دى عادات دى تقاليد

فى الاول كدة وحشتونى اوى مش عارفة بقالى قد ايه مكتبتش ومش عارفة انا هرجع اعرف اكتب تانى ولا لا يعنى مش عارفة كتاباتى هتشوفها ازاى دلوقت

المهم نددددددددددخل فى الموضوع ..اه مانا جايه النهاردة اقول موضوع

بالظبط كدة اللى عنوانه شفتوه فوق دة

الجواااااااااااااااااااااااااااااااااز وسنينه اه من الجواز مش الجواز اوى يعنى انا اقصد التوابع

اييييييييوه من اول الصباحية والمسائية والضهرية والعصرية والمغربيه

اول ما الناس جاتلى فى الصباحيه تسلم عليا واللذى منه ماما خدتنى على جنب

وقالتلى هو فيه ايه؟

قلتلها فى عصير جوافة وبيبسى كولا عدو الشعب

قالتلى انتى هتستعبطى يا بت

قلتلها لا هستهبل فى ايه بس

قالتلى انتى مش هتفرجى ضيوفك على الشقة انا مش قلتلك قبل الجواز ان لازم الضيوف تشوف شقة العروسه

(اه منكم يا نيتكم السودا انتو فكرتو هتقولى ايه وعاملين فيها مؤدبين)

قلتها اه صح يوم ما علمتينى ابقى مرشد سياحى فى الشقة

قالتلى بالظبط كدة يا حبيبه امك

انا:يا كزوفى يا كزوووووووفى(حمر خجلا) هههههه

بعد العصير والسلامات والتحيات والقبلات والحديث على ما عدى وفات ومن هو حى ومن توفى ومات

انا:اتفضلو يا جماعه مش هتشوفو الشقة

هنا اوضه السفرة حيث عقد غداء عمل بين الملك فاروق الاول والملكة انيسه الخبيثة الرابعة

وهنا اوضه الانتريه حيث لا يجلس الا من كان بيه ابن بيه

وهنا الصالون حيث نحن مجتمعون

وهنا اوضة النوم حيث....ننام ونقوم

وهنا اوضه الاطفال (ادعو قولو امين والا هغزك انت وهو) ايوة كدة

وهنا بقة المطبخ حيث نحضر الطعام الملكى للملك فاروق الاول والاخير والملكة انيسه الخبيثة(انا مش قلتلكم انهم اتغدوا على السفرة برة) ودة بقة الحمام هى هى هى هى هى هى هى هى هى لزوم اللــــ والذى منه وكل سنه وانتو طيبين ويعودها سنه سعيدة عليكم

بس طبعا انا كدة معملتش الواجب

تخيلو الناس الى تيجى تزورنى كل واحد ينقى ميعاد ويجى على مزاجة يتصل قبلها بشوية ويقولى انه جاى وكل حد يجي اعمله مرشه سياحية الا ان محدش رضى عنى لان جولاتى مكنش فيها التفاصيل اللى كل الناس كانت عاوزها

يعنى مثلا انا مفتحتش دولابى عشان يعرفو او يتفرجو انى جايبه هدوم جديدة ومفتحتش وريتهم الفوط والبرانس والطرح والكيتش ماشينى وطقم الصينى واطقم القهوة (مع اننا بلد متشربش قهوة ومشروبنا الوطنى هو الشاى بس ازاى بقة) ومورتهمش المفارش ومطلعتش الشقة كلها من مخابئها

وموريتهمش الدهب تانى سورى اقصد عاشر وموريتهمش حاجات كتير كانو عاوزين يشوفها

طب بالذمه الناس بتسال العنوسة بتزيد ليه وهما مش فاهمين ولا فاهمين ولا بيستعبطو؟

اكيد طبعا فاهمين وبيستعبطو

طب ماشى انا ممكن اكون متيسرة الحال وانت متيسر وانتى متيسرة

طب والباقى ياناس مين يقدر يجيب الحاجات دى كلها والله العظيم تجهيز عش الزوجية دة مكلف جدا حتى لو كنت شادد الحزام ووالله بردة لو الحزام اتقطع من كتر الشد بردو مكلف

ومفيش كلمه اضيق الحدود يعنى ليه بنجيب كل الصينى دة ويبقى للعرض بس مش للاستخدام عشان تملى النيش والكلام دة ويجيبو بدل طقم اطباق صينى كامل 3 اطقم واحد صينى وواحد اركوبال وواحد بيريكس وواحد بوردة مشمشى عشرات اطقم الكوبايات للشاى وغيرها للقهوةكل دة للعرض لان ى حاجات تانية بتيجى للمطبخ للاستعمال اليومي

ولا الحلل البرستو والتيفال والصاج والاومنيوم و.. و... مش هطول عليكم البنات تشرح للشباب بقة والشاب يسال ماماته وهى تشرحله

الجواز بيكلف الافات

لا واللى زاد وغطى لازم الناس تتجول فى الشقة وتفتح النيش عشان يعرفو انتى جبتى ايه والا تبقى سمعتنا ايه الناس يقولو مجبنا ش حاجة تؤتؤتؤ ميصحش

ولازم تفتحى الدولاب عشان يتممو على الحاجة جبتى لبس جديد ولا دة القديم بتاع قبل الجواز وجبتى 40 فوطة ولا 10 بس

لا وطبعا انافة المصريين لازم منحرجش نفسنا والناس تقول علينا ايه لازم نشرف نفسنا ونشرف بنتنا ويستلفو ويعملو جمعيات ويفضلو مديونين 10 سنين بعد الجواز بسسب التشريفة اللى لازم يدخلو بيها ويتشرطو على العريس كما ولازم تجيب وتجيب وتجيب هو احنا بنتنا شوية

مقارنة بالحالة الاقتصادية اللى فى انحدار دائم

الحالة زفت الناس بقت تعبانة اغلب اللى كان طبقة متوسطه اوشكو انهم يكونوو معدمين

وبعدين

مين يقدر على كدة

مين يقدر على المصاريف دى؟

كلنا؟ اكيد لا

القادر بس هيتجوز

والباقى هقضيها تحرش وامره لله

والبنات تقتدى بحين ميسرة وامرهم لله

انا عارفة انى بقول مش كله العصر وكل عصر والحل قدام عنينا واحنا رافضينه

دة احنا المدنين نحمد ربنا

لان القرويين بيجهزوا اضعافنا

زى واحدة صاحبتى بتقولى انها اشترت مكنه بتعمل مكرونه

قلتلها ازاى يعنى

قالتلى تعجنى عجينه المكرونه وتدخليها المكنه تفردها وبع كدة تقطعيها

قلتلها ملهاش لازمة اشترى مكرونة جاهزة

قالتلى ومين قالك انى هعمل مكرونة فالبيت بس لازم اجيبها

بسالها لازم ليه

قالتلى عاوزة فضحتى فى البلد تبقى بجلاجل ولا ايه

تخيلو فضيحة عشان مكنه زى دى لان كل حريم البلد شارينها ميصحش هى كمان متشتريها

ولا القايمة بتاعتهم بيعملوها على اخر واحدة عملت قايمتها مش على الحاجات الموجودة فعلا

يعنى اخر واحدة عملت ب 110 الف جنيه انا هعمل ب112 عشان ابقى زودت رغم ان القيمة الاصلية ممكن تكون 60 او 70 الف ظلم ولا لا؟

والعروسة المدنيه تانى يوم بيجيلها اكل وعشا وغدا وفطار

القرويين على حسب ما قالولى بدل الاكل

شكاير رز وكراتين مكرونه جاهزة واقفاص فراخ ويروحو بربطه المعلم وهما عارضين الحاجة عشان الناس تعرف انهم جابو لبنتهم ولا نقل العزال من بيت اهل العروسة لبيت جوزها ياخدو اربع عربيات نقل ويفرشوا فوقيها البطاطين عشان الناس اللى فى البلكونات تتفرج ويفرشوا السجاجيد ويحطو الانترية لو كانو جايبين ويعرضو المطبخ ويجيبو فرقة تعزف وتغنى من اول بيت العروسة لحد بيت عريسها حتى لو كان فى اخر الدنيا هيروحو بالزفة بردة

وفى تقعد 3 ايام متطلعش البلكونه عشان الغموض والسسبنس وبعد كدة تطلع تنشر غسيلها وتخلى بالها انها تعرضة حتة حتة اللى الناس عاوزة تشوفة فى اول حبل قدام واللى مش مهم اوى وراه

ولازم مفرش السرير يتشمس امال ايه؟امال الناس تعرف انها دخلت بمفرش سرير ولا لا منين

ومن النوع الرخيص ولا الغالى ازاى

بقة دة كلام يتعقل

كل دى تكاليف ؟

طب لو واحد عنده 6 بنات ورا بعض يعمل ايه

دة لو قطع نفسه وادى لكل واحده حتة مش هيكفى

بس ازاى بقة

دى عادات دى تقاليد منقدرش نغيرها وبعدين يعنى هو احنا اللى هنقلب ميزان الكون

اف يلا خلاص دمى اتحرق انا همشى

هروح اجرب مكنه المكرونة حد عنده وصفة عجين المكرونة

مش مشكله انا هجيبها من اى برنامج بيعك فى الاكل

انتظر تعليقاتكم