فى نفسها اللى متعملش وميكب اب مفيش عروسة عاديه تعمله وفستان لو حاولت تظهر بيه على التلفزيون الرقابه هترفض بس كله ده بردة ولما كانت بتيجى من برة كانت بتبقى مستغطية وتشيل الغطا فى القاعة عادى
طب ليه هى مثلا معملتش كدة ؟ مع العلم ان الظروف المادية ملهاش مكان فى حديثنا هنا
كله ده عشان خاطر عيون العريس عشان بذكائه الغير معهود من ذى قبل عاوز كدة
دة غير انها كانت قاعدة على كرسى مش على كوشه فمحدش عرفها وكله كان بسال عليها هى فين
مش عاوزة اقلكم طبعا ان البنت مكنتش مبسوطة بقة هودة اليوم اللى البنت بتستناه يوم خطوبتها اليوم اللى يجيلها فيه واحد تحبه وخصوصا انها عادية بتلبس بناطيل وبلوزات وبتسمع اغانى وبترقص عادى يعنى هى مش متدينه اوى ولا حاجة متدينه عادى
بس هى كان منطقها(انا كل اللى فى سنى اتخطبوا اشمعنى انا) وعشان كدة اتنازلت ولبست الاسدال وهتلبس النقاب فى مقابل انها تتجوز
وكان كل ما العريس عينه تغفل عن المكان ساعة الاغانى تشتغل والرقص يشتغل والناس مبقتش عارفة الفرح عند الحريم فوق اسلامى ولا مش اسلامى وموقفين حد (نادورجى) لما يحس ان العريس ممكن يطلع يعرفهم يقفلو كل حاجة ويعملو محترمين وقاعدين مربعين ايديهم دة غير الهيصة بتاعة اليوم اللى قبليه
يعنى البنت متغيرتش ولا هتتغير لانها حابه تعيش حياتها على نمط وهو نمط تانى خالص
طبعا كان المفروض ان العريس العبقرى يعرف انها ملبستش الاسدال ولا هتلبس النقاب عشان ربنا
دى هتلبسو عشان تتجوز يعنى محجبه من بره لكن قلبها مفهوش حجاب والحجاب اللى على الجسد مش بيستر زى الحجاب اللى من جوة الانسان
اللى مزعلنى انها عملت كدة عشان بنى ادم مش عشان ربنا واحكمو انتو من اللى فات هى عملت كدة عشان مين
وكمان انا مش فاهمة ليه التشدد اللى ملوش لازمة ده الفرح كله حريم ليه حكم عليها متعملش حاجة ولا تروح لكوافير ولا تلبس فستان كدة غباء بجد
طب مانت عملت الفرح اسلامى ودة احسن انه بيدى للعروسة فرصة تبقى على راحتها فى لبسها ومكياجها وعلى فكرة انا مش ضد الافراح الاسلامية كل واحد يختار فرحة بالطريقة اللى يحبه بيها
بس دة مكنش فرح خالص لا اغانى اسلاميه ولا عروسة شكلها عروسة دى كان بيبقى شكلها عروسه فى الايام العادية اكتر من كدة ولا حتى واحدة صورتهم زى ما بيعملو فى الافراح الاسلاميه ولا اى حاجة خالص
ليه النكد دة بس
انتظر تعليقاتكم
90 comments:
التعصب وحش يا صحفيه
و للأسف التعصب..بيعصب العين على انها تشوف و بتسد الودان عن انها تسمع صوت تاني غير صوت عقلهم
صحبتك حيتعملها غسيل مخ ...و بكرة تقولي مفروسة قالت
يعني بعد كدة لو شفتيها حتفضل تديكي فى مواعظ لا اول لها و لا آخر
ربنا يهدي سرها
عارفة فعلا مدونتك اسم على مسمى نميمة ع المصطبة
يا ترى الي يدخل هنا يكسب ذنب..ههههههههه
بهزر بس على فكرة كلامك العامي حلو شكل دمك زي الشربات
مهو أنا أساسا مش بيجيلي خلق أقرا كلام عامي بس انت كلامي بيشدني بيسحبني كده حبة حبه ألاقي البوست خلص
الله عليكي يا صحفية عاوز أجيلك تديني دروس بس ببلاش ولا مش ممكن..
كل الود
ازاااااااى و مين و فين و لية؟؟
حتى لو فرح اسلامى الرسول عليه الصلاة و السلام صرح بالدفوف و قال ان الفرح لازم يفرحوا فيه العروسة ..اومال العروسة ازاى تحس ان دة يوم مختلف فى حياتها ...والله البت صعبت على ازاى قدرت تتنازل عن حلم كلنا حلمناه و من واحنا اطفال اننا نلبس فستان و نبقى زى الاميرات فى بتوع الكرتون ..حتى لو كان الحلم ساذج فى نظر البعض و انه مش مهم بس بانسبة لنا حاجة جميلة اوووووووووى وبتسيب اثر جامد فى نفسيتنا ..هى ماخدتش بالها ان من الشروط بتاعته دى انه هايطلع عينها بعد الجواز؟؟
يعنى هى كدة داخلة على حياة الله يسترها معاها و يهديه..يارب لو كان الموضوع شر اصرفه عنها و اصرفها عنه و قدرها الخير يااااااااارب
واحدة مفروسة
ربنا يرحمها
ويصبرها على اللى هتشوفه
وفعلا
هتفكر نفسها متدينه بعد فترة
كاتب مصرى
استخدامى للعامية تقدر تقول عليه اتجاة او اسلوب انا ماشيه عليه لانى زى ما اتعلمت فى صحافة ان لو عاوز الناس تفهمك اتكلم باللغة اللى يفهموها والموضوع مش مستاهل عربى فصيح
هديك مثال قريت البخلاء للجاحظ
المفروض انه كوميدى لكن مش بيضحكنى خالص لانه مكتوب بلغة متضحكش اصلا
انما شوف الموااضيع الساخرة فى اى مدونه غالبا فيها حاجات تضحكك لانه بلغة انت بتفهمها وبتستظرفها ودى كمان اللى انت بتستخدمها فى الحياه العادية وكمان متقلقش من موضوع النميمه انا نميمتى للصالح العام شم بيجيب فى سيرة الناس واسرارهم ومش بذكر هما مين كمان ولا اسمهم ايه
المهم انك مبوسط من كتابتى ومن مدونتى ودة الاهم
زورنى دايما
سو
مثلا
يعنى مش من حق البنت انها تحس ان ده يوم مختلف
انا معاكي جدا انها مش المفروض تعمل كده عشان العريس
بس مش يمكن هي كانت مقتنعه و هو شجعها
الراجل ده صح بس على كلامك هو اختار غلط
يععععععععععععععععع
كل واحد حر فى طريقه فرحه
بس هو لو فكر انه كدة ماشى صح
يبقى يروح يركن على جنب بقه
لان زى منتى قلتى
هى مش حتتغير
كان مرة فى فرح عند بيت خالتشى بردوه
و كان تقريبا قرايب العريس كلهم شيوخ و سنيين
الراجل موجود اغانى اسلاميه و دفوف و بصراحه دماغنا صدعت لانه كان تقريبا كان شريط واحدو عمال يتكرر
الراجل يروح يجيب حاجه
بسرعه اقلب يا بنى
شريط ايهاب توفيق
كان لسه تامر حسنى متشهرش اوى زى دلوقتى
و شويه و الراجل طب
عارفه شكل النمل و هو شايل اكله و يجى حد و يضربه مثلا
بيبقى عمال يجرى يمين و شمال و الحاجه واقعه فى اللارض
اهو تقريبا نفس المنظر
اللى نط من الشباك
و اللى طله يجرى
و محدش افتكر انه يوقف الكاسيت
هههههههههههههههههههههههه
و لاالعروسه
كانت لابسه فستان فرح عاادى و بنقاب
انا بصراحه اتخضيت
بس مش مشكله
اتمنى تشرفينى بزيارتك
و دمتــــــــــــــــــــــــــــــم
هههههههههه
عجباني موت (عاملين الفرح سايلنت)
البوست لزيز مووووووت ..وأسلوبك بجد تحفة فعلا نميمة علي المصطبة
بجد أحييكي :)
دي عالم عجيبه وعمالين يزيدوا في البلد وكلها أفكار مستورده ومبتدعه
تخيلي الكلام دا بحصل في مصر أهو بيعدي، تخيلي بقي لما يعملوا الكلام دا في أوروبا مثلا بيتقال علينا إيه
الناس دي بتسيء للإسلام أشد إساءه، وهما إلي بيدوا المواضيع لغيرنا يهاجمنا بيها
تحياتي علي التدوينه الجميله دي
هو اه الفرحة في القلب
بس مش بالمنظر ده
ده باين عليه عريس كئيب وهايجيب للبت أكتئاب
كان لبسها فستان حتي تفرح بنفسها شوية وتحس انها عروسة
يالا ربنا يخلف ظننا فيه ويسعدها الغلبانة دي
الحقيقة ده المشكلة بتاعت المجتمع محدش لازم يكون مقتنع بالحاجة عشان يعملها ولا حتى اللى بيقول لحد يعمل حاجة مهم عنده انه يكون مقتنع برضوة المهم يمشى كلامه زى الموقف ده كدا
وكما قولتى التدين ليس منظرا خارجيا فقط انما الجوهر هو الاول ثم المنظر يأتى
رغم غرابة الطريق بتاعة الفرح اللي بتتكلمي عنه الا انه كان ممكن يكون مقبول لو كان الطرفين مبسوطين .. لكن انها تقبل بالشروط دي علشان الجواز بس يبقى اكيد فيه خلل .. تحياتي
الدين عمره ما كان مجرد مظاهر وبعدين مين اللى حرم الفرح والله التعصب ده بقى حاجه تخنق .. وكمان هى ممكن تلبس عروسه وتكون برضه محجبه ومحترمه جدا ..
ليه تضيع فرحتها بليلة العمر بجد حرااام .
تحياتى
rovy
لا اله الا الله
فقعتيني علي الصبح بجد
اولا : البنت غلطانة انها تتجوز واحد هي مش متفقة مع وجهة نظره وهتتعب معاه جدا لانها لو قبلت دا دلوقتي مش هتقبله بعدين ولا هتقدر تكون زي ماهو عايز ولا هتقدر ترجع زي ما كانت
ثانيا : هو حر طبعا في وجهة نظره لكن كان اختار واحدة من نفس تفكيره لانها بردو هتتعبه جدا ومش هيكون سعيد معاها لان لو هي بتعمل الحاجة اللي عايزها قدامه اكيد هتعمل اللي هي عايزاه من وراه
ثالثا : موضوع الفرح الاسلامي او الغير اسلامي , انا اساسا مش بحب الكلمة دي , هو فرح ما فيش حاجة اسمها فرح اسلامي , عايز مش تشغل موسيقي خلاص انت حر , لكن حتي الرسول اباح الدفوف والغناء لكن مش هيبقي ماتم زي ما بتقولي الواحد ممكن يفرح من غير ما يغضب ربنا, دا نكد مش فرح
بس انتي صحيح لسة ما عرفتيش كانوا بيضحكوا ليه :)
أكيد ما صدقوا لقوا حد خرجهم من القعدة دي
بصى يا صحفيه....الموقف ممكن يكون غلط بس انتى كمان بوستك غلط وكلامك واسلوب طرحك للموضوع غلط اكبر ....بادىء ذى بدء وصفك للعريس فى البدايه خالص انه سنى غلط. انا عارف انك تقصدى انه دقنه طويله وممكن تكون جلابيته كمان قصيره. بس تصدقى انا كمان سنى ومش بعمل كده وتقريبا اغلب المسلمين فى مصر سنيين ومش كلهم بيعملوا كده وانتى كمان سنيه وانتى عارفه بقى. فياريت حضرتك متحصريش السنى فى كده بس وتعرفى الفروقات مادام قررتى تتكلمى فى الموضوع ده.
ثانيا دخلتى لقيتى الرجاله قاعده ساكته مش فاهم كنت داخله متوقع ايه يعنى؟ تلاقيهم بيرقصوا مثلا ولا تلاقيهم ولا تلاقيهم بيغنوا مع المطرب ورافعين ايديهم بالعلامه الشهيره؟ أنا معاكى ان كان ممكن مسابقات مرحه بتتعمل فى الوقت ده او حد محترم يكون بيقول كلمه عن الزواج او العريس يكون جايب فرقه اسلاميه رجالى تغنى للناس اللى قاعده ( لو متيسر ماديا) بس طبعا حتى لو عمل كل ده مع بعضه مكنش حيعجبك وكنتى حتعلقى عليه برضه وتقوليلك كلمتين.
ثالثا انا معاكى ان اللى كان بيحصل عن العروسه ده مش صح وخصوصا ان المكان كله حريم بس ياترى فكرتى ايه السبب فى كده؟ مش ممكن يكون ان البنت علشان مامتها متوفيه معرفتش تتصرف وتظبط نفسها ويبقى موضوعك احسن عن أثر غياب دور الام على فرح البنت؟ ومش عارف ليه استبعدتى الظروف الماديه مع انى ملاحظ ان الفرح فيه توفير مادى لاقصى حد مش ممكن يكون الناس دى ظروفها الماديه تعبانه زى أغلب افراد الناس فى مصر او يكون العريس مثلا بخيل؟ ويبقى موضوعك عن البخل واثره على تظبيط الافراح؟ مش ممكن يكون البنت دى ملهاش صاحبات ومحدش وقف جنبها ينصحها فى الألوان وفى اللبس وفى اللى تعمله فى الليله دى؟ ياترى جربتى لما عرفتى ان فى فرح بنت يتيمه جنبكم تنزلى وتشاركيها وتعرضى عليها خدماتك ولا اكتفيتى بس ببحث مامتك عن اصل وفصل العريس واللى خلفوا العريس واكتفيتى بالفرجه والنقد فى الفرح؟ ربنا يكفيكى شر كده فى فرحك.....حاجات كتير قوى يا صحفيه كان ممكن تتعمل فى الواقع وكان ممكن تتعمل فى مجال الموضوعات الصحفيه احسن من كده. احسن من اننا نطفش ونكره بناتنا فى الافراح الاسلاميه اللى بدأت تنتشر فى البلد. اسمحيلى انا مش شايف فايده فى الموضوع ده غير اننا نكره البنت فى كلمه اسمها فرح اسلامى مع انها لما بتتعمل صح ولو جه الله بتكون احلى وانضف واشرف بكتير قوى من اى حاجه تانيه......تحياتى وشكرا
ازيك يا نميمة
عاملة ايه
طيب مش تكتبي لنا كمان رايك في الافراح التانيةايه؟؟
عموما التوسط جميل في كل حاجة
بس تحليلك للموقف وجهة نظر تخصك لان البنت ممكن تكون مبسوطة كدة
او مش مبسوطة ما تقدريش تحكمي مية الميةومين عارف يمكن ربنا يكرمها فعلا وتتدين جد مش غصب عنها زي ما توقعتي
اصل من تجربتي الشخصية اللي يتذوق التستر والالتزام صعب انه يرجع لورا
ولكل قاعدة شواذها برضه مش حكم عام
مبارك لهما عليهما
وربنا يهدي سرها
طب تمام
كويس انك ذكرتي انك رحتي قبل كده افراح اسلامية وحضرتيها وعرفتي أد ايه هي بتبقى حلوة انا فعلا كنت لسه بقول في عقل بالي،، حلوة عقل بالي صح،، كنت بقول اني هحكيلك ع الافراح دي انما انتي الحمد لله شوفتيها بعينك محدش قالك
بس عموما الفرح الغريب اللي كنتي فيه انا مرة حضرت حاجة شبهه بس على احسن الحمد لله،، ببقى فعلا مستغربة منطق العرسان انهم ينكدوا ع العروسة في اليوم ده واهلها وجيرانها واهاليهم واهله وحسبي الله ونعم الوكيل
بقولك يا قمر،، سيبك انتي ،، انتي عامله ايه؟؟ ماحدش شافك من زمان يعني؟؟
صحفيتنا الروشة
الناس دول فاهمين الاسلام غلط
فاهمين ان الاسلام دقن و111 مرسومة على الجبين
الاسلام دين يسر
واجاز الفرح والسعادة
بس تقولى اية فى العقول اللى بتسئ للاسلام قبل ماتسئ لاحد
تحياتى لكى
ويسعدنى تواصلك
بجد بجد حاجه صعبه خالص
تفتكرى هتقدر تستمر معاه؟
او اللى هو بيعمله ده صح؟
وماله لما تلبس وتتذوق وتدخل القاعه مغطية جسمها
ما كل الافراح الاسلامية كده
وبعدين فى عهد الرسول عليه الصلاة والسلام كانت العروس بتتزين يوم فرحها وكمان كانوا بيضربوا الدفوف
التعصب وحش قوى وبيقتل الروح
ربنا يكون فى عونها
السلام عليكم
إزيك يا روشة
عموما أنا رأيى إن العريس إختار واحدة شايفها مناسبة له من وجهة نظره و طالما إنه متدين و ملتزم يبقى أكيد صلى صلاة إستخارة و طالما عمل كده و ربنا ما بعدهوش عنها يبقى أكيد فيها خير له و لها ..
مكن تكون هى وافقت علشان تجوز بس..
لكن أكيد بعد كده ربنا ح يكرمها و تلتزم بصحيح
عقبال كل المسلمات يا رب..
قولى آمين يالا ....قولى آمين
وبالنسبة للفرح أنا عن نفسى ما حضرتش أى أفراح إسلامية قبل كده
لأنى أصلا مش من هواه الحفلات و الأفراح و كلام من ده..
لكن يالا ما علينا...إنتى سغلتى نفسك بيهم....
وهما زمانهم نسيوا الفرح أصلا
دمتى بكل خير و عقبال فرحك و لما نشوف بقى حتعمليه إزاى..
هههههههههههههههه
بصى يا مها
التدين الظاهرى من اجل شخص من وجهة نظرى مش كويس لكن إنه يكون بداية عشان التدين الحقيقى ده كويس وهى نفسها لما تبقى مقتنعة بالحجاب هتعمل من نفسها فرح إسلامى صح ،مش عشان خايفة لعريسها يشوفها
بجد موضوع جميل جدا زى باقى مواضيعك الجميلة
تسلمى
السلام عليكم
الفرح مطلوب
وكمان العقل مطلوب
يعني العروسة لازم تفرح لانه ده حقها
لانه غير معقول اكون في فرح وقاعد مربع ايدي
الافراح الاسلااميه فيها زغاريط واغعاني كمان
يعني في فرح
كل بنت بستني اليوم ده
ولاكن مش كل انسان قرا كلمتين في الدين اصبح ملتزم وفاهم كل تعاليم الدين
لاننا بشر وليس لنا الكمال
لازم نفرح لازم تحس انها فرحانه
لازم تحس انها عروسة في يوم فرحها
لازم تحس بالراحه معاه وانه عاوز يفرحها طالما الفرح مدخلش البيت من فتره
ايه ده القمر رجع وانا مااعرفش نورتى ياصحفيه ياروشه وصحيحي ده بيتك ومدونتك لكن انت فعلا زحشتينى جدا رغم انى فعلا مااعرفكيش الا من بوستين او تلاته بالكتير بس بجد حبيتك جدا
نيجي باه للعروسه العجيبه دي انا بقى شفت اللى ازخم من كده بس كان من العروسه
بنت اعرفها هى اتجوزت على فكره بس مارضييتش خطيبها يشوفها ابدا قبل كتب الكتاب عديها الاغرب والعجيب قوي فى الموضوع
انها رفضت ان والده العريس او اي حد من قرايبه يشوفها احسن يوصفوها ليه
تخيلى تقوليش يعني الفاحشه هتحدث اذا حتى وصفها
ربنا يرحمنا ونفهم دينا صح بجد بلدنا اتدهورت من التفكير ده
تحياتي وبحبك جدا
من وجهة النظر العلمانية الكلام ده كله تخلف ورجعية
حتى ولو في ألف دليل على إن الله سبحانه وتعالى يريد ذلك ف القرآن والسنة
لأن الحرية الشخصية هيا قدس الأقداس ولا ينبغي أن تمس البتة
تحياتي
عارفه بقى انا كان ممكن ابقى زى العروسه دى
بجد النوعيه دى من الناس مش عارفه ايه تفكيرهم بجد
ياريتها تيجى على اد الفرح وبس
لا الشغل ممنوع وكل حاجه ممنوعه
يعنى سجن مش جواز
ماينفعش يا جماعه
الجواز ده حوار مش كله لاااااااااازم لازم لازم دى
ماينفعش
دى شركه
ولو بدأت بفرض الرأى فى الفرح فى الاول كده
يبقى مش هينفع فى الاخر
اولا احب اعبر عن اعجابي بمدونتك الجميلة واسلوبك الشيق الجميل
ثانيا
وانا بقرا البوست كنت شوية اضحك وشوية اتنح
واتصدمت بجد من العروسة لان ازاي في فرحها تلبس عادي وتلف طرحة عادي ومش حاطة غير كحل؟؟
اومال لما تتجوز مش هتحط حاجة خالص؟؟!!
استغربت كمان من موقفها في لبس السيدال وانها هتلبس النقاب علشان العريس !!!
الحاجات دي لازم تكون من القلب وعن ايمان واقتناع بيها مش مجرد انها هتتلبس علشان اتجوز
بعدين هي بنت وليها مرحلة لازم تعيشها ازاي بقى مش يتعملها فرح ولا تلبس فستان ولا الناس تغنيلها
هتيجي في يوم وختحس بالندم او لانها هتكون نفسها تعيش اليوم دة
كفاية نم كدة
تحياتي وتقديري لكي ولمدونتك
سارة
اكيد طبعا مكانش ده فرح اسلامي
لان الاسلام دين الوسطية
مش دين التشدد بالطريقة دي
وكمان دين دخل في القلوب قبل ما يظهر على الانسان
بجد الناس دي بتصعب عليا وبدعي ربنا انه يهديهم للصح
دا مبقاش فرح يا بنتى دا بقى حاجه تانيه
امال الناس تنبسط ازاى فى الفرج
حلو اوى اسلويك بجد:D
بصى با قمر هقولك مثل على التناقد اللى عند الناس
اللى هو ايه عارفه المذيعه اسمها ايه دي مش فاكره المهم كانت ممثله وبقت بتعمل برنامج ديني ربنا يهدي المهم مره اتكلمت عن الفرح الاسلامي والفرح العادي وبصراحه لقيت كلامها حلو ومنطقي من ناحيه كل ده وانها بتدعوا الناس للفرح الاسلامي ومصممه عليها يعدي شهر واتعزك على فرح اختها مع ناس اصحابى وتعالى شوفى كان معمول فى قاعه الاوركيد هنا فى القاهره وبصراحه رحت علشان فاكره انه اسلامي وعاوزه اشوف تطبيق كلامها ويا ريتنى ما رحت لقيته عادي جدا وواقفه هى تسلم على الناس عادي جدااااا ولا كانها كانت بتقول حاجه وكان فرح مختلط
اما صاحبنا ده فربنا يهدي ياا سيتى بس بجد التشدد وحش وفعلا زي ما قولتى حتى زي ما قولتى ضرب الدفوف او هى تلبس اسدال والناس تعرف انها عروسه ويفرحها بس يمكن من جواها اقتنعت بس دول مش سنه اعتقد حاجه تانيه ايه هى مش عارفه اصل فيه عندنا حاجات كتير
قوي فهمتى وبعدين ازاي بيطلع عند السيدات يعنى من غير استاذان والدليل انها مش راضيه انهم بيشغلواالاغاني لما ميكونش موجود
بس اهي جوازه وربنا يهدي ويوفقهم
احييكى على تصميمك لمدونتك
ممتع جدا وبيعبر عن شخصية روشة جدا
اسمحيلي اقولك هو اساء الاختيار
ومش هيكون في تفاهم
لانها من دلوقتي بتكدب عليه
اتفق بشده ان الفرح يكون اسلامي بمعني ان الحريم في مكان والرجاله في مكان
وكمان لامانع من وجود اغاني اسلاميه
ولا مانع من ارتداء احسن واشيك فستان مادامت مستتره عن اعين الرجال
لكن اللي حصل ده سوري في اللفظ مسخره
دي واحده لابسه الاسدال والنقاب وهي مش مقتنعه وكمان بتشغل عنب وغيره من ورا عريسها
واللي تعمل كده في الصغيره تعمل في الكبيره
وهو اساء الاختيار مش لانها مش كويسه
لانه كان المفروض اختار واحده هي اللي تطلب كده او علي الاقل تكون مقتنعه مش اللي حصل ده
توافق لمجرد ان اللي زيها اتخطبوا
ملخص الحوار اتفق بشده مع الفرح الاسلامي
اختلف بشده مع التحكم والعصبيه المتخلفه
بس مش عايز اكون متشائم لو قلتلك انها لو استمرت بأسلوبها ده مش هيعمروا سوا
تحياتي ياجميل
برقوش
الفرح فى القلب مش فى التشدد
؟
اسف لكنه راي
السلام عليكم
يااااااه
إيه ده؟ بجد؟
دي حاجة تزعل بجد
إيه الكلام ده .. أغيب أغيب ومسألش عليك
ولا تسألي عليا كدة؟
ولما أرجع ألاقي اللوك الكئيب ده؟
هو جديد وحلو آه لكنه غريب شويتين
المهم بجد العروسة دي جنت على نفسها باللي عملته ده
أنا مع الإحترام لكني زي م أنا ذد التسيب والانحلال ضد التزمت
الناس اللي بتقول على نفسها ملتزمة هتقول عليا متسيب
والناس اللي بتقول على نفسها فري هتقول عيلا متزمت
أنا شخصياً مش هخلي مراتي ترقص في الفرح ولا هجيب دي جيع معفن وسيس من بتوع هيصة وكدة لحد هنا متزمت صح؟
لأ هجيب مطرب بجد يا كاظم يا فؤاد إن شاء الله
لحد هنا أهبل صح؟
كدة أنا معقد تقريباً
على العموم ربنا يوفق الجميع
تحياتي
بالشفا
يها المواطنون نذيع عليكم بعد قليل خبرا هاما
مارشات عسكريه مارشات عسكريه مارشات عسكريه
كمان مارشات عسكريه
كفايه كده
ايها المواطنون جاءنا البيان الهام التالى
اذاعت كافة وكالات الأنباء الفضائيه والأرضيه وما تحت الأرض ايضا ان السيد عبده الرايق مرشح للفوز بجائزه تقدر بربع مليون يورو ....متتخدوش اوى كده لأن من شروط الجائزه ان يجيب على سؤال بمدونتنا التى تحوى هى وموقعنا كافة التفاصيل والكل مدعو للأشتراك والفوز باحدى جوائزنا الثيمه
ونرجوا ان تستمعوا الى حلقة برنامجنا الأذاعى الذى به ايضا معلومات مثيره فى هذا الموضوع يوم الأحد 29-6 حيث نكشف كافة الأسرار وراء هذا الموضوع والبرنامج يذاع التاسعه وعشر دقائق صباحا على اذاعة مصر الرئيسيه كما يمكن الأستماع اليه من داخل موقعنا على النت اسرة برنامج انت تسال والكمبيوتر يجيب
والعنواين
المدونه ثم الموقع كالتالى
http://netonradio.blogspot.com
http://dear.to/cairo
انها عادات البدو الهمج
انها السلفية الوهابية القادمة لنا من مملكة الرمال (السعودية)
هل تعتقد تلك الاخت انها ستكون الزوجة الوحيدة لهذا الهمجى القادم من مملكة الرمال
ابشرها انها ستكون واحدة من طابور طويل من حريم هذا الهمجى القادم من مملكة الرمال
عووووووووووووووووووووووووو انا جيت اتخدتى
...................................
اةةةةةةةةةةةةةةةةةةةةةةة
هنعمل اييييييييييييييية بس
الجواز ..مودة ورحم مش قرارت من طرف واحد وشكررررررررررررا على كدة
حاجة تفرس
............................
انتى مش بتيجى ليييييييييييييية
انا ببقى
هناك علطوللللللللللللللللللللل
ياسيتي سيبي كل واحد يفرح علي طريقته
وفي كل الحالات الناس بتتكلم
المهم انها تكون راضية
وهو راضي
وانت مالك بينا بقي ياقاضي
اسلوبك جميل
تحياتي
نماممه
والله معرف لما هو عقد اوى كدة عمل فرح من أثاثة ليه ... ثم ازاي يجبر بني أدمايه ليها عقل أنها تلغي عقلها وتعمل حاجة مش عاوزاها ... ده أسمه تجبر وديكتاوريه ... والله مش عارف أخرت التذمت والتعصب ده هتودينا فين
هههههههههههههههههههه
احم احم ..
للاسف فيه ناس فاهمه الدين غلط
يعني بيحكم علي الناس من بره
و غير كده كمان
و بعدين
من كانت هجرته الي الله و رسوله فهجرته الي الله و رسوله
و من كانت هجرته لغير ذلك فهو لما هاجر اليه (ده مش نص حديث .. ده معناه)
يعني البنت اللي انت بتتكلمي عليها دي
لبست الاسدال و هتلبس النقاب
مش عشان ربنا
عشان المحروس
و ده عمره ماكان صح اطلاقا
ياللا بقي اشوفك علي خير
و علي فكره مدونتك في منتهي خفةالدم و المصداقيه و التلقائيه
ياسميـن
نوته و قلم
سلام عليكم
اولا اكتر حاجة عجبتني هنا الطريقة المجنونة في الكتابة وبحييكي عليها عشان دي بتوصف روحك وشخصيتك جدا وبحس اني شايف المدون قدامي
ثانياً التدين مش دقن طويلة وقفطان قصير ولا طول اليوم قاعدة في الجامع ولما يطلع يقولك مش الده الشيخ ده فيه وفيه وشوف بيعامل الناس ازاي وبيظلم ده وبيعمل في ده وعمره ما بيراعي الناس زي ما بيراعي الشكليات والمظاهر اللى بيظهر بيها (ده طبعا مش تقليل من اللحية لكن في المهم والأهم )
واللى بيتغير عشان بني ادم مش هيحس بالرضا لكن اللى بيتغير عشان ربنا ربنا هيرضيه
لو هو متدين فعلا كان يفهم ان التغيير بالحب مش بالعافية مش عشان هيا هتوافق غصب عنها نصدر التعليمات والأوامر ياريت اكون وضحت وجهة نظري وربنا يسعدها
وسعيد بزيارة مدونتك
اول او تانى زياة مش متاكد
المهم..
مدونه جميله اوى بجد وتحسى كده انك مش عاوزه تقفليها...
مستنى ردك على مدونتى تشرفينى ف اى وقت وتنورى المدونه
يا سلام تعليق تاخد اتنين هديه ههههههههههه
ولا واحد هديه حتا ايه كدب دا ولا خدعه عشان نعلق بس
بس انا علقت عشان عجبتنى المدونه وان شاء الله حسجلها عندى
والله يا صحفيه
الله اعلم يمكن ربنا يجعله سبب ف هدايتها انا حضرت افراح اسلاميه قبل كده
كانوا مشغليين اغانى دينيه تدل على الفرحه
والعروسه كانت ف قاعه مع الستات
وكانت لابسه عبايه مغربيه بيضه طويله فوق الفستان
وحاطه مكياج بسيط
بس بصراحه كان شكلها زى العسل
ربنا ماقلش بلاش نفرح لا
بس المهم ما نرتكبش معصيه عند الفرح
وربنا يهدى الجميع يا رب
اتمنى تنورينى
بصراحه اول مرة اشوف اللي بتحكي عنه دا
.
.
رغم اني معترض تماما علي مسمي الفرح الاسلامي
.
.
الا ان اختي هتتجوز كدا بالشكل المتعارف عليه انه فرح اسلامي
.
.
الفرق بقي ان اختي اصلا
كانت منقبة من قبل ما ييجي العريس
.
.
يوم الخطوبة راحت كوافير
ولبست فستان وعملت ميكب كامل
بس فيه حاجة كدا عاملة زي الخيمة
بتتلبس عشان مايبانشي منها حاجة
.
.
وقعدة الحريم بيكونوا براحتهم جدا
.
.
دا حتي بقي فرق اسلامية بتجيجي تحيي الافراح اللي م النوع دا وهو رزق الهيل علي المجانين
.
.
اللي حصل في حالة صاحبتك دي ظلم
وهي اول واحده ظلمت روحها
لكن للاسف مش هتحس بدا الا بعدين
.
.
تحياتي
والسلام
ادم المصري
أولا حمدا لله على السلامه وبداية التدوين من جديد..ويارب تكوني عملت كويس في الإمتحانات
بالنسبه لموضوعك فأنت عنك حق إحنا فقدنا المعنى الحقيقي لعمل الأشياء يعني فيه ناس كتير بتعمل حاجلت كتير وهي مش عارفه هي بتعملها ليه مجرد إنهم مع الركب وده في حاجات كتير في حياتنا علشان كده حياتنا مليانه متناقضات
ربنا يهدي
تحياتي
التعصب والتشدد فى اى شئ غلط لان اللى بيشق على نفسه ربنا بيشق عليه واعتقد انك كنتى تقصدى تتكلمى عن الناس الى بتغالى فى تدينها وتنتقديهم يعنى الهدف مكنش نقد الفرح الاسلامى فى حد ذاته لان الفرح الاسلامى محدش يقدر ينكر انه فيه شئ من الحشمه والنظام وكمان لانه بيمنع الاختلاط اللى اكيد هيكون شئ مخالف للشرع والاغانى والرقص وغيره
تحياتى
يخربيت كدة
دة عزا يا بنتي
لا أنا حضرت افراح اسلامية
وكانت سكر يعني
أغاني اسلامية وا لناس فرحانة و بتهرج
و عند الرجالة بيجيبو شيخ بيقول كلام
و الشباب بيعملوا فقرات
وب يهزروا
و بتبقي هيصة يعني
بس البنات لوحدهم و الرجال لوحدهم
و العروسة بتدخل الفرح محطوط عليها حاجة زي ملحفة ولا بتاع مش مبين منها حاجة و لونه ابيض لحد ما تددخل الفرح
..........
بس مسخرة حكاية انهم حاطين ناظورجي لما العريس يغفل يشغلوا اغاني
لأ مسخرة مسخرة يعني
.............
ربنا يهديها
و يهدينا جميعاً لما يحب و يرضى
و يهديه هوه كمان
ياس يدي نقبها
اعمل فيها اللي انت عايزوا
بس خليها تفرح
هيا الفرحة حراااااام
...
دمتي سالمة
سلامون عليكي
عاوز اسألك انتى هتعملى فرحك ازاى؟؟؟؟؟؟ وتقترحى عليا أعملوا ازاى؟
تحيــــاتى
المصــــــــرى
أنا ملاحظ أن انتى غايبه بقالك فتره كبيره وبصراحه مفتقد مدوناتك المشاغبه يارب تكونى بخير
أنا أعرف بنات بيعملوا كدا..بيلبسوا النقاب عشان العريس عايز كدا بس هم بردوا فى الاصل مش متدينيين أوى لدرجة النقاب يعنى..يمكن يكون السبب زى ما قلتى ان كل واحدة شايفة اصحابها اتجوزوا وهى لسة مستنية فبتقول مفيش مشكلة من وجود بعض التنازلات
:(
الواحد مش عارف دى يتفرحلها ولا يتزعلها ولا ايه
بس مش هتعرف تكمل حياتها كدة
ربنا يهديها و يوفقها للى فيه الخير ليها
BREAK
أولا وحشاني جدا
وكل سنة وأنتي طيبة
مع سامحيني في التأخير
وبالنسبة للبوست
غلط
لأنها من جواها مش ملتزمة بالقدر الكافي اللي يؤهلها لارتداء النقاب
ولو هو متدين وملتزم يبقوا هيختلفوا كتير
لأنها مش زيه هي بس حبت تريحه بارتداء الزي اللي هو شايفه مناسب مش أكتر علشان ما تضيعش الفرصة من ايديها
ربنا يهدي
ههههههههههه
لا دا حوار فاشل طبعا
..اصلا فكرة ان واحد ييجى يتشرط من غير حتى ما يفكر يقنع البنت و كمان هى تقبل دى فكرة مرفوضة خصوصا ان تغيرها دا عشان تلحق جوازة و خلاص فالتغيير كدا و كدا بدليل النادورجى اهو و هما لسا عالبر دا لسا لما يتجوزوا كمان
موضوع غريب اوى
ايه علاقة الاسلام بالغصب الفكري والتعصب والتشدد ده؟؟؟
ليه مايقولش العريس انه عايز يعمل فرح متخلف بدل ما يعمل فرح اسلامي وبعدين يعني ايه فرح اسلامي اصلا؟؟؟
يعني ممكن يبوظ لو حد من الجيران المسيحيين راحوا يباركوا؟؟؟
والله احنا هيزيد تخلفنا والبنت دي بكره هتشوف ايام بلون عبايتها لأن عريسها متخلف من المتابعين لقناة الناس
ولسا الي جاي اصعب
تحياتي
و الله الحياه مليانه تناقضات و الناس مبيهمهمش فى الدين غير المظاهر الا من رحم ربى
ههههه حلو تعليقك ع الفرح
اصل انا كمان كنت مفروسة من حاجه شبه كده
بس فى الاخر هم اللى بيشيلو الذنوب دى هى والا العريس لمتعصب
عووووووووووو
انا جيـــــــة يا فزفازيل
هههههههههههههههههه
انا جى اقول حاجه واجرى بسرعة
العروسة دى هتشوف ايام فوشك فى فوشك
ربنا يكون فى عونها
وابقى بلغينى لو ماما عرفت اى اخبار جديده
هههههههههههههههههههههههههههههه
تحياتى يا فزفازيل
يالهويييييييي
مش كنتى تقوليلى عشان اجى اسندك ونقول مع بعض
وحدوووووووه
انا متخيله شكل الاتنين بعد ما يتجوزوا وكل واحد يبان على حقيقته ايه اللى هايحصل
ولا صراح مازنجر وابا الغضب طبعا
وحسبي الله ونعم الوكيل على اللى ابتدع العنوسه
koukawy
سؤال؟
انتى اللى تعرفيها ولا انا؟
لا مش مقتنعة
وانا عارفة
بطوط حبوب
اختلف معاك
الاتنين غلط
مش الصح التذمت الصح انه يبان انه يوم فرح يعنى مختلف عن الايام العادية ولا حتى ميقعدش الناس على انهم فى عزا
ليه مفيش مسابقة دينية؟
ليه مفيش خطبه دينية عن الجواز وفضله؟
ليه ليه ليه
اظن دة مكنش هيبوظ الفرح الاسلامى
ولا كلام ربنا حرام ؟والعياذ بالله
ساموراى فور ايفر
اهى على الاقل كانت لابسه فستان
وكونك صدعت الاغانى يبقى انت مش حاببها
ودى حاجه ترجعلك
ايمان
اشكرك واتمنى زيارتك
وجهة نظرى
هى اكيد مستوردة وكلنا عارفين منين
المفقوعة مرارتها
كدة اوفر اوى
القعدة كلها كانت حريم مين يعنى اللى كانت حرام تظهر قدامه
wanna be
الدين مش بالتصرفات اللى قدام الناس زى اللى بيروح يصلى فى الجامع عشان الناس تقول انه صلى
الدين اكبر من كدة
يونيك
اكيد فى خلل
روفى
مش عارفة فعلا ايه الداعى انها متتزوقش رغم انه كان فرح اسلامى وكله حريم
سنووايت
اولا عندك حق مفيش سنه توافق فى الظاهر
ثانيا يمكن عاوز يكسب فيها ثواب بالعافية
ثالثا انا سمعت ان السعوديين بيعملو الفرح حريم لوحدهم ورجال لوحدهم بس يشغلو اغانى عادى يعنى
اذيك يا روشة عاملة اية واخبارك
بوست حلو ودي تفكير كثير من البنات جدا بس ح تعملي اية بقي في ثقافة المجتمع هية كدة البنت مش بتفكر غير انها تتجوز وترضية قبل الجواز وبعد الجواز تطلع عينو
ع العموم انا عاملة بوست جديد ولسة جديدة هنا اتمني تزوريني وانا علي فكرة زميلتك وابقي افتحي الميل
ما شاء الله عليكى بأسلوب سردك الجميل للقصه وبخفة دم لا مثيل لها
انا كمان حضرت فرح اسلامى لكنه كان زى ما وصفتى قاعه للبنات وبس وكان في فرقة بنات بتنشد اغانى جميله ومحترمه بالدفوف وكان يوم جميل والله والعروسه رقصت وكانت مبسوطه ربنا يسعدها
وبعدين هو اخدها دلوقتى مش مقتنعه بلبسها يعنى ممكن بعد الجواز تعمل اللي علي مزجها واديه اتجوز وخلاص ولا رجعه بقى , ساعتها هيعمل ايه , فعلا عقول غريبه
تحياتى ليكى ولكتابتك الرائعه
انا رأيي ان كل واحد دماغه مريحاه
يعني اكيد هي اللي اختارت بارادتها انها تقبله من البداية وخدت بمقولة ضل راجل ولا ضل حيطه خلاص بقى هي حرة
هي اللي هتعيش مش احنا .
وقال على رأي المثل الشعبي (اللي بيشيل اربه مخرومة بتخر على دماغه).
تقبلي مروري
ههههههههههههههه
فعلا انا حضرت فرحين اسلاميين
وكان فيهم اغانى اسلاميه
ودفوف وموسيقى
يارب تكونى تمام ..
اقوم انا و مجموعه من المدونين بعمل حملة لانقاذ اطفال الشوارع
التفاصيل هنا
http://awraqwasrar.blogspot.com/
نرجو اشتراك الجميع
كارثة! حتى الفرح بوظوه علينا بالعادات المستوردة! جوازة ايه دي اللي بادية بداية سودا زي كده! اعتقد انها مش هتطول كتير...
فينك يا نميمة ؟ بقالك كتير مادونتيش ؟
كل عام و انتم بخير بمناسبة شهر رمضان الكريم
رمضان كريم و اعاده الله عليكم بالخير و اليمن و البركات
رمضان كريم
ليكي فانوس عندي يالا تعالي خديه بسرعة
انا شايف بردة انه اساء الأختيار ومش هي دي الدماغ اللي تمشي معاه
كمان شايف ان من حق كل واحد يفرح زي ماهو عايز ومش من حق اي حد يعترض على فرح حد طالما هو موافق ومبسوط باختياره
كل سنة وانتي طيبة بمناسبة رمضان
انتى فين يا بنتى كل سنه وانتى طيبه
طبعا هو مفيش مانع من الفرح الاسلامى
بس ده ماكانش فرح ودى نقطة
النقطة التانية ما ينفعش واحدة تلبس حجاب ولا نقاب علشان واحد الحاجات دى علشان ربنا
بسم الله الرحمن الرحيم
معذرة على الخروج عن الموضوع
ولكن
نكسة مصرية جديدة
في العاشر من رمضان 1429هـ
10/9/2008
على مدونة البحر
www.ana-elbahr.blogspot.com
نشرف بزيارتكم
تحياتي
كل عام وانت بخير
احمد الجيزاوى
ايه الغيبه الطويله دى
كل سنه وانتى طيبه
يارب تكونى بخير
كل سنه وانتى طيبه يا صحفيه
انتى فين متقلينيش عليكى
نقول ايه بس
اتمنى بعد كل التضحيات دي
انهم يتبسطوا في حياتهم
وتكمل معاهم بالستر
وان كان دا موقفه من الفرح امال في باقي تفاصيل الحياه هتون عيشته ازاي
ربنا يرحمنا جميعا
كل تعليقاتكم على راسى بس بعد الغيبة دى مش هقدر ارد عليها كلها دلوقت يمكن بعدين وحشتونى اوى
البت دي صعبانة عليا اتوكست وكسة كبيرة غير كده سيرتها بقت على كل لسان رغم انه فرح غريب وكئيب الا اننا كلنا عاملين نتكلم عليه اهو البت اتفضحت وفضيحة بجلاجل كمان فعلا نميييييمة ههههههه
Post a Comment