فال الله ولا فالك

قال ايه كل ما تكلم ايه اللسان دة

ياشيخة الملافظ سعد

فال الله ولا فالك

الموضوع من الاول انى بعانى مع الناس اللى اكبر منى فى السن عادة بسبب انى بتكلم عادى

وهقلكو شويه مواقف

يعنى مثلا كان فى واحدة ماما رايحة تزورها عشان تعبانه فبقولها هى مالها يا ماما قالتلى عندها المرض الوحش

قلتلها ما كل الامراض وحشه يعنى هى عندها ايه يعنى

مرضيتش تقولى

فهمت فيما بعد من ناس انها عندها كانسر فروحت قلت لماما ازاى متقليليش ان عندها كانسر كان المفروض اروح ازورها

لقيت ماما وشها ازرق واحمر واخضر وطبقات صوتها عليت اووووووى

متقوليش كده متفوليش_مش من الفول_فى وشى يا شيخة نقى الالفاظ

هبل الهى ما اطعمك انا هتشل والله

شلت يدى لا لا انها سليمه نيهاهاهاها

انا حسيت انى عملت جريمة مش عارفة ايه هى

بعد كدة حصل موقف تانى بكلم خطيبى فى التليفون بالليل وطبعا انتو فاهمين مكالمات بالليل

بس حصل تغيير فى النص الاصلى لمكالمات نص الليل وخرجنا عن الهيام ولسبب ما عجبنى فيه

قلتله انت دماغك حلوة اوى بتفكرنى ببابا جدو اللى يرحمه وحتى دة اللى عجبنى فيك وكمان عشان فيك شبه من اونكل ميمي حبيب قلبى

ليه وليه اقوله فيك من بابا جدو

قالى بصى يا مهوهتى _جايه من مها_ انا فاهم انك "دبشة" وطيبه اوى واللى فى قلبك على لسانك ومش فاهمة انتى قلتى ايه بس انا عارف انك على طبيعتك ودة مش بيزعلنى منك لكن متفوليش الكلمة دى قدام مامتى

استغربت اوى ولما سألته ليه

قالى عشان ماما بتتشائم لما حد يشبه حد عزيز عليها بشخص ميت

(ال يعنى لما مات بقى نجاسه)

بس كان لازم اتاكد وهو رايه ايه فى الكلام الاهبل دة

قالى انا مش مؤمن بالكلام دة بس لازم نراعى الاكبر منا دول اهالينا بردة

كلامه حلو بس الاعمار بيد الله

موقف تالت حصل

انتو طبعا فاهمين انى عروسة والعروسه لازم تجيب هدوم خروج جديد

خرجنا انا وماما وخطيبى وعجبنى جا كيت اسود جدا جدا جدا وكنت اصلا بدور عليه

لمجرد انه اسود ماما رفضته قال ايه! فال وحش

من غيظى لانى كنت هموت على الجاكت قولتلها والله بعد الجواز هنزل اجيب لبس لوحدى وكل ما هجيب حاجة هيكون لونها اسود

اتارينى قولت بلوة كبيرة وانا مش واخدة بالى وماما وشها قلب

كان بتهيألى ان واحد هيطلع من فيلم فجر الاسلام ويقول فلنقيم عليها الحد

فلنمزقها اربا اربا ونرميها للكلاب اللولو بتاعة المسلوخ بن المهلهل

وجت بعدها قالتلى انتى عارفة مين اللى بتجيب لبسها كله اسود بعد الجواز

قلتلها من غير نرفزة بس يعنى هتكون مين ياماما يعنى

قالتلى الارمله

فبهزر معاها بقولها ارمله بعد الجواز كدة هو انا عنكبوته ولا ايه هقتل العنكبوت فى الصباحيه ويبقى اسمى الارمله السوداء

طبعا هول الصدمة خدنى ودماغى لفت يانهار مش فايت بقة انا كلامى اتحور وبقى كدة

بقة كل مرة اقول فيا حاجة اطلع (بفول)على حد بالموت او المرض

معقوله امى مربيه الاجيال دارسه علم النفس بتعمق دارسة الحقوق ودارسه اللغه العربيه كمان تفكر كدة بالاسلوب دة

(متاخدوش فى بالكم اصل ماما غاويه كليات)

وخطيبى حبيبى يمشى مع التيار ويعتبر ان الكلام دة غلط انى اقوله

معقوله مامت خطيبى بردة ماشيه تبع الحاجات دى

معقوله كل الناس اللى علمونى مفكرش فى الحاجات دى هما اللى بيأمنو بيها

الامثلة اللى ذكرتها فوق على سبيل الذكر لا الحصر

من ده كتير والله

بس تفتكروا مين اللى غلطان

انا ولا هما ولا اللى اثروا فى الناس من الاول وحطو فى دماغهم الحاجات دى ؟

انا عن نفسى مش عارفة

انتظر تعليقاتكم